Jeremia 40 - JAM DE NHIALIC 2011

Jeremia arëër kekë Gadalia

¹ Go Bɛ̈nydït jam ke yɛn, ɣɔn cïï Nebudharadan bɛ̈ny de rem ya lony në Rama. Yɛn aacï lɛɛr ëtɛ̈ɛ̈n ke ya mac, wokë kɔc kɔ̈k ke Jeruthalem ku kɔc ke Juda ëtök, kɔc wään leerë keek Babilonia ke ke mac.

² Go bɛ̈ny de rem ya lɛɛr tëdäŋ ku lueel an, “Acïï Bɛ̈nydït Nhialic lueel nɔn bï yen ee pinyë riɔ̈ɔ̈k,

³ ku ënɔɔnë acï kë cï lueel an bï looi looi. Kakë kedhie aake loi röt në biäk cïï kɔckun karɛc luöi Bɛ̈nydït ku rɛɛckï riëëu.

⁴ Ënɔɔnë, yɛn bïï joth bei në yïcin ku luɔny yïn. Na kɔɔr bä lɔ Babilonia we yɛn, wok duëër lɔ, ku yïn bï lɔ rëër we yɛn, ku na cïï kɔɔr bä lɔ, yïn duëër döŋ. Piny ëbɛ̈n ee këdu, yïn duɛ̈ɛ̈r lɔc, ku bä lɔ tëduön kɔɔr ë yïpiɔ̈u.”

⁵ Wën kɛ̈n yɛn këde bɛ̈ɛ̈r, go Nebudharadan lueel an, “Lɔɔr tëde Gadalia, wën de Aɣikam ku ye wën de wën ë Capan, raan cïï melik de Babilonia tɔ ee bɛ̈ny mac wuöt ke Juda. Yïn duëër rëër we yen ku rëërë ë kɔc yiic, ku nɔn lɔɔr të ye kɔɔr ë yïpiɔ̈u.” Go yɛn gäm miɔ̈c ku këcam bä jɔt ke yɛn, ku tɔ yɛn lɔ në kueerdï yic.

⁶ Guɔ lɔ rëër wokë Gadalia ë Midhpa, ku rɛ̈ɛ̈r në kɔc yiic, kɔc wään cï döŋ piny.

Gadalia ee Bɛ̈ny de Juda

⁷ Ku remdäŋ ë tɔŋ ku lɔ bäny kɔ̈k ke Juda aake kën röt gam. Acïk piŋ nɔn cïï melik de Babilonia Gadalia tɔ ee bɛ̈ny de Juda, ku tɔ ee bɛ̈ny de kɔc kedhie kɔc kën ë keek lɛɛr Babilonia, kɔc ke piny kuanynyïïn.

⁸ Go Yicmiɛl wën de Nethania, ku Joɣanan wën de Karia, ku Theraya wën de Tanɣumeth, ku wɛ̈ɛ̈t ke Epai raan de Netopa, ku Jedhania raan de Maaka, gokï lɔ në kɔcken tëde Gadalia ë Midhpa.

⁹ Go Gadalia lɛ̈k keek an, “Wek cä lëk jamdï an, acïn kë duëër week tɔ riɔ̈c ë luɔi bä wek röt gäm kɔc ke Babilonia. Ɣapkï ee pinyë, ku luööikï melik de Babilonia, ku käŋ kedhie abïk piath tëde week.

¹⁰ Yɛn guöpdï, yɛn bï rëër në Midhpa ku bä aa jam ë biäkdun të le kɔc ke Babilonia bɛ̈n eenë. Ku wek duëër mäu määtiic, ku mïth ke tiim amäi, ku miök de olip, ku rɛ̈ɛ̈rkï në wuötkuön ceŋkï keek yiic.”

¹¹ Na wën ke piŋ ë kɔc ke Judai kedhie, kɔc rɛ̈ɛ̈r ë Mowap, ku Ammon, ku Edom, ku wuöt kɔ̈k yiic, nɔn cïï melik de Babilonia kɔc ke Yithriɛl kɔ̈k tɔ rëër ë Juda, ku luɔi cï yen Gadalia tɔ ee bɛ̈ny.

¹² Go Judai ëbɛ̈n ɣään wään cïï ë keek thiäi thïn nyääŋ piny, ku pukkï röt Juda. Gokï bɛ̈n tëde Gadalia ë Midhpa, ku ëtɛ̈ɛ̈n jɔkï mɔ̈n dït kekë mïth ke tiim amäi määtiic.

Gadalia acï Nɔ̈k

¹³ Në ee kënë cök, go Joɣanan ku bäny ke rem de tɔŋ wään kën röt gam bɛ̈n tëde Gadalia ë Midhpa

¹⁴ ku lëkkï yen an, “Ŋic nɔn cï Baalith melik de Ammon yïn tuöc Yicmiɛl bïï yïn bɛ̈n nɔ̈k?” Ku akën ë Gadalia bɛ̈n gam.

¹⁵ Na wën ke lëk ë Joɣanan yen tëden kapäc an, “Tɔ yɛn lɔ bä Yicmiɛl lɔ nɔ̈k, ku acïn raan bï raan ë näk en ŋic. Eeŋö duëërë yen pɔ̈l anäk yïn? Kënë aduëër kɔc ke Judai cï kenïïm kut ë yïlɔ̈ɔ̈m tɔ thiäi, ku abï riääkdït yiɛ̈n kɔc kedhie kɔc lik cï döŋ ë Juda.”

¹⁶ Ku acïï Gadalia bɛ̈n bɛ̈ɛ̈r an, “Du loi! Kë luel ë biäk de Yicmiɛl acie yic!”