Jeremia 49 - JAM DE NHIALIC 2011

Bɛ̈nydït Alui Këtuc Ammon

¹ Kën ë lueel Bɛ̈nydït kï në biäk de Ammon an, “Tɔ̈u röör ke Yithriɛl tënou? Cïn raan töŋ duëër pinyden gël? Eeŋö duëër kek kɔc ee yanh cɔl Molek lam tɔ nöm piny de dhiën ë Gad ku ɣɛpkï ëtɛ̈ɛ̈n?

² Ku akööl abïkï akööl bän kɔc ke Rabba tɔ piŋ awuɔɔu de tɔŋ, ku abï nyääŋ piny ke cï riääk, ku bɛ̈ike abïï ke nyuɔp piny ë mac. Ku ëtɛ̈ɛ̈n Yithriɛl abï pinyde pɔ̈k nɔm ciëën tëde kɔc ɣɔn cï ye nööm tëde keek.

³ Cɔ̈tkï arëët! Kɔc ke Ɣecbon! Ai acï riɔ̈ɔ̈k! Lak dhiaukï diëër ke Rabba! Tääukï lupɔɔ ke cual ku dhuöörki. Yak riŋ ke wïïl piny në anuɔɔn. Yanhduön Molek abïï peec kekë gucke ku wɛ̈ɛ̈t meliikke.

⁴ Wek ee kɔc cie adööt, eeŋö ya wek röt lɛɛc? Riɛldun awiɛ̈ɛ̈k. Eeŋö ya wek riɛldun ŋɔ̈ɔ̈th, ku yak lueel an cïn raan bï we mak?

⁵ Yɛn bï riɔ̈ɔ̈cdït yiɛ̈n week në aguuk kedhie. Ka wek bï kat wedhie. Ŋɛk abï wëike aa bääk, ku acïn raan bï remduön ë tɔŋ bɛ määt yiic.

⁶ “Ku ë kecök ciëën Yɛn bï Ammon bɛ tɔ kueth, Acä lueel, Yɛn Bɛ̈nydït.”

Bɛ̈nydït Alui Këtuc Edom

⁷ Kën ë lueel Bɛ̈nydït de rɛm kï në biäk de Edom an, “Cï kɔc ke Teman nïïm määr në guiëërdɛn piɛth? Cïn kë duëër ë kɔckɛn ee ke jääm lɛ̈k keek, kë bïk looi? Cï pɛlënɔmden ëbɛ̈n jäl tëde keek?”

⁸ Kɔc ke Dedan pɔ̈kkï röt ku katkï! Thiankï röt! Yɛn lɔ mïth kuat de Ethau luöi këtuc, në biäk cï akööl bɛ̈n akööl bän ke luöi këtuc.

⁹ Ku të tet ë kɔc enap, ade kalik ee döŋ ë kër kɔ̈ɔ̈th, ku të bïï ë cuɛ̈ɛ̈r wakɔ̈u, ee ka kɔɔrkï, kek yek jɔt.

¹⁰ Ku Yɛn cï kuat de Ethau yɔ̈ɔ̈t kɔ̈ɔ̈th bei taitai, ku Yɛn cï ɣäänkɛn ye kek thiaan thïn liep nïïm, agokï cuö be thiaan. Kɔc ke Edom kedhie acï keek riɔ̈ɔ̈k. Acïn raan töŋ cï döŋ.

¹¹ Nyäŋkï abɛɛrkun Yɛn ku abä ke lɔ̈ɔ̈k muk. Diëërkuön abɛɛr aduëërkï Yɛn ŋɔ̈ɔ̈th.

¹² “Na cï kɔc cïï duëërë luöi këtuc, na cï keek guɔ luöi këtuc, yak tak ë wenïïm nɔn duɛ̈ɛ̈r wek ban ke we cïï luiyë këtuc? Ei, we bïï dhil luöi këtuc!

¹³ Yɛn guöp, Yɛn cïï kuëëŋ, nɔn bïï ë pänydïït de Bothera aa të bïï kɔc aa riɔ̈ɔ̈c të tïŋ ë yen, ku abï aa jɔ̈ɔ̈r, abï kɔc aa dɔl guöp, ku yek rinke tɔ aa aciɛɛn. Ku wuöt kor thiääk në yen abïk riääk aɣet athɛɛr. Acä lueel, Yɛn Bɛ̈nydït.”

¹⁴ Guɔ lueel an, “Edom, Yɛn cï jam yök tëde Bɛ̈nydït. Acï tuc tooc bïï juöör lɔ yɔ̈ɔ̈k, bïk rɛmkɛn ke tɔŋ lɔ määt yiic, ku bïk röt kiëët bïk yïn mak.

¹⁵ Bɛ̈nydït abï yïn tɔ kɔ̈c ë juööriic, ku acïn raan bï yïn riëëu.

¹⁶ Lɛcdu acï yïn math. Acïn raan ee riɔ̈ɔ̈c ee yïn, cïn man ee yïn en tak an ye kɔc riɔ̈ɔ̈c ë yïn. Yïn rɛ̈ɛ̈r në awiɛn ë kur nïïm, në kuur nɔm nhial ya, ku cakaa nɔn rɛ̈ɛ̈r yïn nhial ya cï cuɔɔr, Bɛ̈nydït abï yïn bɛ̈ɛ̈i piny. Acï Bɛ̈nydït lueel.”

¹⁷ Go ë Bɛ̈nydït lueel an, “Riääk bï bɛ̈n Edom abï rac arëët, cakaa raan tɛ̈k kueer abï aa päu ku riɔ̈ɔ̈c arëët.

¹⁸ Yen ee kë bï tuöl tëde Edomë abï ciët kë wään bï tuöl tëde Thɔdom ku Gomoora, wään cïï ë keek riɔ̈ɔ̈k ku riäk wuöt thiääk në keek. Acïn raan bï bɛ ceŋ ëtɛ̈ɛ̈n. Acä lueel Yɛn Bɛ̈nydït.

¹⁹ Yɛn bï bɛ̈n cït man ë köör bɔ̈ bei në tiim lɔ thïk në Jordan yɔu, ke bɔ̈ në wal tɔ̈c yiic, ku ta kɔc ke Edom tɔ kɔt ëthiäu pinyden. Ku bɛ̈ny bä lɔc abï jur jɔ ceŋ. Eeŋa duëër ë thɔ̈ɔ̈ŋ ke yɛn? Eeŋa duëër Yɛn guääk? Ee bɛ̈ny ŋa duëër teer ke Yɛn?

²⁰ Aguɔ kïït de riääk bän Edom jɔ riɔ̈ɔ̈k piŋ, ku piɛŋ kë bä luöi kɔc ke pänydïït de Teman. Acakaa mïthken abïï keek thɛl wei, ku raan ëbɛ̈n abï riɔ̈ɔ̈c aläl.

²¹ Të le Edom lɔ wïïk abï dɛ awuɔɔu dïït agök, ka piny nɔm ëbɛ̈n abïï niɛŋ, ku kiɛɛu de ka lëk kɔc abïï piŋ tëmec cït Wɛ̈ɛ̈r Thith.

²² Kɔc ke ater abïk Bothera mak, cït man ye cuɔɔr lööny piny ke cï ye wuök peer. Yen ee köölë rem de tɔŋ de Edom abï riɔ̈ɔ̈c ë riɔ̈ɔ̈c de tiiŋ rɔ̈p.”

Bɛ̈nydït Alui Këtuc Damathko

²³ Kën ë lueel Bɛ̈nydït kï në biäk de Damathko an, “Kɔc tɔ̈u në pɛ̈ɛ̈nydït ke Ɣamath ku Apad, ayek diɛɛr ku acïk nuan, në biäk cïï kek thoŋ rac piŋ. Jiɛthëpiɔ̈u ee rɔt caath ë kenïïm cï wɛ̈ɛ̈r ku acïkï duëër lɔ̈ŋ.

²⁴ Kɔc ke Damathko akɔ̈ckï ku acïk kat në riɔ̈ɔ̈cdït. Atɔ̈ukï arɛɛmic ku këcïmoony cït man ë tiiŋ rɔ̈p.

²⁵ Pänydïït ɣɔn cï leec de yic miɛtëpiɔ̈u acï yic guɔ ciɛ̈n kɔc taitai.

²⁶ Acïï Bɛ̈nydït de rɛm lueel an, “Në ye köölë dhuökke abïï keek nɔ̈k ë kuɛɛr ke pänydït yiic, ku riäk remdɛn ë tɔŋ ëbɛ̈n.

²⁷ Yɛn bï kal de Damathko ɣök mac, ku Yɛn bï ɣön ë bääny de melik Benɣadad nyuɔp piny.”

Dhiën de Kedar ku Pänydït de Ɣadhor Aluiyë Keek Këtuc

²⁸ Kën ë lueel Bɛ̈nydït kï në biäk de dhiën de Kedar ku lɔ wuöt mɛc ë Ɣadhor keek, wuöt cï Nebukadnedhar melik de Babilon ke peec ë Edom an, “Makkï kɔc ke Kedar, ku riäk dhiën de kɔc nu të lɔ aköl amiäk!

²⁹ Dɔm pɛɛnyken ku thökken, ku lupɔɔ ke pɛɛnyken ku ka tɔ̈u ë pɛɛnyken yiic. Nöm thɔ̈rɔ̈ɔ̈lken ku lëkkë kɔc an, ‘Riɔ̈ɔ̈cdït acï we gɛɛu cil!

³⁰ “Kɔc ke Ɣadhor, wek cä yɔ̈ɔ̈k Yɛn Bɛ̈nydït an, katkï lakkï tëmec ya, ku thiaankï. Nebukadnedhar melik de Babilon acï we luöi kiɛɛr rac, ku kë ye lueel kï an,

³¹ ‘Bäkkï! Wo bï jurë bɛ̈n mak, kɔc ee ye lueel an lek läŋ ku tɔ̈ukï ë mätic! Pänydïïtden acïn thok athïïn ku acïnkï gɛ̈ɛ̈rgɛ̈ɛ̈r, ku acïn kë gël en taitai.’

³² “Jatkï thɔ̈rɔ̈ɔ̈lken ku ɣɔ̈kken kedhie! Yɛn bï kɔc ee nhïmken tem ke ke cek thiäi në ɣään yiic ëbɛ̈n, Yɛn bï riääk yiɛ̈n keek në aguuk kedhie.

³³ Ɣadhor abïï tɔ ee jɔ̈ɔ̈r aɣet athɛɛr, të bïï kɔ̈ɔ̈rgɔl aa ceŋ thïn kapäc. Acïn raan bï bɛ rëër ëtɛ̈ɛ̈n. Acä lueel, Yɛn Bɛ̈nydït.”

Bɛ̈nydït Alui Këtuc Eelam

³⁴ Na ɣɔn cï Dhedekia aa melik de Juda, go Bɛ̈nydït jam ke tiët Jeremia në biäk de paan de Eelam.

³⁵ Acï Bɛ̈nydït de rɛm lueel an, “Yɛn bï kɔc cï Eelam tɔ ril nɔ̈k kedhie.

³⁶ Yɛn bï yom tɔ put ke lɔ të lɔ Eelam në aguuk kedhie, Yɛn bï kɔcke thiäi ë piny nɔm ëbɛ̈n, abï ciën jur töŋ bï döŋ ke cïn yic kɔckɛn lɔ thïn.

³⁷ Yɛn bï kɔc ke Eelam tɔ riɔ̈c në kɔc ke aterden, kɔc kɔɔr bïk keek nɔ̈k. Në agönhdiën dït Yɛn bï kɔc ke Eelam riɔ̈ɔ̈k ku tuöc keek remdïït de tɔŋ agut të bän keek cuöth bei.

³⁸ Yɛn bï meliikken riɔ̈ɔ̈k ku riääk bänyken, ku tääu thöönydï ëtɛ̈ɛ̈n.

³⁹ Ku në kecök ciëën Yɛn bï kɔc ke Eelam bɛ tɔ kueth. Acä lueel, Yɛn Bɛ̈nydït.”