Jeremia 44 - JAM DE NHIALIC 2011

Jam de Bɛ̈nydït Yïnë Yithriɛl Nu ë Rip

¹ Go Bɛ̈nydït jam ke yɛn në biäk de kɔc ke Judai tɔ̈u ë Rip Kedhie, kɔc nu ë pɛ̈ɛ̈nydït ke Migdol, ku Tapaneth, ku Mempeth, ku kɔc nu piny de Pathroth.

² An acïï Bɛ̈nydït de rɛm, Nhialic de Yithriɛl Lueel an, “Wek cï riääk cï yiɛ̈n Jeruthalem kekë pɛ̈ɛ̈nydït kɔ̈k ke Juda kedhie tïŋ ë we nyïïn. Cakaa ënɔɔnë aŋootkï ke ke cï riääk, ku acïn raan ceŋ keek,

³ në biäk cïï ë kɔcken karɛc looi, ku acïk Yɛn tɔ göth. Ayek yiëth kɔ̈k nyuöp wal ŋïr, ku yek yiëth kɔ̈k luööi, yiëth kënkï ke kɔn luööi, ayï week, ayï kuarkun akënkï ke kɔn luööi.

⁴ Ku wek ya cool ë tuöc Yɛn week tïtkï kɔc ee Yɛn luööi, kɔc ee we yɔ̈ɔ̈k an, duökï karɛc maan keek ee looi.

⁵ Ku wek kën këdï piŋ, ku cäkkï jamdï gam. Wek cïï luɔiduön rac pɔ̈l, luɔi ya wek yiëth kɔ̈k nyuöp wal.

⁶ Yeka cän agönhdï ku jiɛthëpiɔ̈ndï wäl ë pɛ̈ɛ̈nydït ke Juda yiic ku kuɛɛr ke Jeruthalem yiic, ku nyuɔp ke në mac. Acïk döŋ ke ke cï riääk, agut cï ee köölë.

⁷ “Aguɔ jɔ lueel, Yɛn Bɛ̈nydït Nhialic de Yithriɛl, an, eeŋö ja wek röt luöi kërɛɛc cït ee kënë wapäc. Kaarkï bäk riääk yiɛ̈n röör ku diäär, ku mïth kor, ku mïth ë piacë dhiëëth, ago ciɛ̈n raanduön bï döŋ ë Juda?

⁸ Eeŋö ya wek Yɛn tɔ göth, në läm ya wek yiëth lam, ku yak yiëth kɔ̈k nyuöp wal ŋïr ë Rip eenë, të cä wek bɛ̈n ceŋ thïn? Ë we loi ee kënë ke we bï we röt riɔ̈ɔ̈k, ago juöör ke piny nɔm ëbɛ̈n, week aa luööi në abiaan, ku yek rinkun tɔ ee kë de aciɛɛn?

⁹ Cäk nïïm määr në karɛc wäänë kedhie, karɛc wään looi ë kuarkun keek në wuöt ke Juda yiic ku kuɛɛr ke Jeruthalem yiic, kak ë looi meliik ke Juda keek ë diëërken, ku kak ë luɔikï week ë diëërkun?

¹⁰ Ku agut cï ee köölë wek kën röt kuɔɔr piny. Wek kën ya riëëu, ku wek kën rɛ̈ɛ̈r në wɛ̈ɛ̈t de lööŋkï yiic, lööŋ cä gäm week ë kuarkun.

¹¹ “Ka Yɛn Bɛ̈nydït de rɛm, Nhialic de Yithriɛl, Yɛn bï rɔt pɔ̈k week ku riääk Juda ëbɛ̈n.

¹² Ku në biäk de kɔc ke Juda cï döŋ, ku acïk dhel nɔn bï kek lɔ ceŋ ë Rip, abä dhil kiëët nɔn bïï ë keek riɔ̈ɔ̈k kedhie. Abïk thou kedhie ë Rip, röördït, ku kɔc kor, abïk thou ë tɔŋ, ku nɔn ee cɔk. Kɔc abïk aa riɔ̈ɔ̈c në tïŋden, abï kɔc keek aa luööi në abiaan, ku tɔ rinken ee këde aciɛɛn.

¹³ Yɛn bï kɔc cëŋ ë Rip luöi këtuc, cït man cän Jeruthalem luöi këtuc, ë tɔŋ, ku cɔk ku jɔk.

¹⁴ Acïn raan töŋ de Juda cï döŋ cï lɔ Rip bïï lɔ ceŋ ëtɛ̈ɛ̈n bï ban ku nɔn bïï pïïr. Acïn raan töŋ bï rɔt pɔ̈k Juda ë keyiic, të kɔɔrkï bïk bɛ lɔ ceŋ thïn. Acïn raan töŋ bï rɔt puk, ee kɔc liaakäŋ cï kat tei.”

¹⁵ Ago röör kedhie, röör wën ŋic nɔn cïï diëërken yiëth kɔ̈k nyuöp wal ŋïr, ku lɔ diëër ë kääc ëtɛ̈ɛ̈n ëbɛ̈n, ee amatnɔm dït, ku lɔ kɔc ke Yithriɛl ë cëŋ në Pathroth piny ë Rip, gokï jam de Jeremia bɛ̈ɛ̈r an,

¹⁶ “Wo cï jam cï lɛ̈k wook ë rin ke Bɛ̈nydït rɛɛc gam.

¹⁷ Ku wo bï këriëëc ëbɛ̈n looi, kë cuk lueel an buk looi. Wok bï wal ŋïr nyuöp tiiŋ melik de paannhial, ku abuk wäl nɔm mɔ̈u, cït man ɣɔn ye wok ye looi në kuarkuɔ, ku meliikuɔ ku bänykuɔ ë wuöt ke Juda yiic ku kuɛɛr ke Jeruthalem yiic. Wok cï nïïm dɛ kacaam juëc, ku kuethku, ku aa cïn nuan ë nu.

¹⁸ Ku gɔl të wään pɛ̈l wok luöi ye wok tiiŋ melik de paannhial nyuöp wal ŋïr, ku pɛ̈lku luöi ye wok yen wäl nɔm mɔ̈u, wok cï nïïn bɛ̈n ciɛ̈n käŋ, ku kɔckuɔ acïk bɛ̈n thou ë tɔŋ ku në cɔk.”

¹⁹ Ago ë diäär bɛ lueel an, “Wään ye wok kuïn cï pam nyop, kuïn de yic tiiŋ melik de Paannhial cï käär, ku nyopku wal ŋïr, ku wɛ̈lku nɔm mɔ̈u, röörkuɔ acïk kë yok looi gam.”

²⁰ Aguɔ jɔ lɛ̈k röör ku diäär wën cï jamdï bɛ̈ɛ̈r në ee kueerë an,

²¹ “Ku në biäk de wal ŋïr yak nyop, week në kuarkun, ku meliikkun, ku bänykun, ku kɔc ke pänydït, miɔ̈c ɣɔn gamkï keek ë pɛ̈ɛ̈nydït ke Juda yiic ku në kuɛɛr ke Jeruthalem yiic, cäkkï ŋic nɔn ŋic ë Nhialic keek?

²² Yen ee köölë pinydun adhɔt ke cï riɔ̈ɔ̈k, ku acïn raan ceŋ en. Acï aa tëde riɔ̈ɔ̈c, ku ye kɔc lueel ke ya aciɛɛn, në luɔi cïï Bɛ̈nydït luɔiduön rac bï bɛ guum.

²³ Ku riääkkë aa bɔ̈ tëde week në biäk ya wek yiëth kɔ̈k nyuöp wal ŋïr, ku luöikï Bɛ̈nydït kërac, ku kɛ̈nkï lööŋke riëëu kedhie.”

²⁴ Guɔ lɛ̈k kɔc kedhie, ku lɛ̈k diäär ë gɔk, kën ë lueel Bɛ̈nydït, lɛ̈k kɔc ke Juda cëŋ ë Rip.

²⁵ Acïï Bɛ̈nydït de rɛm, Nhialic de Yithriɛl lueel an, “Week ku diëërkun, wek cï gutguut lɛ̈k tiiŋ melik de paannhial. Wek cï gutguut lueel, nɔn bä wek ye nyuöp wal ŋïr, ku wälkï nɔm miɔ̈c de mɔ̈u, ku wek cï gutguutdun döt. Apiɛth tei! Dötkï kuëëŋdun!

²⁶ Ku ënɔɔnë piɛŋkï kuëëŋdiën cä looi, Yɛn Bɛ̈nydït në rinkiën wärjäŋ, kuëëŋ lɛ̈k week wek kɔc ke Yithriɛl tɔ̈u ë Rip wedhie: an, acïn raan ë weyiic bï aa kuëëŋ ë rinkï an, ‘Yɛn kuëëŋ në rin Bɛ̈nydït Awärjäŋ pïïr!’

²⁷ Ku we bä tiit ke we cïï bï kuɛth, ku wek bïï keek riɔ̈ɔ̈k. We bï thou wedhie, në cɔk ku nɔn ee jɔk, abïï ciɛ̈n raan töŋ bï döŋ ë we yiic.

²⁸ Ku kɔc liaakäŋ ë weyiic abïk poth ë thuɔɔu thok, ku abïk bɛ̈n ciëën ë Rip lekkï Juda. Ku abïï kɔc pïïr jɔ ŋic ee jam de ŋa yen cïï aa yic, ee këdï ku ee këden.

²⁹ Yɛn Bɛ̈nydït, we bä nyuöth kïn bän we luöi këtuc ee tënë, ku thöndiën cä lueel nɔn bän we luöi këtuc abï ya yic.

³⁰ Yɛn bï Ɣopra melik de Rip gäm kɔc de ater në yen, ku abä gäm kɔc kɔɔr bïk yen nɔ̈k, cït man wään cän Dhedekia melik de Juda gäm Nebukadnedhar melik de Babilonia, aaye raan de aterde ku aa kɔɔr bï yen nɔ̈k.”