Jeremia 8 - JAM DE NHIALIC 2011

¹ “Në ee köölë yom ke meliik ke Juda ku yom ke bänyken, ku yom ke bäny de kakë Nhialic, ku yom ke tït ke Nhialic, ku yom ke kɔc ke Jeruthalem ëbɛ̈n, abïï keek wɛ̈t bei ë rɛ̈ŋken yiic.

² Ku abïï keek thieth në akɔ̈l nɔm kekë pɛɛi ku në rem de paannhial nɔm ëbɛ̈n, kɔc cï keek nhiaar ku luuikï keek, ku kuanykï keek cök, kɔc cïk gam ku lamkï, acïï keek bïï määtiic ku cïï keek tɔ̈ɔ̈u, abïk ciët wär ke ɣɔ̈k piny.

³ Ku kɔc cï döŋ ke ke pïïr, kɔc ke jur rɛɛcë, kɔc rɛ̈ɛ̈r ë ɣään cän keek thiäi thïn, abïk thuɔɔu aa ŋuöön në pïïr pïïr kek. Acä lueel, Yɛn Bɛ̈nydït de rɛm.”

Kërac ku Këtuc

⁴ Go ë Bɛ̈nydït lɛ̈k yɛn, bä lɛ̈k kɔcke an, “Të cïï raan wïïk, cïï rɔt ee bɛ jat nhial? Ku të cïï raan kueer mɔ̈ɔ̈r, cïï rɔt ee pɔ̈k ciëën?

⁵ Eeŋö kɔckï, kë yal wek röt wei në Yalɔ̈ɔ̈m, ku cäkkï röt be pɔ̈k Ɛn? Wek cï nuɛt ë yiëthkun kɔ̈ɔ̈th, ku jaikï në baŋ bä wek röt pɔ̈k Ɛn.

⁶ Yɛn cï Yayïth këët, ku wek kën yith lueel. Acïn raan tök në weyiic, raan cï awänyde gam, ku acïn raan tök në weyiic, raan cï lop an, ‘Eeŋö cä wööc?’ Ŋɛk ee cath në cäthde, cït man ë jöŋgör lɔ ë tɔŋic.

⁷ Cakaa diɛt nhial aŋickï thaar ye kek kenïïm puk, ku guök ku amɔ̈r ku jak aŋickï thaar de jäl. Ku kɔckï, wek kuc lööŋ mac Ɛn ke week.

⁸ Eeŋö ya wek e lueel an, pɛlkï nïïm, ku an ŋiɛckï lööŋkï? Tiëŋkï lööŋ acï ke waar yiic në kɔc ee gär cie adööt.

⁹ Röörkuön pelnïïm acï keek tɔ yäär, acïk nïïm mum ku dɔm keek. Acïk jamdï rɛɛc, ee pɛlënɔm ŋö jɔ tɔ̈u ke keek ënɔɔnë?

¹⁰ Yɛn bï duumken gäm kɔc kɔ̈k, ku gäm diëërken röör kɔ̈k. Raan ëbɛ̈n meth ku raandït aye kɔɔr bïï wëu yök në kueer de ruëëny. Ayï tït ke Nhialic ku bäny de kakë Nhialic ayek kɔc math.

¹¹ Ayek käŋ looi abï tëtöök ke kɔckï ciët piär baaŋ. Ayek lueel an, ‘Käŋ apiɛthkï.’ Ku acïn kamit nu.

¹² Kɔckï, ë we kën gup riɔ̈ɔ̈c në biäk cä wek kake ayäär looi? Ei, wek kën gup riɔ̈ɔ̈c taitai, ku wek kuc luöi ye kɔc diɛɛr aya! Ka wek bï wïïk cït man cïï kɔc kɔ̈k wïïk, të lan week lɔ luöi këtuc, kënë yen abï aa thökdun. Acä lueel, Yɛn Bɛ̈nydït.

¹³ “Yɛn kɔɔr bä kɔckï määt yiic, cït man ye raan de dom rap kut nïïm, ku acïk ciët tim de enap cïn nɔm mïth, ku cïtkï tim ë ŋaap cïn nɔm mïth, ayï yïthke acïk biɔɔr. Yeka cän kɔc lei tɔ nöm piny.”

¹⁴ Kɔc ke Nhialic ayek lop an, “Eeŋö rëër wok ë lik? Bäkkï kɔtku ku lokku ë pɛ̈ɛ̈nydït cï gël yiic, buk lɔ thou ëtɛ̈ɛ̈n. Bɛ̈nydït Nhialicda acï wook mäc thuɔɔu, acï wook gäm wurïï buk dek, në biäk cï wok En luöi kërac.

¹⁵ Wok kɔɔr mät ku akööl ke dem, ku aa cïn naamde, ku riɔ̈ɔ̈cdït acï guɔ bɛ̈n.

¹⁶ Kɔc ka aterda acïk guɔ ɣëët pänydïït ë Dan, wok ee ë jöŋgöörken piŋ atïïm. Piny nɔm ëbɛ̈n aye lath të ye jöŋgöörken kac. Kɔc ke aterda acïk bɛ̈n bïk pinyda bɛ̈n riɔ̈ɔ̈k ku ka tɔ̈u thïn kedhie, pänydïïtda ku kɔcke kedhie.”

¹⁷ Aye Bɛ̈nydït lueel an, “Wɔikï piny, Yɛn tooc karɛc ë weyiic, karɛc de thook wurïï cïn wɛ̈ɛ̈l lëu en, ku abïk week kääc.”

Jiɛthëpiɔ̈u ë Jeremia ë Biäk de Kɔcke

¹⁸ Jiɛthëpiɔ̈ndï acï bï waar. Yɛn tɔ̈k piɔ̈u.

¹⁹ Piɛŋkï! Piny yic ëbɛ̈n, Yɛn ee kɔckï piŋ röt ke ke dhiau an, “Cïï Bɛ̈nydït be tɔ̈u ë Dhiɔn? Cïï melikde bï tɔ̈u ëtɛ̈ɛ̈n?” Go Bɛ̈nydït melikden bɛ̈ɛ̈r an, “Eeŋö ta wek Ɛn göth ë lam ë yiëthkun, ku eeŋö ya wek we nïïm guöt piny në yiëth nïïm?”

²⁰ Kɔc ayek dhiau an, “Mäi acï jäl, tëm acï nɔm wan, ku wok kën ë keek luök.”

²¹ Piɔ̈ndï acï dhuɔɔŋ, në biäk cï ë kɔckï dhuɔɔŋ, Yɛn cï dhiau ka yɛn cï yäär taitai.

²² Cïn wal ë baam nu ë Giliyad? Cïn akïm nu ëtɛ̈ɛ̈n? Ka eeŋö kën ë kɔckï tɔ waar?