Jɔn 14 - JAM DE NHIALIC 2011

Yecu ee Kueer lɔ Paannhial

¹ Go Yecu lɛ̈k keek an, “Duökï wepiɔ̈ɔ̈th tɔ jeth, we ye Nhialic gam, gamkï yɛn ayadäŋ.

² Paan ë Wäär ade yic ɣööt juëc: tëë ke liu, adï cä lɛ̈k week. Yɛn lɔ la tëdun guik.

³ Ku të la yɛn, la tëdun guik, ke yɛn bï a nɔm bɛ lɔ puk, bä we bɛ̈n loor, ago të nuö yɛn, ke we bï nu ëtɛ̈ɛ̈n aya.

⁴ Ku të la yɛn thïn aŋiɛckï, ayï kueer aŋiɛckï.”

⁵ Go Thimon lueel an, “Bɛ̈nydït, wo kuc të le yïn thïn, ku duëërku kueer ŋic adï?”

⁶ Go Yecu lueel an, “Yɛn aye kueer, ku yɛn aye yic, ku yɛn aye pïïr: acïn raan bɔ̈ tëde Wääda, të kën en tëëk tëde yɛn.

⁷ Tëë we e ya ŋic, adï cäk Wääda ŋic aya: ku ënɔɔnë aŋiɛckï, ku acäk tïŋ.”

⁸ Go Pilip lueel an, “Bɛ̈nydït, nyuöthë wook Wääda, ku acïn däŋ buk bɛ kɔɔr.”

⁹ Go Yecu yɔ̈ɔ̈k an, “Cä rëër wo week ë caŋɣɔn, ku ŋuɔɔtë ke yï kuc ɛn, Pilip? Raan cï a tïŋ, ka cï Wääda tïŋ aya, ku eeŋö lueel yïn en an, ‘Nyuöthë wook Wääda?’

¹⁰ Kɛ̈në ya gam nɔn nuö yɛn ë wääda yic, ku nɔn nu Wääda ë yayic? Wël lɛ̈k week, acä ke ye lueel ë këde yenhdï, ee Wääda raan rɛ̈ɛ̈r ë yayic yen aye luɔi looi.

¹¹ Gamkï yɛn nɔn nuö yɛn ë Wääda yic, ku nɔn nu Wääda ëya yic: na dhɛl week, ke we gam ɛn në biäk de luɔiyë guöp.

¹² Wek yɔ̈ɔ̈k ëyic an: Raan gam ɛn, ke ka luɔɔi abï keek aa looi ayadäŋ, acakaa luɔi wär ee kakë abï keek aa looi, luɔi la yɛn tëde Wääda.

¹³ Ku të de yen kë bäk lip në rinkï, ka bä looi, ke Wääda bï dhuëëŋ yök në Wënde.

¹⁴ Na de kë liɛpkï në rinkï, ka bä looi.

Thön de Wëidït

¹⁵ Të nhiaar wek ɛn, ke we döt lööŋ thɔ̈n week.

¹⁶ Ku yɛn bï Wääda lip, ka bï we gäm Raan däŋ Raan ee kɔc riit piɔ̈ɔ̈th, bï aa rëër ke week athɛɛr,

¹⁷ yen aye Wëi yic: Raan cï duëërë dɔm ë kɔc ke piny nɔm, luɔi kën kek e tïŋ, ku cïkï ŋic aya: ku ŋiɛckï week, ee rëër ke week, ku abï nu ë weyiic.

¹⁸ “We cä bï nyääŋ piny ke we ye abɛɛr: yɛn bï lɔ bɛ̈n tëde week.

¹⁹ Ë döŋ ke ye tëthiinakäŋ, ke kɔc ke piny nɔm ke ke cïï a bï bɛ tïŋ: ku wek ee ya tïŋ: pïïr piëër ɛn, yen abä wek pïïr aya.

²⁰ Ëköölë abäk ŋic nɔn nuö yɛn ë wääric, ku nɔn nuö wek ë yayic, ku nuö ë weyiic.

²¹ “Raan gam lööŋ cï ke thɔ̈n ɛn, ku muk keek, yen aye raan nhiaar ɛn: ku raan nhiaar ɛn abïï Wäär nhiaar, ku abä nhiaar aya, aguɔ rɔt nyuöth en.”

²² Go thiëëc ë Judath (acie Yithkariɔt) an, “Bɛ̈nydït, ee kaŋö kë bï yïn rɔt nyuöth wook, ku cïï rɔt bï nyuöth kɔc ke piny nɔm?”

²³ Go Yecu bɛ̈ɛ̈r, yöök an, “Të nhiɛɛrë raan ɛn, ka bï wëlkï muk: go Wäär nhiaar, agoku bɛ̈n të nu yen, rëërku në yen ëtök.

²⁴ Raan cïï a nhiaar, ka cïï wëlkï ee döt: ku jam piɛŋkï acie këdï, ee jam ë Wäär raan ë toc ɛn.

²⁵ Kakë acä ke lɛ̈k week, të ŋuɔɔt ɛn ke ya rɛ̈ɛ̈r wo week.

²⁶ Ku Raan ee kɔc muk piɔ̈ɔ̈th, yen aye Wëidït ɣer, Wëi bïï Wäär tooc në rinkï, yen abï we wɛ̈ɛ̈t ë këriëëc ëbɛ̈n, ago we tɔ tak wenïïm ë ka cä lɛ̈k week kedhie.

²⁷ “Mät en anyäŋ week, mändï en agäm week: miɔ̈c miaac ɛn week, acïï cït man ë miɔ̈c ee kɔc ke piny nɔm we miɔɔc. Duökï wepiɔ̈ɔ̈th tɔ jeth, ku duökï wepiɔ̈ɔ̈th tɔ riɔ̈c.

²⁸ Acäk piŋ nɔn cän e lɛ̈k week an, ‘Yɛn jël, ku yɛn bï lɔ bɛ̈n tëde week.’ Tëë we nhiaar ɛn, adï cäk piɔ̈ɔ̈th miɛt, nɔn cän e lueel an, ‘Yɛn lɔ tëde Wäär.’ Wäär awär ɛn e dït.

²⁹ Ku ënɔɔnë, acä kɔn lɛ̈k week të ŋoot en ke kën guɔ tïc, na miäk, të tïc en, ke we bï gam.

³⁰ Ëlë, yɛn cïï bï bɛ jam wo week arëët: bɛ̈ny ceŋ pinyë nɔm abɔ̈, ku acïn këdɛn nu tëde yɛn,

³¹ ku luɔi bï kɔc ke piny nɔm e ŋic nɔn nhiaar ɛn wäär, ku acït man cï Wäär a thɔn, en aluɔɔi. “Jatkï röt, jëlku eenë.