Jeremia 9 - JAM DE NHIALIC 2011

¹ Aa ya nhiaar duëër nɔmdï aa yinh ë pïïu, ku jɔ nyïïnkï aa awɛɛŋ ke pïïu, aguɔ aa dhiau aköl ku wakɔ̈u në biäk de kɔckiën cï nɔ̈k.

² Aa ya nhiaar duëër nɔm dɛ të duëër ɛn ceŋ ë jɔ̈ɔ̈ric, të bä yɛn mɛc wo kɔckï. Ayek kɔc cïn adöt ëbɛ̈n, kuut de kɔc ee kɔc nyiɛɛn.

³ Ayek röt kiëët në tör de lueth, ruëëny ë nyin de yicic yen amac piny. Aye Bɛ̈nydït lueel an, “Kɔckï ayek kërac looi ku cuthkï ë luɔi, ku acïkï Yɛn ee ŋic nɔn Yan Nhialicden.”

⁴ Ŋɛk abï rɔt dhil aa tiit ë mɛ̈thëde, ku ë cïn raan ŋäth mänhë, në biäk cï kɔc ëbɛ̈n mɛth looi cï Jakop, ku raan ëbɛ̈n ee mɛ̈thë jääm guöp.

⁵ Raan ëbɛ̈n ee raan thiëëk kek math, ku acïn raan ee yic lueel, acïk liëpken wɛ̈ɛ̈t bïk aa jam ë lueth, ayek awɛ̈ɛ̈c looi, ku ayek gup ŋɛɛr bïk kepiɔ̈ɔ̈th puk.

⁶ Ku jɔkï yaaŋ kut nɔm, ku kutkï mɛth nɔm, acïk jaai bïk A ŋic.”

⁷ Në biäk de ee kënë acï Bɛ̈nydït de rɛm lueel an, “Yɛn bï kɔckï lëëŋ cï wëëth, ku thɛm keek. Kɔckï acïk kërac looi, eeŋö däŋ duëër luöi keek?

⁸ Liëpken acïtkï wiɛth ke dhɛ̈ŋ ee kɔc nɔ̈k, ayek lueth lueel aköölnyïïn. Raan ëbɛ̈n ee mɛ̈thë jääm apiɛth, ku ee wïn ë dɛ̈p yen deep en en.

⁹ Cä keek duëër luöi këtuc ë biäk de ee kakë? Cä rɔt duëër guöör ë jur cït ee kënë? Acä lueel, Yɛn Bɛ̈nydït.”

¹⁰ Acä lueel, an “Yɛn bï kur dhiëëu ku dhiaau në biäk de ɣään ke nyuäth, në biäk cï kek ril wei, ku cïn raan ee cath ë keyiic. Röl de ɣɔ̈k acie bɛ piŋ, diɛt ku läi roor acïk kat ku jiëlkï.”

¹¹ Aye Bɛ̈nydït lueel an, “Yɛn bï Jeruthalem tɔ e dhuur de ka cï riääk, të bï kɔ̈ɔ̈rgɔl aa ceŋ thïn, pɛ̈ɛ̈nydït ke Juda abïk aa jɔ̈ɔ̈r, të cïn raan bï rëër thïn.”

¹² Guɔ lop an, “Bɛ̈nydït, eeŋö jɔ piny riääk ku jɔ riɛl abïï ciët jɔ̈ɔ̈ric, ka cïn raan ee cath thïn? Eeŋa pelnɔm arëët bï ee kënë yökic? Eeŋa cï nyuöth en ago lɔ wɛ̈ɛ̈ric kɔc kɔ̈k?”

¹³ Go Bɛ̈nydït bɛ̈ɛ̈r an, “Kënë aa loi rɔt në biäk cïï kɔckï wëët cä gäm keek nyääŋ piny. Akënkï ya riëëu, ku akënkï kë cä lëk keek riëëu.

¹⁴ Acïk nïïm riɛl, ku jɔkï yiëth ke Baal lam cït man cï kuarken keek wɛ̈ɛ̈t bïk aa looi.

¹⁵ Ka ënɔɔnë jakï kë bä looi piŋ, Yɛn Bɛ̈nydït de rɛm, Nhialic de Yithriɛl. Yɛn bï kɔckï gäm wɛ̈ɛ̈l kec bïk cam, ku gäm ke wurïï bïk dek.

¹⁶ Abä keek thiäi ë juööriic, juöör kënkï kɔn piŋ, ku kën ë kuarken ke kɔn piŋ, ku yɛn bï rem de tɔŋ tuöc keek agut të bïï ë keek riɔ̈ɔ̈k taitai.”

Kɔc ke Yithriɛl Adhiëëukï kuɔɔny

¹⁷ Acïï Bɛ̈nydït de rɛm lueel an, “Ye kë loi rɔt looi tak! Calkï kɔc ee dhiau bïk bɛ̈n, calkï diäär ee din ë dhiëëu kiit.”

¹⁸ Go kɔc lueel an, “Lëkkï keek bïk dap bɛ̈n bïk din ë dhiëëu bɛ̈n kɛ̈t wook, agut të bï wok nyïïn löny në pïïu, ku wac nhïm ke wonyïïn në pïïu ke dhiëëu.”

¹⁹ Piɛŋkï röl ë dhiëëu ë Dhiɔn an, Wok cï riääk! “Wok cï jɔ riääk taitai! Wok bï pinyda dhil nyääŋ piny, ɣöötkuɔ acï keek thuöör piny.”

²⁰ Aguɔ lueel an, “Piɛŋkï kë lueel Bɛ̈nydït wek diäär, ku yak wëlke yökiic. Wɛ̈ɛ̈tkï duetkun ë dhiëëu, ku wɛ̈ɛ̈tkï määthkun ë diɛt ke dhiëëu.

²¹ Thuɔɔu acï bɛ̈n thïn në awëërkuɔ nyïïn, ku le ë ɣöötkuɔn ke bääny yiic, acï mïth dhuɔŋ piny ë kuɛɛr yiic, ku dhoŋ dhuök piny ë ɣään ke ɣööc yiic.

²² Gup ke kɔc cï thou acïk wɛɛr piny ëbɛ̈n, cï kuut de tiɔɔm awäi domic, cï rɛɛp cï tem ku nyiëëŋ ë ke piny ë kɔc ee tem, rɛɛp cïn raan ee ke määt yiic. Kënë lëkë Bɛ̈nydït yɛn ka bä bɛ̈n lueel.”

²³ Aye Bɛ̈nydït lueel an, “Kɔc pelnïïm ë ke cïï röt ee leec në pɛlënɔmden, ku kɔc ril ë ke cïï röt ee leec ë riɛlden, ku kɔc kueth ë ke cïï röt ee leec ë kuɛthden.

²⁴ Na kɔɔr raan bïï rɔt lɛɛc, në ë leec rɔt në luɔi cï yen Yɛn ŋic, ku cï kakï yök yiic, në biäk tɔ̈u ë nhiëërdiën agɔk ke yen, ku Yɛn ee yic kekë piathëpiɔ̈u looi. Kek kak ee Yɛn tɔ mitpiɔ̈u ka. Acä lueel, Yɛn Bɛ̈nydït.”

²⁵ Aye Bɛ̈nydït lueel an, “Akööl abïkï, kööl bän kɔc cï cueel, ayï kɔc kën ë cueel luöi këtuc.

²⁶ Kɔc ke Rip, ku Juda, ku Edom, ku wɛ̈ɛ̈t ke Ammon, ku Mowap, ku kɔc ee rëër ë jɔ̈ɔ̈ric kedhie, kɔc ë nhïmken tem nïïm, kek e juöörkë kedhie akënë keek cueel, ku baai de Yithriɛl ëbɛ̈n akën ë keek cueel piɔ̈ɔ̈th.”