Jeremia 4 - JAM DE NHIALIC 2011

Cɔ̈t de Päl Awɛ̈ɛ̈c

¹ Aye Bɛ̈nydït lueel an, “Kɔc ke Yithriɛl, na kaarkï bäk bɛ̈n ciëën ke we puk röt Ɛn. Ku nyaaikï yiëthkuön maan ku takï wepiɔ̈ɔ̈th adööt në Yɛn,

² ke aduëër piath bäk röt kuëëŋ në rinkï. Ke juöör kedhie abïk athiɛɛi aa thiëëc tëde Ɛn ku abïk Ɛn aa piɔɔny.”

³ Aye Bɛ̈nydït lueel lɛ̈k kɔc ke Juda ku Jeruthalem an, “Pɔ̈ɔ̈rkï duumkuön kɛ̈nkï ke puur, duökï kɔ̈thkun com në kuɔɔth yiic.

⁴ Mɔ̈kkï mändun në Yɛn Bɛ̈nydïtdun, ku gämkï röt Ɛn, wek kɔc ke Juda ku Jeruthalem. Na cäk ye lɔ looi ke agönhdï abï dëp cït mac në biäk de awɛ̈ɛ̈c cäk looi, abï dëp ku abï ciën raan liiu en.”

Juda Acï Riääc në Pɛ̈c

⁵ Kuɔthkï kɛŋ në baai yic ëbɛ̈n! Wuɔukï në röldït lɔ gɔk! Lɛ̈kkï kɔc ke Juda kekë Jeruthalem bïk kat ke ke lɔ në pɛ̈ɛ̈nydït cï gël yiic.

⁶ Nyuɔthkï kueer lɔ Dhiɔn! Kuɔnykï röt wei! Duökï gääu! Bɛ̈nydït abïï riääk, riäŋdïït bɔ̈ në biäk të lɔ rut.

⁷ Acït köör bɔ̈ biic tëdɛn ë thiaan, kën ee juöör riɔ̈ɔ̈k acï bɛ̈n bei. Abï Juda bɛ̈n riɔ̈ɔ̈k. Pɛ̈ɛ̈nydït ke Juda abïï keek nyääŋ piny ke ke cï riääk, ku acïn raan bï ke cieŋ.

⁸ Ka tääukï lupɔɔ ke cual në we kɔ̈ɔ̈th, ku dhiaukï, ku dhuöörkï, në biäk kën agönh tuc de Bɛ̈nydït thök, akën rɔt yal wei në Juda.

⁹ Go Bɛ̈nydït lueel an, “Në ye köölë, meliik ku bäny, abïk piɔ̈ɔ̈th bäp, ku bäny ke kake Nhialic abïk päu, ku gäi tït.”

¹⁰ Ku ja lueel an, “Bɛ̈nydït Awärjäŋ Yïn cï kɔc ke Jeruthalem math taitai, acï lueel an, abïk dɛk mät ku ee abätäu yen atɔ̈u në keröt.”

¹¹ Akööl abïkï, akööl bïï ë kɔc ke Jeruthalem yɔ̈ɔ̈k në biäk bï yomdïït bɔ̈ në jɔ̈ɔ̈ric bɛ̈n ke bɔ̈ tëde keek. Acïï bï ya yom thiin wën ee ayiɛl gɔp,

¹² yom bï bɛ̈n në jam de Bɛ̈nydït, abï bɛ̈n ke yomdïït ril ë tör wär kënë! Ee yom ë bïï Bɛ̈nydït guöpde raan lui kɔcke këtuc.

Juda acï ë Kɔc ke Ater Gɛɛu Cil

¹³ Tïŋ, kɔc ke ater abïkï cï luäät. Abëëlkɛn ke tɔŋ acïtkï kɔɔr, ku jöŋgöörken apiɔlkï cï cor. Amawoou, wok cï määr! Wok cï thou!

¹⁴ Yïn Jeruthalem waakë rɛ̈ɛ̈c tɔ̈u në yïpiɔ̈u wei, ke yï bï kony. Bä jɔ ŋoot ke yï tak karɛc agut cï nɛn?

¹⁵ Tuuc abïkï në pänydït ë Dan ku në piny ë kuur de Eparaim nïïm ke ke cɛɛl thoŋ rac.

¹⁶ Abïk juöör bɛ̈n jɔ̈ɔ̈ny ku lëkkï Jeruthalem nɔn bïï kɔc ke ater piny mec. Kek kɔc ke ater abïkï ke ke wuou ku lɛ̈ɛ̈tkï pɛ̈ɛ̈nydït ke Juda

¹⁷ ku abïk pänydït de Jeruthalem tuɔɔk, cï kɔc tit dom, në biäk cïï kɔcke Bɛ̈nydït rɛɛc. Acïï Bɛ̈nydït lueel.

¹⁸ Juda, yïn cï ee kënë luöi rɔt yïtök në kueerduön ee yïn pïïr, ku në biäk de kakuön cï looi. Karɛcku acïk yïn tɔ nuan, acïk yïn gut piɔ̈u.

Jeremia Adhiau Piɔ̈u në Biäk de Kɔcke

¹⁹ Arɛɛm! Yɛn cïï arɛɛm bï lëu në guöm! Ya piɔ̈u! Yɛn cï piɔ̈u lɔ lik arëët! Yɛn cïï duëër mim, yɛn cï röl de kɛŋ piŋ akoth, ku awuɔɔu de tɔŋ.

²⁰ Riäŋë ee bɛ̈n në riäŋë cök, piny ëbɛ̈n acï döŋ ke cï riääk. Ago pɛɛnykuɔ riɔ̈ɔ̈k ëthiäu aya, ku retë lupɔɔ ke awëërken nyïïn, ku temë keek.

²¹ Agut cï nɛn yen bän tɔŋ aa tïŋ ke näk kɔc, ku piɛŋ röl de kɛŋ koth?

²² Aye Bɛ̈nydït lueel an, “Kɔckï apiɔlkï piɔ̈ɔ̈th, akuckï Yɛn. Acïtkï mïth piɔl piɔ̈ɔ̈th, acïnkï ŋïny de käŋ. Keek ayek atëët ke luɔi de kërac, ku ayek löny në luɔi de këpiɛth.”

Nyuuth de Jeremia në biäk de Riäŋ bɔ̈

²³ Yɛn cï piny tïŋ ke ye riaaŋ cïn kë ye yök thïn, ku të nhial acïn ɣɛɛr.

²⁴ Ku tiëŋ kur ke ke lɛthë, ku kur kor ayek röt jäp ciëën ku tueŋ.

²⁵ Ku tiëŋ piny ke cïn kɔc nu, agut cï diɛt acïk päär.

²⁶ Piny wään ee luɔk acï rɔt puk ke ye jɔ̈ɔ̈r, pɛ̈ɛ̈nydïtke acï ke riɔ̈ɔ̈k në biäk de agönh tuc de Bɛ̈nydït.

²⁷ (Aa cïï Bɛ̈nydït lueel nɔn bïï piny nɔm aa dhuur, ku lueel nɔn cïï Yen en bï riɔ̈ɔ̈k taitai.)

²⁸ Piny nɔm abï dhuöör ku nhial abï aa mɔ̈ɔ̈th. Acïï Bɛ̈nydït lueel, ku acïï Yenɔm bï waar. Acï löŋde tääu piny ku acïï bï dak nɔm ciëën.

²⁹ Në awuööu de kɔc ke jöŋgöör, ku kɔc ke dhɛ̈ŋ raan ëbɛ̈n abï kat. Kɔc kɔ̈k abïk kenïïm cɔ̈k roor, ku kɔc kɔ̈k abïk lɔ ë kur nïïm. Wuöt ëbɛ̈n abïk döŋ ke ke cïn yiic kɔc, ku acïn raan bï ke bɛ cieŋ.

³⁰ Amawoou Jeruthalem! Eeŋö ee yïn cieŋ ë lupɔ amujuŋ thith? Eeŋö ee yïn adhɛ̈p tääu ku giit yïnyin? Yïn tɔ rɔt läk ke cïn kë bä yök thïn! Kɔc nhiaar yïn acïk yïn rɛɛc ku kɔɔrkï bïk yï nɔ̈k.

³¹ Yɛn cï dhiëëu piŋ, cït dhiën de tiiŋ rɔ̈p, ee kiɛɛu cït kiɛɛu de nyan kaai. Ee kiɛɛu de pänydït de nyan de Dhiɔn, ee wëi gap nhial, ee yeciin riny ke lueel an, “Amawoou, yɛn cï thou! Abïk yɛn bɛ̈n nɔ̈k!”