Jeremia 5 - JAM DE NHIALIC 2011

Awäny de Jeruthalem

¹ Kɔc ke Jeruthalem, katkï ke we kuany kuɛɛriic! Tiëŋkï welɔ̈m! Woikï në gupkun! Kaarkï ɣään ke ɣɔ̈ɔ̈c! Duɛ̈ɛ̈rkï raan tök yök raan ee yic looi ku ye them bï piɔ̈u adöt ke Nhialic? Na bä ye lëu ke Bɛ̈nydït abï Jeruthalem päl awänyde.

² Cakaa nɔn ya wek e lueel nɔn ya wek Bɛ̈nydït lam, ku ayek kuëëŋ ë lueth.

³ Ee yic Bɛ̈nydït ee kɔc ee piɔ̈ɔ̈th adööt kɔɔr. Acï we luöi këtuc, ku akɛ̈nkï yök në wepiɔ̈ɔ̈th, acï we dum yiic, ku we kën wëët. Wek aake ril nïïm, ku wek cïï köör bäk röt puk në karɛckun yiic.

⁴ Aguɔ lueel an, “Kakë akuɛnykï nyïïn ku acïnkï nïïm. Ayek käŋ looi në dhɔ̈ɔ̈n, akuckï kë kɔɔr ë Nhialicden, kë kɔɔr ë Bɛ̈nydït bïk looi.

⁵ Yɛn bï lɔ tëde röördït, ku jam wo keek. Ee yic aŋickï kë kɔɔr ë Nhialicden, kë kɔɔr ë Bɛ̈nydït bïk looi.” Ku keek kedhie acïk bääny de Bɛ̈nydït rɛɛc ku acïk jaai bïk riëëu.

⁶ Në biäk de ee kënë yen abïï köör roor keek nɔ̈k, abïï aŋuööth ke jɔ̈ɔ̈ric keek riɔ̈ɔ̈k, ku kuac abï aa cath ë pɛ̈ɛ̈nydïtken yiic. Të lee ee kɔckë lɔ biic, abïï keek rɛt yiic, në biäk juëc awɛ̈ɛ̈cken, ku ayek cool ke ke jäl ë Nhialic lɔ̈ɔ̈m.

⁷ Bɛ̈nydït ee lop an, “Eeŋö bän karɛc ke kɔckï jɔ pɔ̈l? Acïk Ɛn nyääŋ piny ku lɛmkï yiëth cie yic. Yɛn cï kɔckï cääm abïk kuɛth, ku acïk lɔ köör ku jɔkï aa lɔ cath në akɔɔrröör.

⁸ Aake cït weŋ cï ŋiëc nyuääth, ku de piɔ̈u dhööm, ŋɛk aaye piɔ̈u dɛ tiiŋ de raan rëër kek.

⁹ Cä keek duëër luöi këtuc në biäk de ee kënë, ku ja guur looi në jur cït ee kënë?

¹⁰ Yɛn bï kɔc ke ater tooc bïk tim de enap de kɔckï lɔ yɛp piny, ku acïkï keek bïï riɔ̈ɔ̈k taitai. Abä keek yɔ̈ɔ̈k bïk kër tɛm nïïm wei, në cïï ee kërkë ee kakï.

¹¹ Baai de Yithriɛl ku baai de Juda acïk Yɛn nyiɛɛn taitai. Acä lueel, Yɛn Bɛ̈nydït.”

Bɛ̈nydït Areec Yithriɛl

¹² Kɔc ke Bɛ̈nydït acïk Yen rɛɛc, ku luelkï an, “Acïn kë bïï looi ë yic. Acïn nuɛɛn bï wo yök, acïn abätäu buk tïŋ, ayï cɔk.”

¹³ Tït abïk aa yom, acïn jam nu në ke yiic. Kë bïï luöi keek kï!

¹⁴ Yen Kë cïï Bɛ̈nydït lueel kï, Bɛ̈nydït Awärjäŋ an, “Jeremia, në biäk cïï ee kɔckë ka cït ee kakë lueel, Yɛn bï jamdï tɔ cït mac në yïthok. Ku kɔc abïk ciët tiim, ku abïï mac keek nyop taitai.”

¹⁵ Baai de Yithriɛl, Bɛ̈nydït abï jur bɛ̈ɛ̈i tëmec bïï we bɛ̈n mak. Ee jur thɛɛr ku ril, jur cä wek thoŋde ŋic.

¹⁶ Kɔckɛn muk dhɛ̈ŋ ayek rem de tɔŋ ee näk ke cïn kokëpiɔ̈u.

¹⁷ Abïk rɛɛpkun thöl ku ciɛmkï kacaamkun, abïk wɛ̈ɛ̈tkun ku duetkun nɔ̈k. Abïk ɣɔ̈kkun ku thökkun tɛm röt, ku riäkkï tiimkuön ke enap ku tiim ke ŋaap. Pɛ̈ɛ̈nydït cï gël yak keek ŋɔ̈ɔ̈th abïï remdɛn ë abätäu keek riɔ̈ɔ̈k.

¹⁸ Aye Bɛ̈nydït lueel an, “Acakaa aköölkë yiic Yɛn cïï kɔckï bï riɔ̈ɔ̈k taitai.

¹⁹ Të lee kek lɔ lop an eeŋö luɔi Yɛn ee kakë kedhie, lɛ̈kë ë keek Jeremia, an cït man cï kek kenïïm wɛl wei tëde Yɛn ku luuikï yiëth kɔ̈k pinyden, yen abï kek kɔc kɔ̈k lɔ luööi piny cie pinyden.”

Bɛ̈nydït Ayöök Kɔcke

²⁰ Aye Bɛ̈nydït lueel an, “lɛ̈kë kuat de Jakop, lɛ̈kë kɔc ke Juda an:

²¹ Daaikï apiɛth, wek kɔc dhän cie piŋ, kɔc de kenyïïn, ku acïkï ee daai, ku adekï yïth, ku acïkï ee piŋ.

²² Ee Yɛn ee Bɛ̈nydït, eeŋö cä wek ee riɔ̈ɔ̈c ë Yɛn? Eeŋö cïï ë week ee lath ë yanɔm? Yɛn cï liɛɛt tɔ yë aken de wɛ̈ɛ̈r, aken kääc tëde cïï duëërë teem kɔ̈u. Wɛ̈ɛ̈r aduëër amaŋ looi, ku acïï duëër lɔ ë baŋtui, apiöök aduëër rɔt looi, ku acïï duëër dhoŋ kɔ̈u.

²³ Ku wek kɔckë! Wek ee kɔc ril nïïm, ku yak kɔc reec Ɛn, wek cï röt wɛl wei ku nyääŋkï ya piny.

²⁴ Akënkï tak bäk ya riëëu, cakaa nɔn yan we tuöc deŋ yaak ku tuöc we deŋ ruël, ku gäm week rɛɛp yak tem ë ruöön thok ëbɛ̈n.

²⁵ Ku kë loi rɔt, karɛckun acïk week pɛ̈n bɛ̈n bïï ee kapiɛthkë bɛ̈n tëde week.

²⁶ “Kɔc ee karɛc looi arëërkï ë kɔckï yiic, ayek rëër ke ke tït cït man ee kɔc ee bɔi thieth ke ke dep amɔ̈r, ku acïk wïïnkɛn ke dɛ̈p luöi kɔc.

²⁷ Cït man ye raan ee yäp ɣönde thiɔ̈ɔ̈ŋ në diɛt, yen aye kek ɣöötken thiɔ̈ɔ̈ŋ në kak ë pec. Yeka ril kek ku kuethkï,

²⁸ yeka cuɛi kek ku piɛthkï gup. Luɔidɛn rac acïn pëk. Acïkï mïth abɛɛr ee gäm yicden, ku cïkkï löŋ de kɔc yɔŋ ee ŋiëc guiir.

²⁹ “Ku Yɛn Bɛ̈nydït, abäk keek luöi këtuc në biäk ee kakë, Yɛn bï rɔt guöör në ee jurë.

³⁰ Kënhiɛɛny ee kɔc muum nïïm acï rɔt looi piny yic:

³¹ tït ee lueth ke yek lueel, bäny de kakë Nhialic ayek käŋ looi, ku jɔ tït keek aa yɔ̈ɔ̈k, ku kɔckï acïn kë yek rɛɛc. Ku eeŋö bïk looi të lee këriëëc ëbɛ̈n lɔ kɔ̈ɔ̈c?”