Jeremia 6 - JAM DE NHIALIC 2011

Jeruthalem acï Tuɔɔk në Kɔc ke Ater

¹ Acïï Bɛ̈nydït lueel an, “Bääkï wëikun wei, wek kɔc ke Benjamin! Bäkkï bei në Jeruthalem! Kuɔthkï kaaŋ në Tekowa, ku kuɔthkï many de tɔŋ në Bethɣakerem. Wek bïï riääk bɔ̈ të lɔ rut yök ee nïnkë.

² Nyan de Dhiɔn aläk, ku abïï riɔ̈ɔ̈k,

³ meliik abïk nyuc ëtɛ̈ɛ̈n në rɛmkɛn ke tɔŋ. Abïk piɔ̈ɔ̈t ë wut këc, ku ŋɛk abï aa piɔ̈ɔ̈t të cï tak.

⁴ Abïï ŋɛk aa lueel an, “Kiëëtkï röt bäk Jeruthalem mak! Guiɛɛrkï röt! Abuk mak aköl!” Ku abïk jɔ lueel an, “Amawoou wok cï gääu, akɔ̈l ë guɔ bɛ̈n cil, ku atïïp athɛ̈i acïk bɛ̈n.

⁵ Abuk mak wakɔ̈u, wok bïï ɣään cï gël ke pänydït riɔ̈ɔ̈k.”

⁶ Bɛ̈nydït de rɛm acï meliikë yɔ̈ɔ̈k bïk tiim yep ku yïkï thɔc bïï kek Jeruthalem tuɔɔk. Acï lueel an, “Yɛn bï ee pänydïïtë luöi këtuc në biäk cï yen yic thiäŋ kekë yaaŋ.

⁷ Cït man ye yith pïïu piɛth ke muk, yen aye Jeruthalem kërɛɛcde muk apiɛth. Yɛn akuöörkuöör ku riääk piŋ ë pänydït yic, jɔk ku tëtöök ee kek ya tïŋ ëbɛ̈n.

⁸ Kɔc ke Jeruthalem, takkï ee nuɛɛnkë ee ka jäny week, na cäkkï lɔ looi, ke we bä pɔ̈l, Yɛn bï pänydïïtdun tɔ ee jɔ̈ɔ̈r, të cïn raan bï rëër thïn.”

Yithriɛl Reec

⁹ Acïï Bɛ̈nydït de rɛm lɛ̈k ɛn an, “Yithriɛl abïï piɔ̈ɔ̈th kɔ̈u bei abïï lipëlip cï enap cïï ë mïthke tɛ̈t bei. Ka wek duëër kɔc luök të ŋoot ë kaam thiin akäŋ wei.”

¹⁰ Guɔ bɛ̈ɛ̈r luɛɛl an, “Eeŋa bï këdï piŋ na la jam wo keek ku jääny keek? Ayek kɔc ril nïïm ku acïk jaai bïk jamdï piŋ, ayek kë cï lëk ɛn bä lueel dɔl.

¹¹ Agönhduön göth yïn we keek Bɛ̈nydït, ee dëp në ya yic ayadäŋ, ku acïn luöi duɛ̈ɛ̈r ɛn en bɛ muk.” Na wën, go ë Bɛ̈nydït lɛ̈k ɛn an, “Wälë agönhdï në mïth gup në kuɛɛriic ku në amɛɛt ke dhuök yiic. Ku moc ku tik abï keek jat wei, acakaa raandït cï dhiɔp arëët acïï bïï pɔ̈l.

¹² Ɣöötken abï keek gäm kɔc kɔ̈k, ayï duumken ayï diëërken. Yɛn bï kɔc ke ee piny luöi këtuc.

¹³ Raan ëbɛ̈n, röördït ayï kɔc kor, ayek wëu ke ayäär kɔɔr, ayï tït ku bäny de kakë Nhialic ayek kɔc math.

¹⁴ Ayek käŋ looi abï tëtöök ke kɔckï aa ciët piär tei. Ayek lueel an, ‘Acïn kërac,’ të cïn en këpiɛth nu.

¹⁵ Ë ke ye gup yäär të wään ye kek karɛc cït ee kakë looi? Ei, acïkï gup ee yäär taitai, ku acïkï ŋic aya luöi duëër kek ye pɔ̈l. Ka keek abïk wïïk cït man cï kɔc kɔ̈k wïïk, wään luöi Yɛn keek këtuc, yen abï aa thökden. Acä lueel, Yɛn Bɛ̈nydït.”

Yithriɛl Areec Kueer de Nhialic

¹⁶ Go Nhialic lɛ̈k kɔcke an, “Kääckï në apɔ̈k kuɛɛr ku daaikï. Yak kuɛɛr thɛɛr luɔp ku të nu kueer piɛth. Cathkï thïn, ku wek bï rëër në mät.” Ku ayek lueel an, “Ei, acuku bï looi!”

¹⁷ Na wën ke Bɛ̈nydït ë lɔc raan bï aa tïït, raan bï kaaŋ de jäny aa kooth. Gokï lueel an, “Wok cïï bï piŋ.”

¹⁸ Go Bɛ̈nydït jɔ lueel an, “Wek juöör, piɛŋkï wek akutnɔm, ku ŋiɛckï kë bï rɔt luöi keek.

¹⁹ Ku yïn piny piëŋë! Ku në biäk luöi Yɛn täŋdɛn rac këtuc ëbɛ̈n, Yɛn bï riääk bɛ̈ɛ̈i në ee kɔckë gup, në biäk cï kek wëëtdï rɛɛc ku kënkï wëlkï riëëu.

²⁰ Eeŋö bï Ya tɔ diɛɛr në wal ŋïr yek bɛ̈ɛ̈i në Ceba, ku nɔn ee wal tum ye keek bɛ̈ɛ̈i piny mec? Yɛn cïï miɔ̈cdɛn ye nyop ëbɛ̈n bï gam ku cä piɔ̈u bï miɛt wo miɔ̈ckɛn näk.

²¹ Ka Yɛn bï ee kɔckë tɔ kɔ̈th ku wïïkkï. Kɔc ë dhiëth mïth abïk thou në mïthken, ku yen ee thon de määthken ku kɔc thiääk në keek.”

Mɛk Bɔ̈ të lɔ Rut

²² Aye Bɛ̈nydït lueel an, “Kɔc abïkï piny nu të lɔ rut, jur ril mec arëët aguiir tɔŋ.

²³ Acïk dhɛ̈ŋken ku tɔɔŋken nööm, ayek kɔc kec piɔ̈ɔ̈th ku cïnkï kokdepiɔ̈u. Të ciɛth kek ë jöŋgöörken kɔ̈ɔ̈th, ayek wuur cï awuööu de wɛ̈ɛ̈r. Acïk röt guiir në luöi bï kek nyan de Dhiɔn mak.”

²⁴ Go kɔc ke Jeruthalem lueel an, “Wok cï thok piŋ, goku woyiëth kuak në wocin, wok cï piɔ̈ɔ̈th jiɛth në arɛɛm ku töök de piɔ̈u në riɔ̈ɔ̈c cï tiiŋ rɔ̈p.

²⁵ Wok cï riɔ̈ɔ̈c në lɔ wut këc ayï cäth ë kuɛɛr yiic, në biäk cïï kɔc ke aterda abätäu nööm ku dɔm riɔ̈ɔ̈c wook.”

²⁶ Aye Bɛ̈nydït lueel an, “Tääukï lupɔɔ ke cual ku daalkï röt në ŋethic. Dhiaukï në jiɛthëpiɔ̈u cït man ee raan wëndɛn tök dhiëëu, në biäk bïï raan riäk week we mak ëthiäu.

²⁷ Them kɔckï Jeremia, cït man ye raan wëëth them, ku tïŋ täu bïï kek tɔ̈u.

²⁸ Keek kedhie ayek kɔc ril nïïm ee käŋ rɛɛc gam, arilkï cï maläŋ ku wëëth. Acïk riääk kedhie, ayek cath ke ke ciɛɛth tuum.

²⁹ Manydït adɛ̈p arëët, ku wënh rac acie lëëŋ ku pol wei. Acïn naamde bä lɔ ke ya kïït kɔckï, në biäk kën ë kɔc rac cuat wei.

³⁰ Abï keek aa cɔl kɔc cïn naamden, në biäk cän keek rɛɛc Yɛn Bɛ̈nydït.”