Jɔn 18 - JAM DE NHIALIC 2011

Döm de Yecu

¹ Na wën, aacï Yecu kakë lueel, ke lɔ biic kekë kɔckɛn ë piööcë, lek ku temkï nyin cɔl Kidron, ku dom anu lɔɔk ëtɛ̈ɛ̈n, ago lɔ thïn, yen kekë kɔckɛn ë piööcë.

² Ku Judath aya, raan bï e nyiɛɛn, aŋic ëtɛ̈ɛ̈n: në luɔi ee kek cool e mat kenïïm ëtɛ̈ɛ̈n, yen Yecu kekë kɔckɛn ë piööcë.

³ Na wën, aacï Judath rem ë alathkëër nööm kekë bänyken, tëde bänydït ke ka ke Nhialic ku Parithai, ke ke jɔ bɛ̈n ëtɛ̈ɛ̈n, ke ke muk kuthyuui ku mɛ̈ckealath ku ka ye ke biök.

⁴ Go Yecu, në ŋïny ŋic en käŋ kedhie ka bï yök, go lɔ biic tëde keek, le ku thiëëc keek an, “Eeŋa kaarkï?”

⁵ Gokï bɛ̈ɛ̈r an, “Yecu de Nadhareth.” Go Yecu ke yɔ̈ɔ̈k an, “Ya kï.” Ku Judath aya, raan ë nyiin en, akääc ëtɛ̈ɛ̈n kekë keek ëtök.

⁶ Na wën, aacï ke yɔ̈ɔ̈k an, “Ya kï,” ke ke jɔ lɔ ciëën, wïïkï.

⁷ Go ke bɛ thiëëc an, “Eeŋa kaarkï?” Gokï lueel an, “Yecu de Nadhareth.”

⁸ Go Yecu bɛ̈ɛ̈r an, “Acä lɛ̈k week an, ee yɛn ee yen: ënɔɔnë, të kaar wek ɛn, ke we päl kɔckë ë ke jël.”

⁹ (Aa luel ee kënë luɔi bï jam wën cï lueel aa yic an, “Në kɔckë yiic kɔc cï gäm ɛn, acïn töŋ cä tɔ mär.”)

¹⁰ Na wën, ke Thimon Petero, raan cath ke abätäu, ke mïït bei, yup lïm ë bɛ̈nydïït ë kake Nhialic, kip yïny cuëc wei. Rin ke lïmë acɔl Malko.

¹¹ Go Yecu Petero yɔ̈ɔ̈k an, “Tääuwë abätäu ë thiönhde yic: bïny cïï Wäär gäm ɛn, cä bï dek ë ye?”

Yecu anu në Anath Nɔm

¹² Go rem ku bɛ̈ny de rem ku bäny ke Judai agokï Yecu dɔm, ku dutkï,

¹³ gokï thel, kɔnkï lɛɛr të nu Anath. Ë luɔi ee yen thun ë Kayapath, raan wën ë ye bɛ̈nydïït ë kake Nhialic ee ruunë.

¹⁴ Ku Kayapath, yen aye raan wään yïn Judai löŋ an, aŋuän të bï raan tök thou ë nyin ë kɔc yiic.

Petero Ajiɛi Yecu

¹⁵ Ku kuany Thimon Petero Yecu cök, ayï raan däŋ ë piööcë. Ku raanë aŋic bɛ̈nydïït ë kake Nhialic, go lɔ kekë Yecu ëtök ë aloocic, alooc de bɛ̈nydïït ë kake Nhialic,

¹⁶ ku kääc Petero ɣöt thok biic. Na wën, ke raan däŋ ë piööcë raan ŋic bɛ̈nydïït ë kake Nhialic, ke lɔ biic, le ku jiɛɛm kekë nyan lïm tit ɣöt thok, ku bïï Petero ɣöt.

¹⁷ Go nyan lïm tit ɣöt thok go Petero thiëëc an, “Yïn aya, cï ye raan töŋ ë kɔcpiööcë raanë?” Go jai an, “Yɛn cie raande.”

¹⁸ Ku kääc lïïm ku bäny ke rem ëtɛ̈ɛ̈n, acïk many ë cool kooth, ku jɔkï ɣɔ̈c, piny aa de wiir: ku kääc Petero ke keek ëtök, ke ɣɔ̈c.

Bɛ̈nydïït Tueŋ ë ka ke Nhialic Alop Yecu

¹⁹ Na wën, ke bɛ̈nydïït ë kake Nhialic ke jɔ Yecu luɔp në këde kɔckɛn ë piööcë, ku në wëëtde.

²⁰ Go Yecu bɛ̈ɛ̈r an, “Yɛn aaye jam ë kɔc nïïm kɔc ke piny nɔm, yɛn aaye cool ë wëët ë ɣööt ke Nhialic yiic, ayï Luaŋdïtic, të ye Judai cool ë guëër thïn, ku acïn kë cä lueel athiaan.

²¹ Eeŋö lop yïn ɛn? Luɔpë kɔc wään cï ka cä lɛ̈k keek piŋ? Tïŋ, keek aŋickï kë cä lueel.”

²² Na wën, aacï ee kakë lueel, ke bɛ̈ny tök ë bäny ke rem, raan kääc ë yelɔ̈ɔ̈m, ke jɔ Yecu biɔ̈ɔ̈k ë yecin lueel an, “Bä bɛ̈nydïït ë kake Nhialic bɛ̈ɛ̈r thok wuya!”

²³ Go Yecu bɛ̈ɛ̈r an, “Të cän kërac lueel, ke yï luel kë cä wööc: ku të cän jam tiiŋic, ke ye ŋö biëëk yïn ɛn?”

²⁴ Anath acï Yecu tɔ yïnë Kayapath bɛ̈nydïït ë kake Nhialic ke duööt.

Petero Abe Yecu Jai

²⁵ Ku kääc Thimon Petero ke ɣɔ̈c. Gokï thiëëc an, “Yïn aya, cïï ye raan töŋ ë kɔckɛn ë piööcë?” Go jai an, “Yɛn cie raande.”

²⁶ Na wën, ke raan töŋ ë lïïm ke bɛ̈nydïït ë kake Nhialic, ke ye raanden ë raan cïï Petero kiɛp yïc wei, ke jɔ thiëëc an, “Ë yï kɛ̈n tïŋ domic wekë yen ëtök?”

²⁷ Go Petero bɛ jai: na tëthiinë ke ajïth go kiu.

Yecu anu në Pilato Nɔm

²⁸ Na wën, ke ke jɔ Yecu thɛl ë Kayapath nɔm leerkï alooc de gɔny yic: ku piny ë ruu, ku kegup akënkï lɔ ë alooc de gɔny yic, ke ke cïï bï tɔ rac gup, ë luɔi duëër kek Winythok cam.

²⁹ Go Pilato lɔ biic të nu kek, le ku thiëëc an, “Ee käŋö ke gaany wek ee raanë?”

³⁰ Gokï bɛ̈ɛ̈r, luelkï an, “Tëë cïï ye raan rac, adï kënku yiɛ̈n yïn.”

³¹ Go Pilato ke yɔ̈ɔ̈k an, “Nämkï week, bäk löŋde lɔ guiir ë guiëërdun.” Go Judai lueel an, “Wo kënë päl näŋ bï wok raan nɔ̈k.”

³² (Kënë ë rɔt looi në luɔi bï jam aa yic, jam wään lueel Yecu, nyooth en thon bï en thou.)

³³ Go Pilato bɛ lɔ ë aloocic, alooc de gɔny, le ku cɔɔl Yecu, ku thiëëc an, “Ye melik de Judai?”

³⁴ Go Yecu bɛ̈ɛ̈r an, “Ë yï luel ee kënë në këdu yïtök, ku de kɔc kɔ̈k cï e lɛ̈k yïn në këdï?”

³⁵ Go Pilato bɛ̈ɛ̈r an, “Ya Judai? Jurdu guöp ku bänydït ke ka ke Nhialic kek aa yïn yï yɛn. Eeŋö cï looi?”

³⁶ Go Yecu bɛ̈ɛ̈r an, “Ciɛɛŋdï acie kë de pinyë nɔm, tëë ciɛɛŋdï ye kë de pinyë nɔm, ke remdï adï biök tɔŋ, ke ya cïï bï yiɛ̈n Judai, ku ënɔɔnë ciɛɛŋdï acïï bɔ̈ ee tënë!”

³⁷ Go Pilato thiëëc an, “Ka jɔ ya melik?” Go Yecu bɛ̈ɛ̈r an, “Ee yic yen luel, yɛn ee melik? Yen aa dhiëëthë yɛn, ku yen aa bä yɛn ë piny nɔm, luɔi bän aa cäätɔ de yic. Raan ëbɛ̈n raan cath ke yic ka piŋ röldï.”

³⁸ Go Pilato thiëëc an, “Yic eeŋö?” Na wën, aacï kënë lueel, ke lɔ biic le të nu Judai, ku lëk keek an, “Acïn awäny cä yök tëde yen.

Yecu acï Mäc Nääk

³⁹ Ku wek de ciɛɛŋ an, bä raan tök luöny week ëkööl ë Winythok. Dɛkï piɔ̈ɔ̈th nɔn bän melik de Judai luöny week ënɔɔnë?”

⁴⁰ Agokï bɛ cööt kedhie an, “Acie raanë! Ee Barabath!” (Ku Barabath ee raan ee kɔc rum.)