Jɔn 16 - JAM DE NHIALIC 2011

¹ “Kakë acä ke lɛ̈k week, ke we cïï röt bï dak ciëën.

² We bïï kɔc cieec ë ɣööt ke Nhialic yiic, yeka kööl abɔ̈, kööl bï raan näk week e lueel ë yepiɔ̈u an, looi ka ke Nhialic.

³ Ku kakë abïk ke luöi week, në kuny kuc kek Wäär, ayïk ɛn.

⁴ Ku kakë acä ke lɛ̈k wek: na miäk, acï köölden ɣëët, ke we bï wenïïm tak nɔn cän ke lɛ̈k week. Ku kakë akɛ̈n ke lɛ̈k week wään tueŋ, luɔi nuö yɛn wokë week.

Luɔi de Wëidït

⁵ Ku ënɔɔnë, yɛn jël la të nu raan ë toc ɛn, ku acïn raan tök ë weyiic raan thiëc ɛn an, ee tënou le yïn thïn?

⁶ Ku nɔn cän ee kakë lɛ̈k wek, ke we ye piɔ̈ɔ̈th guɔ dhiau aläl.

⁷ Ku ee yic en lɛ̈k week ayadäŋ an, jäl jäl ɛn ade naamde tëde week: na cä jël, ke Raan ee kɔc riit piɔ̈ɔ̈th acïï bï bɛ̈n tëde week, ku të jäl ɛn, abä tuöc week.

⁸ Ku yen, të cï en bɛ̈n, abï kɔc ke piny nɔm jɔ̈ɔ̈ny në këde kërac, ku në këde piathëpiɔ̈u, ku në këde guiëërëlöŋ:

⁹ në këde kërac, luɔi reec kek a gam,

¹⁰ në këde piathëpiɔ̈u, luɔi jäl ɛn la tëde Wäär, ke we cïï a bï bɛ tïŋ,

¹¹ në këde guiëërëlöŋ, luɔi cï löŋ de bɛ̈ny ceŋ pinyë nɔm thök ë guiëër.

¹² “Yɛn de kajuëc ŋoot ka bä lɛ̈k week, ku acäkï ke duëër lëu ë muk ënɔɔnë.

¹³ Ku të cï Raanë bɛ̈n, yen aye Wëi yic, yen abï we wat të nu yic ëbɛ̈n: ku acïï bï jam në këde yenhde, na de kë ye piŋ, yen abï aa lueel: ku abï we nyuöth käŋ, ka bï tïc wadäŋ.

¹⁴ Abï ya tɔ yök dhuëëŋ: abï këdï nööm, ku jɔ nyuöth week.

¹⁵ Ka nu ë Wäär cin ayek kakï kedhie: yen aa luɛɛl ɛn en an, abï këdï nööm, ku jɔ nyuöth week.

Jiɛthëpiɔ̈u ku Miɛtëpiɔ̈u

¹⁶ “Tëthiinakäŋ, ke we cïï ya bï tïŋ, ku na ëlë tëthiinakäŋ, ke we bï ya tïŋ, luɔi jäl ɛn la tëde Wäär.”

¹⁷ Ago kɔc kɔ̈k ee kɔckɛn ë piööcë gokï röt thiëëc kapäc an, “Ee käŋö kë lëk wook? An, tëthiinakäŋ, ke we cïï ya bï tïŋ, ku an, Na ëlë tëthiinakäŋ, ke we bï ya tïŋ, ‘ku ee luɔi jäl ɛn la tëde Wäär?’

¹⁸ Agokï lueel an, ee käŋö kë lueel an, ‘Tëthiinakäŋ? Akucku yen kë lueel!’

¹⁹ Aŋic Yecu nɔn kɔɔr kek luɔi thiëëc kek en, go ke yɔ̈ɔ̈k an, “Week luɔpkï röt wapäc në kë cä lueel an, ‘Tëthiinakäŋ, ke we cïï ya bï tïŋ na ëlë tëthiinakäŋ, ke we bï ya tïŋ?’

²⁰ Wek yɔ̈ɔ̈k ë yic an: We bï dhiau abäk dhuöör, ku kɔc ke pinynɔm abïk piɔ̈ɔ̈th miɛt: ku we bï piɔ̈ɔ̈th rac, ku rac de wepiɔ̈ɔ̈th abï rɔ puk abï aa miɛtëpiɔ̈u.

²¹ Tik, të kɔɔr en dhiëth, ee piɔ̈u dhiau nɔn cï köölde bɛ̈n: ku të cï en däk, ka cïï tuöcdepiɔ̈u wën be tak, në biäk de miɛt cï en piɔ̈u miɛt luɔi cï raan dhiëëth ë piny nɔm.

²² Ku week aya, we de dhiën ë wepiɔ̈ɔ̈th ënɔɔnë: ku we bä bɛ tïŋ, aguɔkï piɔ̈ɔ̈th miɛt, ku miɛt ë wepiɔ̈ɔ̈th acïn raan bï e nyaai tëde week.

²³ “Ku ëköölë acïn kë bä wek a luɔp. Wek yɔ̈ɔ̈k ë yic an, Të de yen kë bäk lip tëde Wäär në rinkï, ka bï gäm week.

²⁴ Aɣet cï ënɔɔnë acïn kë cäk lip në rinkï: yak lip, ke we bï aa miɔɔc, aguɔkï piɔ̈ɔ̈th miɛt abäk piɔ̈ɔ̈th a yum.

Tiëm ë Piny nɔm

²⁵ Kakë acä ke lɛ̈k week ë kɛ̈ŋ yiic: ku kööl abɔ̈, kööl cän bï bɛ jam wokë week ë kɛ̈ŋ, we bä guiëër ka ke Wäär ë gɔk.

²⁶ Ëköölë, ke we bï lip ë rinkï: ku acä lɛ̈k week nɔn bän Wäär lɔ̈ŋ ë biäkdun.

²⁷ Wäär guöp anhiaar week, luɔi nhiaar wek ɛn, ku luɔi cä wek a gam nɔn ë bä yɛn tëde Nhialic.

²⁸ Yɛn ë bɔ̈ tëde Wäär, bä ë piny nɔm: ku ënɔɔnë, yɛn be piny nɔm nyääŋ piny, la tëde Wäär.

²⁹ Ago kɔckɛn ë piööcë lueel an, “Andï, yïn luel jam agɔk ënɔɔnë, acie kääŋ yen luel.

³⁰ Ënɔɔnë aŋicku ëgɔk nɔn ŋic yïn käŋ kedhie, ku acïn kë bï raan bɛ thiëc yïn: kënë yen a gɛm wok yïn nɔn ë bï yïn tëde Nhialic.”

³¹ Go Yecu bɛ̈ɛ̈r an, “Cäk gam ënɔɔnë?

³² Wɔikï, kööl abɔ̈, yeka bɔ̈yë ënɔɔnë, kööl bï we thiäi wei, lɔ ŋɛk tëde ku lɔ ŋɛk tëde, ku nyääŋkï ya piny yatök: ku yɛn cïï tɔ̈u a tök, luɔi nu Wäär kekë ɛn.

³³ Kakë acä ke lɛ̈k week, ke we bï dɛ mät ë yayic. Në piny nɔm ke we bï dɛ këtuc ee we dhal: riɛtkï wepiɔ̈ɔ̈th tei! Yɛn ë piny nɔm tiaam.”