Jeremia 52 - JAM DE NHIALIC 2011

Wïïk de Jeruthalem

¹ Dhedekia aaye run thiërrou ku tök, wään dɔm yen bääny ë Juda, ku jɔ bääny muk në run kathiëër ku tök. Man acɔl Ɣamutal, nyan de Jeremia wään rëër në pänydïït de Libna yic.

² Go melik Dhedekia awäc luöi Bɛ̈nydït, cït man de awäny cïï melik Jeɣoyakim looi.

³ Go Bɛ̈nydït göth arëët kekë kɔc ke Juda ku kɔc ke Jeruthalem, ago keek nyaai në yenyin. Dhedekia acï Nebukadnedhar melik de Babilonia bɛ̈n rɛɛc,

⁴ go Nebukadnedhar bɛ̈n kekë remdɛn de tɔŋ, ku mɛk Jeruthalem në kööl de thiëër ë pɛɛi de thiëër, ë ruöön ye Dhedekia run dhoŋuan ë bääny yic. Gokï pɛɛnyken piäät ë Jeruthalem këc, ku geeukï cil ëbɛ̈n,

⁵ ku jɔkï tɔ tɔ̈u ke cï geeu agut cï run de thiëër ku tök ë bääny de Dhedekia.

⁶ Ku në kööl de dhoŋuan, në pɛɛi de ŋuan në ye ruöön manë yic, wään cïï cɔk jɔ dït, ka kɔc acïk ciën kë ciɛmkï,

⁷ kɛ̈l ke pänydït acï keek bɛ̈n thuur kɔ̈ɔ̈th. Cakaa wään cï ë pänydït geeu në kɔc ke Babilonia, rem de tɔŋ ë Jeruthalem acïk röt bɛ̈n kual wakɔ̈u. Aake tëëk në kueer ë dom de bääny, ku lekkï ë kueer ë kal ee kɛ̈l kaarou rek, ku kɔtkï ke ke lɔ të lɔ wak de Jordan.

⁸ Ku rem de tɔŋ de Babilonia, acïk Dhedekia bɛ̈n cop, abïk lɔ dɔm ë riaaŋ thiääk ke Jeriko, ku aacïï remdɛn ë tɔŋ päl wei.

⁹ Go Dhedekia yiɛ̈n melik Nebukadnedhar në pänydïït ë Ribila nu piny de Ɣamath, ku jɔ ë Nebukadnedhar löŋde teem ëtɛ̈ɛ̈n.

¹⁰ Go Nebukadnedhar wɛ̈ɛ̈t ke Dhedekia tɔ näk ë Ribila ke Dhedekia ë daai, ku tɔ bäny ke Juda näk ayadäŋ.

¹¹ Ku në ee kakë cök, ke jɔ nyïïn ke Dhedekia tɔ tuëkkë bei, ku tɔ rek ë joth ku tɔ leerë Babilon. Go Dhedekia jɔ tɔ̈u alooc yic ë Babilon agut kööl ɣɔn thou en.

Riääk de Luaŋdït

¹² Në kööl de thiëër ë pɛɛi de dhïc, në ruöön ë thiëër ku dhoŋuan ë melik Nebukadnedhar ë Babilonia, ku raan ee Nebukadnedhar jääm, raan cɔl Nebudharadan, ku ye bɛ̈nydɛn ë rem de tɔŋ, go lɔ Jeruthalem.

¹³ Go Luaŋdït nyuɔp piny, ku nyop ɣön de bääny, ku nyop ɣööt ke kɔc de naamden ëbɛ̈n ë Jeruthalem,

¹⁴ ku jiëp remdɛn ë tɔŋ kɛ̈l ke pänydït piny.

¹⁵ Ku jɔt Nebudharadan kɔc wään cï döŋ piny ë pänydïtic, leer keek Babilonia, atëët lik cï döŋ, ku kɔc cï mat ë kɔc ke Babilonia.

¹⁶ Ku nyiëëŋ Nebudharadan kɔc kɔ̈k kuanynyïïn aläl piny, nyiëëŋ keek Juda, ku tɔ keek ee lui në duum ke enap yiic, ku në duum yiic.

¹⁷ Go kɔc ke Babilonia kuec ke maläŋ dhuööŋ, ku thɛ̈k wään tɔ̈u Luaŋdït yic, ku dhoŋkï lɔ̈ɔ̈rdïït ë maläŋ, ku jɔtkï malɔ̈ɔ̈ŋ ëbɛ̈n leerë keek Babilon.

¹⁸ Ku jɔtkï thiët aya, ku jɔtkï thɛ̈k ye ë ŋeth jok, të nɛpë yïk nɔm, ku kë ye ë manyëalath cuääny, ku guöl ye ke riɛm de lɛ̈n cï nɔ̈k geeny, ku guöl ye ke wal ŋïr nyop, ku lɔ malɔ̈ɔ̈ŋ kɔ̈k ye ë ke lui Luaŋdït, acïk keek jɔt kedhie.

¹⁹ Acïk käŋ kedhie jɔt, ka cï looi në adhääp ku ateek: guöl kor, ku thɛ̈k ye many dɛ̈p muk, ku guöl ye riɛm geeny të nɔ̈k ë miɔ̈c, ku ka ye ë ŋeth muk, ku kuc ke mɛ̈ckealath, ku guöl ke wal ŋïr, ku guöl ye mɔ̈u pɔɔr wei.

²⁰ Ku këde maläŋ wään bïï ë melik Tholomon luöi Luaŋdït, ku kuec kaarou, ku thɛ̈k, ku lɔ̈ɔ̈rdït yic, ku miöör kathiëër ku rou ee yen kuɔny, thiek aläl në thëm.

^21-22 Kuëc kaarou aake kït gup: tök ë keyiic aaye bɛ̈ɛ̈rde ke lɔ nhial mitïïr kabɛ̈t, ku dïtde yenkɔ̈u aaye mitïïr kadhïc, ku biäk wëëth aaye dhïlde milimitïïr kathiërdhorou ku dhïc. Ku tök ë keyiic aa de nɔm gëlgël, ye bɛ̈ɛ̈rde ke lɔ nhial mitïïr kaarou ku biäk, ku wil kɔ̈u ëbɛ̈n në pomegraneet cïï ë yen jäm, ku aa loi ëbɛ̈n në maläŋ.

²³ Ku kuec yiic kedhie, acï ke jäm në pomegraneet ëbɛ̈n, kathiërdhoŋuan ku dhetem ë keyiic aaye tïc piny.

Kɔc ke Juda acï Ke Lɛɛr Babilonia

²⁴ Ku mat ee kakë cök, Nebudharadan bɛ̈ny ë rem de tɔŋ, acï ee kɔckë jɔt ke ke mac yï: Theraya bɛ̈ny tueŋ de kakë Nhialic, ku Dhepania bɛ̈ny lɔ në yecök, ku kɔc kɔ̈k kadiäk, bäny de naamden Luaŋdït.

²⁵ Ku jɔt bäny ke rem de tɔŋ wään wat tɔŋ ë pänydïtic, ku kɔc kadhorou në kɔc nu ë löŋ de melik nɔm, kɔc cï döŋ ë pänydïtic, ku bɛ̈ny lɔ në bɛ̈ny ë rem de tɔŋ cök, raan aa awereek muk, ku röör kɔ̈k kathiërdhetem, kɔc de naamden.

²⁶ Acï ë Nebudharadan ke yiɛ̈n Nebukadnedhar melik de Babilonia, ku yen aa rɛ̈ɛ̈r ë pänydïït de Ribila

²⁷ tɔ̈u piny de Ɣamath. Ku acï ë melik keek bɛ̈n tɔ dui ëtɛ̈ɛ̈n, ku tɔ keek näk. Ago kɔc ke Juda jɔ peec pinyden ku leer ë keek piny lei.

²⁸ Kënë ee kuën de kɔc cïï Nebukadnedhar keek jɔt ke ke mac: Wään yen run dhorou ë bäänyic acï aguum kadiäk ku thiërrou ku diäk 3,023 de kɔc ke Judai jɔt.

²⁹ Ku në ruöön ë thiëër ku bɛ̈t ke ee melik acï bot kabɛ̈t ku thiërdiäk ku rou 832 de kɔc jɔt ë Jeruthalem,

³⁰ ku në ruöön ye Nebukadnedhar run thiërrou ku diäk ë bäänyic, Nebudharadan bɛ̈ny de rem acï bot kadhorou ku thiërŋuan ku dhïc 745 ke kɔc ke Judai jɔt. Kuën ë kɔc kedhie, kɔc ë jɔt ayek 4,600.

³¹ Në ruöön ɣɔn ye Ebilmerodak melik ë Babilonia, acï kokdepiɔ̈u nyuöth Jekonia melik de Juda, në luny lony yen en ë alooc yic. Kënë aa loi rɔt në kööl de thiërrou ku dhïc, në pɛɛi de thiëër ku rou, ë ruöön thiërdiäk ku dhorou, wään cï ë Jekonia peec ke mac.

³² Ebilmerodak aaye yen luööi apiɛth, ku gëm tëde riëëu awär meliik kɔ̈k cï peec ë yen ë tök tɔ̈u ë Babilonia.

³³ Ago Jekonia jɔ pɔ̈l bïï lupɔɔkɛn ke ɣön ë mac waar, ku jɔ aa cam paan ë melik në akööl ke pïïr de yic ëbɛ̈n.

³⁴ Akööl nyïïn ëbɛ̈n, akööl wään pïïr yen, aaye gäm wëu bïï yen kë kɔɔr aa ɣɔɔc.