Jɔn 13 - JAM DE NHIALIC 2011

Yecu Awak Kɔckɛn ë Piööcë Cök

¹ Na wën, aŋoot Dhuëëŋ ë Winythok wei, ke ŋic Yecu nɔn cï köölde bɛ̈n, kööl bï en jäl piny le tëde Wun, ku nhiëër nhiɛɛr en kɔckɛn nu ë piny nɔm, yen aa nhiɛɛr en keek athöökë käŋ.

² Na wën, aa cäm kɔc thëën, ku jɔ jɔŋdït rac jam guɔ tääu ë Judath piɔ̈u, Judath Yithkariɔt wën ë Thimon an, bï e nyiɛɛn.

³ Ku ŋic Yecu nɔn cï Wun käŋ tääu ë yecin kedhie, ku ŋic nɔn ë bïï yen tëde Nhialic, ku nɔn le yen tëde Nhialic.

⁴ Go rɔt jɔt të ë ciëm en, ku bïï alulutde bei, go lupɔ ee coth muk, duut ë yeyic.

⁵ Na wën, ke luuŋ pïïu ë abïny yic, ku jɔ kɔcpiööcë waak cök, ago ke coth cök në lupɔ wën cï duööt ë yeyic.

⁶ Go bɛ̈n tëde Thimon Petero, go Petero thiëëc an, “Bɛ̈nydït, wak a cök?”

⁷ Go Yecu bɛ̈ɛ̈r an, “Kë luɔɔi akuc ënɔɔnë, abä ŋic tei wadäŋ.”

⁸ Go Petero lueel an, “Yïn cïï abï waak cök anandu!” Go Yecu bɛ̈ɛ̈r an, “Të cän yïn wak, ka cïn këduön nu ë këdï yic.”

⁹ Go Thimon Petero lueel an, “Bɛ̈nydït, acie a cök kapäc kek wak, wak a cin ayadäŋ ayïk a nɔm!”

¹⁰ Go Yecu yɔ̈ɔ̈k an, “Raan cä waak, acïn tëdak ë ye, ee wɛ̈k bï e waak cök etök, ku cï guöp ɣɛɛr ëbɛ̈n: ku week, wek ɣer, ku acie week wedhie.”

¹¹ Aa ŋic raan bï e nyiɛɛn, en aa lueel en en an, “We cïï ɣer wedhie.”

¹² Na wën, aacï ke waak cök, ke be alulutde nööm, ku nyuuc, go ke thiëëc an, “Ŋiɛckï kë cä luöi week?”

¹³ “Wek ee ya tɔ ye Bɛ̈ny ee wëët, ku Bɛ̈nydït, ee yic en luɛlkï, ee kakï.

¹⁴ Ku ënɔn cän week waak cök, ku ya Bɛ̈nydït ku bɛ̈ny ee wëët, ku ënɔɔnë, week ayadäŋ we duëër wecök dhil waak wapäc, ye ŋɛk ŋɛk waak cök.

¹⁵ We cä nyuöth luɔi bäk dɔmic, luɔi bäk aa looi, acït man cän e luöi week.

¹⁶ Wek yɔ̈ɔ̈k ë yic an, lïm acïï bɛ̈nyde ee wöör ë dït, ayï raan cï tooc, acïï raan ë toc en wär.

¹⁷ Të ŋiɛc wek kakë, thieithieei week të ya wek keek looi!

¹⁸ “Yɛn cïï jam ë këdun wedhie: yɛn ŋic kɔc cä lɔc: ku këcïgɔ̈ɔ̈r abï dhil aa yic an, ‘Raan cam kuïn ke yɛn ëtök yen aa luui yɛn ater.’

¹⁹ Ku ënɔɔnë wek lɛ̈k käŋ të ŋoot kek ke ke kën tïc, na miäk, të cï kek guɔ tïc, ke we bï gam nɔn ‘Ee Yɛn En.’

²⁰ Wek yɔ̈ɔ̈k ëyic an, “Raan gam raan bä tooc, ka gam ɛn, ku raan gam ɛn, ka gam raan ë toc ɛn.”

Yecu Acaar Luɔi bï ë Yen Nyiɛɛn

²¹ Na wën, acï Yecu kakë lueel, ke jɔ piɔ̈u jiɛth, ku lëk keek an, “Wek yɔ̈ɔ̈k ëyic an: Raan tök ë week abï a nyiɛɛn.”

²² Go kɔcpiööcë röt woi, akuckï raan lueel.

²³ Ku ade raan rɛ̈ɛ̈r tëde cäm ke kɛn rɔt ë Yecu yɔu, ee raan töŋ ë kɔckɛn ë piööcë yiic, raan nhiɛɛr Yecu.

²⁴ Ago Thimon Petero raanë nieu ku lueel an, “Luɔpë eeŋa yen jiɛɛm en ë këde?”

²⁵ Go raan wën kɛn rɔt ë Yecu yɔu go thiëëc an, “Bɛ̈nydït eeŋa?”

²⁶ Go Yecu bɛ̈ɛ̈r an, “Ye kï, raan bän kuïn juɔɔl, ku gäm en.” Na wën, aacï kuïn juɔɔl, ke gëm Judath Yithkariɔt, wën ë Thimon.

²⁷ Ku të cï en kuïn nööm, ke Catan lɔ ë yepiɔ̈u. Go Yecu yɔ̈ɔ̈k an, “Na de kë bä looi, ke dap looi!”

²⁸ Ku acïn raan në kɔc rɛ̈ɛ̈r tëde cäm raan ŋic kë lueel en ee kënë.

²⁹ Ku në luɔi ciɛthë Judath ke athep ë wëu, aye kɔc kɔ̈k lueel an, cï Yecu yiɛ̈n lɛ̈k en an, ɣɔc ka kɔɔrku tëde Dhuëëŋ, ku nɔn bï en kɔc kuanynyïïn yiɛ̈n miɔɔc ë käŋ.

³⁰ Na wën, aacï kuïn nööm, ke lɔ biic ënɔnthiinë: ku piny ee wakɔ̈u.

Löŋ cï Piac Mac

³¹ Të cï en guɔ jäl, ke lueel Yecu an, “Wën ë Raan acï gäm dhuëëŋ ënɔɔnë, ku gëmë Nhialic dhuëëŋ në yen.

³² Ku të cï Nhialic gäm dhuëëŋ në yen, ke Nhialic abï Wën ë Raan gäm dhuëëŋ ë yenguöp aya, ku abï dap gäm dhuëëŋ ënɔnthiinë.

³³ Week mïththiikë, ë döŋ ke ye tëthiinakäŋ të rɛ̈ɛ̈r ɛn wo week. We bï a kɔɔr: ku acït man cän e lɛ̈k Judai an, ‘Të la yɛn thïn, ke we cïï duëër bɛ̈n, yen alɛ̈k week ënɔɔnë.’

³⁴ Wek thɔ̈n cöök cï piac lueel an, Nhiaarkï röt, acït man cän week nhiaar, ke we bï röt nhiaar wapäc ayadäŋ.

³⁵ Yen abï kɔc e ŋic kedhie nɔn aa wek kɔckiën ë piööcë, të nhiaar wek röt wapäc.”

Yecu Acaar Jiɛi de Petero

³⁶ Go Thimon Petero thiëëc an, “Bɛ̈nydït, ee tënou bï yïn lɔ?” Go Yecu bɛ̈ɛ̈r an, “Të la yɛn thïn, yïn cïï a duëër kuany cök ënɔɔnë, yïn bï a kuany cök wadäŋ.”

³⁷ Go Petero lueel an, “Bɛ̈nydït, eeŋö cän yï duëër kuany cök ënɔɔnë? Yɛn bï wëikï gaam ë biäkdu!”

³⁸ Go Yecu bɛ̈ɛ̈r an, “Bä wëiku gaam ë biäkdï? Yïn yɔ̈ɔ̈k ëyic an, thɔn ajïth acïï bï kɔn kiu, të ŋoot yïn ke yï kën a jai raandiäk.”