Jeremia 41 - JAM DE NHIALIC 2011

¹ Në pɛɛi de dhorou në ee ruöönë yic, go Yicmiɛl wën de Nethania wën de wën ë Elicama, raan de dhiën ë bɛ̈ny, ku ye raan töŋ ë bɛ̈ny de rem ë melik, go lɔ Midhpa kekë röör kathiëër lek Gadalia tïŋ. Të wën ŋoot en ke ke cäm ëtök kedhie,

² go Yicmiɛl kekë röör kathiëër ë cath ë yen ëtök abätɛ̈ɛ̈uken wɛ̈ɛ̈th bei ku nɛ̈kkï Gadalia, raan cïï Babilonia tɔ ye bɛ̈ny.

³ Go Yicmiɛl kɔc ke Judai wään rɛ̈ɛ̈r ë Gadalia ëtök ë Midhpa nɔ̈k kedhie, ku nɛ̈k rem de tɔŋ ë Babilonia ë rëër ëtɛ̈ɛ̈n.

⁴ Ku në kööldäŋë ke kɔc ë ke ŋoot ke ke kën luöi cï ë Gadalia nɔ̈k ŋic,

⁵ go röör kathiërbɛ̈t bɛ̈n në Cekem, ku Cilo, ku Thamaria. Acïk nhïm de kethook muut, ku retkï lupɔɔken yiic, ku ŋuëëtkï kegup. Aake bïï rap ku wal ŋïr bïk bɛ̈n gam ë Luaŋdït yic.

⁶ Go Yicmiɛl lɔ biic ë Midhpa lɔ ke loor nïïm, aa lɔ ke dhiau. Wën cï yen ɣet ë kelɔ̈m, ke lueel an, “wäthii bäk tiëŋkï Gadalia.”

⁷ Ku të wën cï kek ɣet ë pänydïtic, go Yicmiɛl kekë kɔc ke nɔ̈k, ku cuɛt gupken ë yithic.

⁸ Ku aade röör kathiëër në kɔc yiic, röör cï ye lëk Yicmiɛl an, “Du wo näk mɔny! Wo de nïïm agamɔ, ku barli, ku miök de olip, ku miök de kiëc cuk thiaan ë duum yiic.” Ago keek pɔ̈l.

⁹ Ku yïnh ë cuɛt Yicmiɛl kɔc cï ke nɔ̈k thïn, aaye yinh dït, yinh wään wec ë melik Atha, wään cïï Baaca melik de Yithriɛl ye mak. Yicmiɛl acï yith bɛ̈n thiɔ̈ɔ̈ŋ ë kɔc cï thou.

¹⁰ Ku jɔ duet ke melik mac, ku mɛc kɔc ë tɔ̈u ë Midhpa kedhie, kɔc cï Nebudharadan bɛ̈ny tueŋ de rem tääu në Gadalia cök. Go Yicmiɛl keek jɔt ke ke mac ku jiël ke wel enɔm piny de Ammon.

¹¹ Go Joɣanan kekë bäny ke rem de tɔŋ rëër ë yen kërɛɛc cïï Yicmiɛl looi piŋ.

¹² Agokï Yicmiɛl kuany cök në röörkɛn ke tɔŋ ku gïthkï tëthiääk ke pul dïït nu ë Gibiɔn.

¹³ Na wën cï kɔc cï Yicmiɛl ke mac Joɣanan tïŋ kekë bäny ke rem de tɔŋ cath ë yen, acïk piɔ̈ɔ̈th bɛ̈n miɛt,

¹⁴ gokï röt puk ku kɔtkï lekï tënu kek.

¹⁵ Go Yicmiɛl kekë kɔcke kabɛ̈t kat, ku bɛ̈nkï ke ke lɔ piny de Ammon.

¹⁶ Go Joɣanan kekë bäny ke rɛm, kɔc cï Yicmiɛl ke jɔt në Midhpa ke ke mac wään cï yen Gadalia nɔ̈k nööm, rem de tɔŋ, ku diäär, ku mïth, ku rooc.

¹⁷ Gokï lɔ Rip, në luöi bï kek kat në kɔc ke Babilonia. Ku në kueerden yic acïk bɛ̈n lɔ piɔ̈ɔ̈t në Kimɣam, tëthiääk ke Bethleɣem.

¹⁸ Aake riɔ̈c në kɔc ke Babilonia, në biäk cï Yicmiɛl wën de Nethania Gadalia nɔ̈k, raan cï melik de Babilonia tɔ ye bɛ̈ny mac baai.