Jɔn 10 - JAM DE NHIALIC 2011

Kääŋ de Tïït

¹ Wek yɔ̈ɔ̈k ë yic an, “Raan cïï tëk ë agäu thok le agän ë thökkic, ku kɛɛc ë gäu nɔm ë baŋ däŋ, yen aye cuɛ̈ɛ̈r, raan ë käŋ kual.

² Ku raan tëk ë agäu thok, yen aye tïn ë thök.

³ Raan tit agäu thok ee agäu tuɛ̈ɛ̈r en, go thök rölde piŋ: go thök ke yenguöp cɔɔl në rinken, ku jɔ ke tɔ lɔ biic.

⁴ Ku të tɔ en thök ke yenguöp lɔ biic, ke jɔ lɔ ë kenïïm tueŋ, ku kuɛny thök cök, luɔi ŋic kek rölde.

⁵ Ku acïkï raan lei duëër aa kuany cök ananden, abïk aa kat ëye, luɔi kuc kek röl ë kɔc lei.”

⁶ Kääŋë aa lëkë Yecu keek: gokï jam ë lëk keek cuö yökic.

Yecu ee Tïn Piɛth

⁷ Go Yecu ke bɛ yɔ̈ɔ̈k an, “Wek yɔ̈ɔ̈k ëyic an, Yɛn ee agäu thok, agäu ë thök.

⁸ Kɔc cï kɔn bɛ̈n ë yanɔm tueŋ kɔc kedhie, ayek cuɛ̈ɛ̈r, kɔc ee kual, ago thök këden cuö piŋ.

⁹ Yɛn ee agäu thok: raan tëk le thïn në yɛn, ka bï kony wëi, go ya lɔ thïn ku le biic, ago wal aa yök.

¹⁰ Cuɛ̈ɛ̈r acïn däŋ ee bïï yen, ee kuël etök, ku nääk, ku riääk de käŋ: yɛn aa bɔ̈ luɔi bï kek dɛ pïïr, abïk kuɛth ë ye.

¹¹ Yɛn ee tïn piɛth tïn ë thök: ku tïn piɛth ee wëike gaam në baŋ de thök.

¹² Ku raan cï kïïr, ku cie tït, thök acïkï ee ka ke yen, ee aŋuï tïŋ, go thök nyääŋ piny, ku kɔt, go aŋuï thök gɔp, thiëi ke:

¹³ ee kat, luɔi ee yen raan ë kïïr tei, ku acïn këde thïn ë thök yiic.

^14-15 Yɛn ee tïn piɛth, tïn ë thök, ku ŋiɛc kakï, ku yɛn ŋic kakï, acït man ŋic ë Wäär yɛn, ku ŋiɛc Wäär, ku yɛn ee wëikï gaam në baŋ de thök.

¹⁶ Ku yɛn de thök kɔ̈k cie ka ke a gänë: kek ayadäŋ abä ke dhil bɛ̈ɛ̈i, agokï röldï piŋ, agokï ya luny tök, ku tïn tök.

¹⁷ Yen a nhiɛɛrë Wäär ɛn, luɔi gam ɛn wëikï, ke ke bä bɛ kuany nïïm.

¹⁸ Acïn raan cï ke nööm tëde yɛn, ee yɛn ë gɛm keek yatök. Yɛn cath wo riɛl bän ke gaam, ku dɛ riɛl bän ke kuany nïïm aya. Thönë aa yɔ̈k tëde wäär.”

¹⁹ Ago Judai teer bɛ gɔl ë biäk de wëlkë.

²⁰ Aa lueel kɔc juëc an, “Ade guöp jɔŋ rac! Ka ye miɔ̈l! Eeŋö piɛŋ wek këde?”

²¹ Ku lueel, kɔc kɔ̈k an, “Kakë acïkï ee wël ke raan de guöp jɔŋ rac. Jɔŋ rac duëër cɔɔr liep nyin?”

Yecu acï Rɛɛc

²² Ku nu dhuëëŋ ë Jeruthalem, Dhuëëŋ de kööl cïï Luaŋdït gäm Nhialic:

²³ ku piny ee rut. Ku Yecu aa cath ë gɔ̈ɔ̈lic göl ë Tholomon në Luaŋdïtic.

²⁴ Na wën, ke Judai ke ke bɔ̈ geeukï cil, yöökkï an, “Bä wo tɔ wiël ë kaamic ananda? Na yee Kërtho, ke lɛ̈kë wook abuk piŋ.”

²⁵ Go Yecu pɔ̈k nɔm keek an, “Acä lɛ̈k week, ku cäkï gam: ka ya looi në rin ke Wäär, kek aye cäätɔdï.

²⁶ Ku acäkï gam, luɔi cä wek e thökkï, cït man wën cän e lɛ̈k week.

²⁷ Thökkï ayek röldï piŋ, ku aŋiɛc keek, ku yek a kuany cök:

²⁸ aguɔ ke miɔɔc në pïïr athɛɛr, ku acïkï bï määr athɛɛr, ku acïn raan bï kek gɔ̈p bei ë yaciin.

²⁹ Wäär, raan ë gëm ke yɛn, adït awär jäŋ ëbɛ̈n: ku acïn raan duëër ke gɔ̈p bei ë Wäär ciin.

³⁰ Wook wokë Wäär wok ee tök.”

³¹ Go Judai kur bɛ kuany piny, lek biɔ̈ɔ̈k.

³² Go Yecu bɛ̈ɛ̈r an, “Luɔi piɛth juëc acä ke nyuöth week luɔi cä yök tëde Wäär, ee biäk de luɔi you ë biɔ̈ɔ̈k wek ɛn ë keyiic?”

³³ Go Judai bɛ̈ɛ̈r an, “Acie biäk de luɔi piɛth en ë biöök wok yïn ee biäk de län ee yïn Nhialic lat, ku luɔi ee yïn rɔt tɔ ye Nhialic, ku ye raan tei!”

³⁴ Go Yecu bɛ̈ɛ̈r an, “Kënë gɔ̈ɔ̈r ë löŋdunic an, acï ë Nhialic lueel an, ‘Wek ee yiëth.’

³⁵ Ku të cï en keek tɔ ye yiëth, kek kɔc ɣɔn bïï jam ë Nhialic tëde keek (ku këcïgɔ̈ɔ̈r acï duëërë dhɔ̈ŋic).

³⁶ Na raan cïï Nhialic tɔ ɣer piɔ̈u, ago tuɔɔc ë piny nɔm, bäk yɔ̈ɔ̈k an, “Yïn ë Nhialic lat, në luɛ̈l cän e lueel an, Yɛn ee Wën ë Nhialic?

³⁷ Të kɛ̈n ɛn luɔi de Wäär aa looi, duökï ya gam.

³⁸ Ku të luɔɔi ɛn en, ciɛk an, rɛɛckï ya gam, ke we gam luɔi, ke bäk ŋic, ku gamkï, nɔn nu Wäär ë yayic, ku nuö ë yeyic.”

³⁹ Agokï bɛ kɔɔr luɔi dɔm kek en: go poth ë kecin.

⁴⁰ Ku be jäl le ë Jordan nɔm lɔŋtui, le të wään kɔn ë Jɔn kɔc baptith thïn, le rëër ëtɛ̈ɛ̈n.

⁴¹ Go kɔc juëc bɛ̈n të nu yen luelkï an, “Jɔn acïn gök cï looi: ku käŋ kedhie kak ë lueelë Jɔn në këde raanë acïk aa yith.”

⁴² Go kɔc juëc këde gam ëtɛ̈ɛ̈n.