Jɔn 1 - JAM DE NHIALIC 2011

Jam de Pïïr

¹ Të ɣɔn thɛɛr gɔlë käŋ Jam aa nu, ku nu Jam kekë Nhialic, ku Jam yen aye Nhialic.

² Yen guöp aa nu ke Nhialic të ɣɔn gɔlë käŋ.

³ Käŋ kedhie yen aa cak keek, ku acïn kë cï cak ke liiu yen thïn.

⁴ Yen aa de yic pïïr, ku pïïrë aaye ɣɛɛrëpiny ë kɔc.

⁵ Ku ɣɛɛrëpiny aaye riau tëcol, ku aacïï cuɔlëpiny ë tïŋ.

⁶ Ade raan ë tooc Nhialic, raan cɔl Jɔn.

⁷ Aa bɔ̈ ke ye cäätɔ, bï kɔc bɛ̈n lɛ̈k ɣɛɛrëpiny, bï kɔc kedhie ya gam në liemde.

⁸ Acie yen ee ɣɛɛrëpiny, aa bɔ̈ bï kɔc bɛ̈n lɛ̈k ɣɛɛrëpiny.

⁹ Ɣɛɛrëpiny yic ka, ɣɛɛrëpiny ë raan riaau ëbɛ̈n, raan ëbɛ̈n ë piny nɔm.

¹⁰ Aa nu ë piny nɔm, ku yen aa cak piny, ku aa kuc piny.

¹¹ Aa bɔ̈ tëde kɔcke, ago kɔcke ye cuö gam.

¹² Ku kɔc cï gam, kek aa miɔc ë riɛl bïk aa mïth ke Nhialic, kek kɔc gam rinke:

¹³ Kɔc kënë dhiëëth ë riɛm, ku kënëke dhiëëth ë këde guöp, ku kënë ke dhiëëth ë këde piɔ̈n ë moc, aake dhiëëth Nhialic.

¹⁴ Ago Jam aa guöp, ku tɔ̈u ë woyiic (agoku dhuëëŋde tïŋ dhuëëŋ cït dhuëëŋ ë Wën töŋ cïï Wun dhiëëth etök), acï piɔ̈u thiäŋ ke dhuëëŋ ku yic.

¹⁵ Jɔn aaye cäätɔ de yen, ago cööt an, “Raan wään aa yɛn këde lueel kï, an, ‘Raan bï bɛ̈n ë yacök, yen anu ë yanɔm tueŋ: ë luɔi ee yen ë kɔn nu në yɛn.”’

¹⁶ Ku në kuɛth cï en kuɛth yen acï wok käŋ yök wodhie, ayï dhuëëŋdepiɔ̈u dhuëëŋ cï rɔt ŋuak.

¹⁷ Löŋ aa gëmë Mothe, ku dhuëëŋdepiɔ̈u ku yic aake bɔ̈ në Yecu Kërtho.

¹⁸ Acïn raan cï Nhialic kɔn tïŋ ëkööl tök, ee Wën töŋdɛn cï dhiëëth etök, Wën nu ë Wun yɔu, yen aa nyuuth en.

Wɛ̈ɛ̈t de Jɔn Baptith

¹⁹ Jam ë lueel Jɔn kï, ɣɔn toocë Judai bäny ke ka ke Nhialic ku Lebii, toockï keek Jeruthalem lek thiëëc an, “Ee yïn ŋa?”

²⁰ Ago lɔ gam, ku cïï jai, gɛm an, “Yɛn cie Kërtho.”

²¹ Agokï thiëëc an, “Ka ye ŋa? Ye Elija?” Go, yen an, “Ei, yɛn cie Elija.” Gokï thiëëc an, “Ka ye tiët wäänë?” Go bɛ̈ɛ̈r, jiɛi an, “Ei.”

²² Agokï bɛ thiëëc an, “Ku ee yïn ŋa? Luɔi bï wok e lɔ lɛ̈k kɔc ë toc wook. Ka yïn, jɔ aa ŋa?”

²³ Go lueel an, “Yɛn ee röl ë raan cöt ë jɔ̈ɔ̈ric, Riëckï kueer ë Bɛ̈nydït, acït man cï ë tiët Yithaya ye lueel.”

²⁴ Ku kɔc wään cï tooc aake ye kɔc ke Parithai.

²⁵ Agokï thiëëc an, “Eeŋö ee yïn kɔc baptith, të cïï yïn ë Kërtho, ku cïï ye Elija, ku cïï ye tiët wäänë?”

²⁶ Go Jɔn puk nɔm an, “Yɛn ee kɔc baptith në pïïu: ku ade raan kääc ë weyiic cil, raan kuöckï,

²⁷ yen ee raan bɔ̈ ë yacök, raan nu ë yanɔm tueŋ, raan cän röŋ wokë luɔi duɛ̈ɛ̈r ɛn thiön ë waarde dɔ̈k.”

²⁸ Kakë aake loi ë Bethani ë Jordan nɔm lɔŋtui, të wään ee Jɔn kɔn baptith thïn.

Amɛthɔ̈k de Nhialic

²⁹ Na ɣɔn amiäk, ke Jɔn tïŋ Yecu ke bɔ̈ tëde yen, go lueel an, “Wɔikï, Amɛthɔ̈k de Nhialic kï, anyiɛɛi kërɛɛc de piny nɔm!

³⁰ Ye kï, yen raan wään aa yɛn këde lueel an, ‘Ade raan bɔ̈ ë yacök, raan nu ë yanɔm tueŋ, ë luɔi ee yen ë kɔn nu ë yɛn.’

³¹ Ku aa kuöc guöp, ku luɔi bï e ŋic ë Yithriɛl, yen aa bä yɛn, bä kɔc bɛ̈n baptith në pïïu.”

³² Go Jɔn këde lueel an, “Yɛn aa tïŋ Wëidït ke ke bɔ̈ nhial ke cït guöp guuk, bï ku rëër ë yenɔm.

³³ Ku aa kuöc guöp: ku raan ë toc ɛn bä kɔc bɛ̈n baptith në pïïu, yen aa lëk e yɛn an, ‘Raan bä tïŋ abï Wëidït piny bïk ku rëërkï ë yenɔm, yen aye raan bï kɔc aa baptith ë Wëidït ɣer.’

³⁴ Go Jɔn lueel an acä guɔ tïŋ, “Ku ja lɛ̈k kɔc an, kënë ee Wën ë Nhialic.”

Kɔcpiööcë Tueŋ ë Yecu

³⁵ Na ɣɔn amiäk, ke Jɔn be kɔ̈ɔ̈c kekë kɔckɛn ë piööcë kaarou,

³⁶ go Yecu woi guöp të ciɛth en, go lueel an, “Wɔikï Amɛthɔ̈k de Nhialic kï!”

³⁷ Go kɔc piööcë kë kaarou gokï piŋ, të jiɛɛm en, agokï Yecu kuany cök.

³⁸ Go Yecu liec, ago ke tïŋ akuanykï e cök, ku jɔ ke thiëëc an, “Eeŋö kaarkï?” Gokï lueel an, “Rabi (yen aye Bɛ̈ny ë wëët, në thoŋda) an, “Rɛ̈ɛ̈rë tënou?”

³⁹ Go ke yɔ̈ɔ̈k an, “Bäk tiëŋkï.” Gokï bɛ̈n ku tïŋkï të rëër en thïn, ku jɔkï cool ë yen ëköölë: të wään le kek aa cït thaar kathiëër.

⁴⁰ Raan tök ë keek kaarou, kɔc wën piŋ jam de Jɔn ku kuanykï Yecu cök, acɔl Andereya, mänhë ë Thimon Petero.

⁴¹ Go Thimon mänhë guöp kɔn yök, ku lëk en, an, “Wok ë Mathia yök (yen aye Kërtho, në thoŋda).

⁴² Go bɛ̈ɛ̈i tëde Yecu. Go Yecu woi guöp, ku lueel an, “Yïn Thimon, wën ë Jona: yïn bï cɔɔl Kepath.” (Yen aye Petero, ku ye “kuur” në thoŋda.)

Yecu Acɔl Pilip ku Nathanyel

⁴³ Na ɣɔn amiäk, ke Yecu de piɔ̈u jäl le Galili, ago Pilip yök: ku jɔ lɛ̈k en an, “Kuany a cök.”

⁴⁴ Ku Pilip ee raan ë Bethaida, ee pänydït, paan ë yï Andereya kekë Petero.

⁴⁵ Go Pilip Nathanyel yök, ku jɔ lɛ̈k en an, “Wok ë raan yök, raan cï Mothe këde gɔ̈ɔ̈r ë löŋic, ayï tït, Yecu de Nadhareth, wën ë Jothep.”

⁴⁶ Go Nathanyel thiëëc an, “Duëër kapiɛth bɛ̈n bei ë Nadhareth?” Go Pilip lueel an, “Bä tïŋ.”

⁴⁷ Na wën, ke Yecu tïŋ Nathanyel ke bɔ̈ tëde yen, go lueel an, “Wɔikï, raan ë Yithriɛl ëgɔk ka, raan cïn yäc ruëëny!”

⁴⁸ Go Nathanyel thiëëc an, “Ë yï ŋic ɛn tënou?” Go Yecu bɛ̈ɛ̈r an, “Wään ŋoot Pilip ke kën yïn cɔɔl, wään rëër yïn ë ŋaap thar, yïn ë cä tïŋ.”

⁴⁹ Go Nathanyel bɛ̈ɛ̈r, lueel an, “Rabi, yïn ee Wën ë Nhialic! Ku yïn ee Melik de Yithriɛl!”

⁵⁰ Go Yecu bɛ̈ɛ̈r, lueel an, “Nɔn cän e lɛ̈k yïn, Yïn ë tiëŋ ë ŋaap thar, yen aa gëm yïn? Yïn bï kadït tïŋ kawär kakë.”

⁵¹ Ago lɛ̈k en an, “Yïn yɔ̈ɔ̈k ë yic an, “Wadäŋ, we bï paannhial tïŋ aɣɔ̈ɔ̈r, ku tiëŋkï tuucnhial ke Nhialic ke ke lɔ nhial ku bïkkï piny në Wën ë Raan nɔm.”