Jeremia 43 - JAM DE NHIALIC 2011

Jeremia Aleerë Rip

¹ Na wën aacï Jeremia jɔ thök ë jam ke kɔc kedhie, ku cï ke lɛ̈k wël ke Bɛ̈nydït Nhialicden kedhie, wël ë tooc ë Bɛ̈nydït Nhialicden Jeremia bï lɛ̈k keek.

² Go Adharia wën de Ɣocaya, ku Joɣanan wën de Karia, ku lɔ röör cïn piɔ̈ɔ̈th kedhie, gokï ya yɔ̈ɔ̈k an, “Yïn tör käŋ! Bɛ̈nydït Nhialicda akën yïn tooc bä bɛ̈n lɛ̈k wook an, duökï lɔ Rip ku bäk lɔ ceŋ ëtɛ̈ɛ̈n.

³ Ee Baruk wën de Neria ee yen ë yɔ̈ɔ̈k yïn, bä ee kënë lueel. Akɔɔr luöi bïï kɔc ke Babilon wo peec, agokï wook lɛɛr Babilonia ku nɔn nɛ̈kkï wook.”

⁴ Ago Joɣanan wën de Karia, ku bäny ke rɛm ke tɔŋ kedhie, ku kɔc kedhie, akënkï röl de Bɛ̈nydït bɛ̈n piŋ ë luöi bï kek rëër piny de Juda.

⁵ Na wën ke Joɣanan wën ë Karia ku bäny ke rem de tɔŋ kedhie, agokï kɔc cï döŋ Juda lɛɛr Rip kedhie, mɛ̈tkï ëtök në kɔc ë cï röt puk ë juööriic, juöör ɣɔn cï kek thiɛ̈i thïn.

⁶ Gokï röör, ku diäär, ku mïth, ku duet ke melik jɔt. Ku jɔtkï kɔc kedhie kɔc wään cïï Nebudharadan bɛ̈ny tueŋ de rem de tɔŋ nyäŋ Gadalia bïï ke tiit, ayï Baruk kekë tiët Jeremia.

⁷ Agokï jɔ lɔ piny de Rip, në luöi kën kek röl de Bɛ̈nydït riëëu. Gokï jɔ ɣet pänydït de Tapaneth.

⁸ Na wën, go ë Bɛ̈nydït lɛ̈k ɛn në Tapaneth an,

⁹ “Nöm kurdït në yïciin ke kɔc kɔ̈k Juda ë ke daai, ku kuöt ë keek nïïm ë tönyic ë ɣön de melik ë Rip thok në Tapaneth.

¹⁰ Ku lɛ̈kë keek an, Yɛn Bɛ̈nydït de rɛm, Nhialic de Yithriɛl, Yɛn bï lïmdï Nebukadnedhar melik de Babilonia bɛ̈ɛ̈i ee tënë, ku abï thööcde tääu ee kurkë nïïm, kur cäk keek kuöt nïïmë, ku abï paany de bääny thiɛth ë kenïïm.

¹¹ Nebukadnedhar abï bɛ̈n ku riëëk piny de Rip. Ku gɛm kɔc cï gäm thuɔɔu ë jɔk abïk lɔ thou, ku kɔc cï gäm pɛ̈c, abïï ke peec, ku kɔc cï gäm nääk, abïk ke nɔ̈k ë abätäu.

¹² Abï luɛ̈k ke yiëth ke Rip ɣɔ̈k mac, ku nyop ke piny, ku peec keek ke ke mac, ku abï piny de Rip kuany ke piɛth, cït man ye raan ee tïït lupɔde kuany ku teŋ ë nuöön, ku abï jɔ jäl ëtɛ̈ɛ̈n ë mät.

¹³ Abï wai yaath ke Ɣeliopolith riɔ̈ɔ̈k, wai nu piny ë Rip, ku abï luɛ̈k ke yiëth ke Rip nyuɔp piny ë mac.”