Jeremia 7 - JAM DE NHIALIC 2011

Jeremia Awɛ̈ɛ̈t ë Luaŋdït Yic

^1-3 Go jam de Bɛ̈nydït bɛ̈n tëde Jeremia, an, “Kääcë ë Luaŋdït thok, ku luel ee jamë ëtɛ̈ɛ̈n, luel an, piɛŋkï jam de Bɛ̈nydït wek röör ke Juda wedhie, kɔc ee lɔ ee ɣönë ku lämkï. Go Bɛ̈nydït de rɛm, Nhialic de Yithriɛl lueel an, “Waarkï kueer luöi wek, ku ka luɔikï keek, ku we bä tɔ pïïr ëtɛ̈ɛ̈n.

⁴ Duökï wël ke mɛthkë ee piŋ an, ‘Wok lɔ läŋ! Kënë ee Luaŋdït! Kënë ee Luaŋdït! Kënë ee Luaŋdït!’

⁵ “Waarkï kueer de pïïrdun, ku duökï kë luɔikï ee looi. Yak röt luööi apiɛth.

⁶ Duökï alɛi ee cam, ku mïth abɛɛr, ku diëër abɛɛr. Ku duökï kɔc cïn gup awɛ̈ɛ̈c ee nɔ̈k ee pinyë. Duökï yiëth kɔ̈k ee lam, kënë abï week riɔ̈ɔ̈k.

⁷ Të la wek röt waar, wek bä tɔ rɛ̈ɛ̈r eenë, piny cä gäm wärkun bïk lɔ̈ɔ̈k lak athɛɛr.

⁸ “Tiëŋkï wek ee wël ke mɛth ŋɔ̈ɔ̈th.

⁹ Wek ee kual, ku näkkï, ku nämkï diäär, ku yak kuëëŋ në lueth, ku nyuöpkï Baal wal ŋïr, ku lamkï yiëth kënkï keek kɔn ŋic ɣɔn thɛɛr.

¹⁰ Wek ee ka maan looi, ku jakkï bɛ̈n aa kɔ̈ɔ̈c në yalɔ̈ɔ̈m ɣöndï, ku luɛlkï an, ‘Wok cï lɔ läŋ!’

¹¹ Yak tak ye ɣöndiën ë Bɛ̈nydït të ye cuɛ̈ɛ̈r thiaan thïn? Yɛn cï kë luɔikï tïŋ.

¹² Lakkï Cilo, të wään bäk kɔn lɔc tueŋ bï ë Yɛn aa lam thïn, ku tiëŋkï kë cä luöi yen në biäk de karɛc ke kɔckï Yithriɛl.

¹³ Wek cï ee karɛckë looi, cakaa nɔn yan we yɔ̈ɔ̈k ë ceŋ, wek cï jamdï rɛɛc. Wek cie gam të caal Ɛn week.

¹⁴ Ku kë cä luöi Cilo, abä luöi ɣöndiën ë Bɛ̈nydït, ɣön yak ŋɔ̈ɔ̈th. Yen të wään bä gäm kuarkun ku gäm week, Yɛn bï kë wääc cä luöi Cilo looi.

¹⁵ Wek bä cuɔp wei në yalɔ̈ɔ̈m, cït man wään cuɔp Ɛn kɔckun, kɔc ke Yithriɛl. Acä lueel, Yɛn Bɛ̈nydït.”

Ciɛ̈n Riëëu de Kɔc

¹⁶ Go Bɛ̈nydït lueel an, “Du läŋ në biäk ee kɔckë Jeremia. Du dhiau, ku du läŋ në biäkden, du jam we Yɛn, në luöi cän këdu bï gam.

¹⁷ Cï kë yek looi ë pɛ̈ɛ̈nydït ke Juda ee tïŋ ayï kë loikï në Jeruthalem?

¹⁸ Mïth ayek tiim lɔ määt yiic, ku loi röör mac, ku jɔ diäär awac nuaai, bï kek kuïn cï pam luöi yanh tiiŋ cɔl Tiiŋ melik Nhial. Ayek miɔ̈c ye poor në mɔ̈u gäm yiëth kɔ̈k aya, në biäk bïï kek Ɛn yiëk buɔ̈t.

¹⁹ Ku ee Yɛn yïkkï buɔ̈t ë yic? Ei, ee kek ayïk röt bɔ̈ɔ̈t kapäc, ku jɔkï ayäär bɛ̈ɛ̈i në kegup.

²⁰ Ka Yɛn Bɛ̈nydït Awärjäŋ, Yɛn bï agönhdï wäl ee Luaŋdït guöp. Ku abä wäl në kɔc gup ku läi gup akït, ayï tiim ku rap. Agönhdï abï ciët many cïn raan ee ye tɔ liu.

²¹ Kë lueel ë Bɛ̈nydït de rɛm, Nhialic de Yithriɛl kï an, “Yak miɔ̈c ye nyop ëbɛ̈n mat në miɔ̈c näk kɔ̈u, ku camkï rïïŋ ëbɛ̈n.

²² Yɛn kën kuarkun gäm lööŋ në biäk de miɔ̈c ye nyop ëbɛ̈n ku nɔn ee miɔ̈c däŋ näk, wään bɛ̈ɛ̈i Yɛn keek bei në Rip.

²³ Ku acä ke yɔ̈ɔ̈k bïk Ɛn aa riëëu, aguɔ aa Nhialicden ku bïk aa kɔckï. Ku acä ke yɔ̈ɔ̈k bïk aa rëër cït man cän keek yɔ̈ɔ̈k, ago käŋ täu apiɛth në keek.

²⁴ Ku keek akënkï ya riëëu ku kënkï kë luɛɛl gam, acïk ka ye nïïmken ku piɔ̈ɔ̈thkɛn rac tak looi, ka acïk jɔ rac aläl ku cïkkï be piath.

²⁵ Gɔl ëkööl ɣɔn bɛ̈ɛ̈i Ɛn week bei ë Rip agut cï ee köölë, Yɛn ee cool ë tuc week lïïmkï, tït ke Nhialic.

²⁶ Ku acïn raan ee këden gam ku cïn raan piŋ këden. Ku wek cï nïïm riɛl ku rɛɛckï käŋ awär kuarkun.

²⁷ “Ka yïn Jeremia, yïn bï ee wëlkë dhil lɛ̈k kɔckï kedhie, ku acïkï këdu bï piŋ, abä keek cɔɔl ku acïkï bï gam.

²⁸ Abä lɛ̈k keek an jurden acïï Yɛn ee riëëu, Yɛn Bɛ̈nydït Nhialicden, ku acïkï wɛ̈ɛ̈t në kë tuc cï luöi keek. Luɔi adöt acï thou. Acïn raan ee bɛ jam në yen.

Luɔi de Karɛc në Wak de Ɣinom Yic

²⁹ “Kɔc ke Jeruthalem dhiaukï, tɛmkï nhïmkun ku cuatkï keek wei. Kiɛtkï diɛt ke dhiëëu në kur nïïm, në biäk cän göth, Yɛn Bɛ̈nydït, ku Yɛn cï kɔckï rɛɛc.

³⁰ “Kɔc ke Juda acïk kërac looi. Acïk yanhdɛn maan tääu në ɣöndiën ë Bɛ̈nydït, ku acïk dhiöök.

³¹ Në Wak de Ɣinom yic acïk yïïŋ cɔl Topeth yïk, agokï wɛ̈ɛ̈tken ku duetken nɔ̈k ë macic. Akën keek yɔ̈ɔ̈k bïk ee kënë looi, akën kɔn lɔ në yanɔm aya.

³² Ka akööl abïk bɛ̈n, akööl cïï ke yen bï bɛ aa cɔɔl an Topeth, ku nɔn ee Wak de Ɣinom, ku abï cɔl Wak de Tëm ë röl. Abïk kɔc tɔ̈ɔ̈u ëtɛ̈ɛ̈n, në biäk bï yen ciën tëdäŋ bïï ë keek tɔ̈ɔ̈u thïn.

³³ Ku gup ke kɔc cï thou abïk aa këcam de diɛt ku läi roor, ku acïn raan bï keek tuur.

³⁴ Piny abï aa jɔ̈ɔ̈r. Ku Yɛn bï awuɔɔu de miɛtëpiɔ̈u, ku diɛt piɛth ke dhuëëŋ de monythiëk ku nyan thiak, abä keek tɔ kääc në pɛ̈ɛ̈nydït ke Juda ku kuɛɛr ke Jeruthalem yiic.