Jeremia 39 - JAM DE NHIALIC 2011

Wïïk de Jeruthalem

¹ Në pɛɛi de thiëër në ruöön de dhoŋuan, wään ye Dhedekia melik de Juda, go Nebukadnedhar melik de Babilonia bɛ̈n kekë remdɛn ë tɔŋ ëbɛ̈n ku mɛk Jeruthalem.

² Në kööl de dhoŋuan në pɛɛi ë ŋuan yic, në ruöön ye Dhedekia run thiëër ku tök ke ee melik, kɛ̈l ke pänydït aa cï keek thuur kɔ̈ɔ̈th.

³ (Wään cï ë Jeruthalem peec, go bäny ke melik de Babilonia bɛ̈n kedhie ku dɔmkï ɣäänken në kal thok, thoŋ cil, adekï yiic yï Nergal Tharedher, ku Thamgar Nebo, ku Tharthekim de Rabathath, ku lɔ Nergal Tharedher däŋë.)

⁴ Wën cï Dhedekia melik kekë bänyke kedhie kë loi rɔt tïŋ, gokï them luɔi bïï kek röt kual wei ë pänydïtic wakɔ̈u. Gokï tëëk në kueer ë dom ë bääny, tëkkï në kaam de kueer ee kɛ̈l kaarou rek, ku jɔkï röt kual ë kueer të lɔ wak de Jordanic.

⁵ Go rem de tɔŋ de kɔc ke Babilonia ke cop, agokï Dhedekia lɔ dɔm në riaaŋ thiääk ke Jeriko. Agokï yiɛ̈n Nebukadnedhar melik de Babilonia, ke rëër në pänydït de Ribila piny de Ɣamath, go Nebukadnedhar löŋde teem ëtɛ̈ɛ̈n.

⁶ Go wɛ̈ɛ̈t ke Dhedekia tɔ näk ë Ribila ëtɛ̈ɛ̈n ke ke woi Dhedekia keek, ku nɛ̈k bäny ke Juda ayadäŋ.

⁷ Ku në ee kakë cök, ke tɔ nyïïn ke Dhedekia luëlë bei, ku tɔ rek në joth ke bïï lɛɛr Babilonia.

⁸ Ku ëtɛ̈ɛ̈n, kɔc ke Babilonia acïk ɣön de bääny bɛ̈n nyuɔp piny, ku nyopkï ɣööt ke kɔc, ku jiëpkï kal de Jeruthalem piny.

⁹ Ku kë ciëën, go Nebudharadan bɛ̈ny tueŋ de rem, kɔc wën cï döŋ ë pänydïtic jɔt ëtök në kɔc cï röt mät yen, leer keek Babilonia ke ke mac.

¹⁰ Go Nebudharadan kɔc lik kuanynyïïn nyääŋ piny de Juda, kɔc cïn nïïm käŋ, ago ke gäm tiim ke enap ku duum.

Luny de Jeremia

¹¹ Na wën ke Nebukadnedhar melik ë yɔ̈ɔ̈k Nebudharadan bɛ̈ny tueŋ de rem de tɔŋ, bïï ee lööŋkë tääu piny an:

¹² “Lɔ kɔɔr Jeremia ku tiit apiɛth. Du lui kërac, ku luöiyë kë ye kɔɔr ëbɛ̈n.”

¹³ Go Nebudharadan kekë bäny tueŋ ëtök, yï Nebucadhban de Rabathath, ku Nergal Tharedher, ku bäny ke rem de tɔŋ de melik de Babilonia kɔ̈kë kedhie,

¹⁴ gokï yɛn bɛ̈ɛ̈i bei ë ɣön ë bääny yic. Ku tɔkï ya tiit ë Gedalia wën de Aɣikam, ku ye wën de wën ë Capan, raan ee yen bï yɛn lɛɛr baai apiɛth. Aguɔ jɔ rëër ëtɛ̈ɛ̈n ë kɔc yiic.

Aŋäth në Biäk de Ebedmelek

¹⁵ Të wään ŋuɔɔt ɛn ke ya mac ɣön ë bääny, go ë Bɛ̈nydït lɛ̈k yɛn

¹⁶ bä Ebedmelek lɔ yɔ̈ɔ̈k raan de Ethiopia nɔn cï Bɛ̈nydït de rɛm, Nhialic de Yithriɛl ye lueel an, “Cï man cän ye lueel, abä looi, yɛn bï ee pänydïïtë yiɛ̈n riääk ke cie kuɛth. Ku të le ee kënë rɔt looi, yïn bï tɔ̈u ëtɛ̈ɛ̈n ke bä tïŋ.

¹⁷ Ku Yɛn Bɛ̈nydït, yïn bä gël, ku yïn cïï bï gäm kɔc ee yïn riɔ̈ɔ̈c ë keek.

¹⁸ Yïn bä muk apiɛth, ku yïn cïï bï nɔ̈k. Yïn bï ban we wëiku, në biäk cï yïn Yɛn ŋɔ̈ɔ̈th. Acä lueel, Yɛn Bɛ̈nydït.”