Jeremia 47 - JAM DE NHIALIC 2011

Jam de Bɛ̈nydït në biäk de Pilithtiya

¹ Ɣɔn kën ë melik de Rip Gadha kɔn mak, go Bɛ̈nydït jam ke tiët Jeremia në biäk de Pilithtiya.

² Ago lueel an, “Tïŋ! Pïïu athɔckï röt të lɔ rut, ku abïk bɛ̈n ke ke riŋ cït kiir de amool. Abïk piny kum nɔm ayïï kë tɔ̈u thïn ëbɛ̈n, pɛ̈ɛ̈nydït ayï kɔc ceŋ ëtɛ̈ɛ̈n. Kɔc abïk kuɔɔny kɔɔr, raan nu ë piny nɔm bɛ̈n abï dhiau arëët.

³ Abïk cök ke jöŋgöör riŋ pïŋ, ku awuɔɔu de abëël ke tɔŋ, ku atuktuk de cök ke abëël. Wärken ke mïth ku märken ke mïth acïkï röt bï pɔ̈k mïthken, abïk cin nuɛt në kegup ë lik.

⁴ Akööl acïk bɛ̈n akööl bïï ë ke Pilithtiya riɔ̈ɔ̈k, bïï ë ye tɛɛm wei tëde Tayer kekë Thidon ku kuɔɔny cï döŋ ë bɛ̈n. Yɛn Bɛ̈nydït Yɛn bï Pilithtiya riɔ̈ɔ̈k, kɔc ë bɔ̈ në wɛ̈ɛ̈r de Keret yɔu ëbɛ̈n.

⁵ Jiɛthëpiɔ̈u dït acï bɛ̈n në kɔc ke Gadha gup, ku kɔc ke Acekelon alek lik. Agut cï nɛn yen bïï kɔc kɔ̈k ke Pilithtiya jɔ dhiau?

⁶ Wek ee dhiau an, ‘Abätäu de Bɛ̈nydït! Agut cï nɛn bïï Yïn jɔ aa lɔ̈ŋ? Lɔ ciëën në athepdu yic, jɔ lɔ̈ŋ ëtɛ̈ɛ̈n ku lɔ lik!’

⁷ Ku bïï lɔ lɔ̈ŋ adï, ku acïï Bɛ̈nydït yɔ̈ɔ̈k bïï looi? Acïï Bɛ̈nydït yɔ̈ɔ̈k bïï thɔ̈ɔ̈r ke Acekelon ku kɔc ceŋ wɛ̈ɛ̈r yɔu.”