Jeremia 38 - JAM DE NHIALIC 2011

Jeremia Anu ë Yinh Cïnic Pïïuwic

¹ Go Cepatia wën de Matan, ku Gedalia wën de Pacur, ku Jeɣukal wën de Celemia, ku Pacur wën de Malekia, ye piŋ nɔn yan kɔc yɔ̈ɔ̈k,

² nɔn cïï Bɛ̈nydït ye lueel an, “Raan lɔ rëër ë pänydïtic abï thou në cɔk ku nɔn ee jɔk, ku kɔc lɔ lɔ biic, ku gëmkï röt kɔc ke Babilonia, acïï keek bï nɔ̈k, abïk ban në wëiken.”

³ Ku aa lɛ̈k keek ayadäŋ an acïï Bɛ̈nydït lueel an, “Yɛn lɔ pänydït gäm rem de tɔŋ de Babilonia, ku abïk peec.”

⁴ Go bäny lɔ tëde melik ku luelkï an, “Yen ee monyë abï dhil nɔ̈k. Në ee jam jiɛɛm en, abï rem de tɔŋ nu ë pänydïtic tɔ pɛ̈l röt wei, ku alui kë cït ee kënë raan ëbɛ̈n, raan cï döŋ ë pänydïtic. Acïï kɔɔr bïï kɔc kony, akɔɔr bï ke luöi buɔ̈t.”

⁵ Go melik Dhedekia bɛ̈ɛ̈r an, “Apiɛth, luɔikï kë kaarkï bäk luöi yen, wek cä bï dɔ̈m kɔ̈ɔ̈c.”

⁶ Agokï yɛn dɔm ku luɛɛikï yɛn piny në wïïn yithic, yinh de wën melik Malekia yic, yinh ë tɔ̈u ë kal ë bääny yic. Aa cïn pïïu ë yithic, aaye tiɔ̈k yetök, guɔ lɔ piny ë tiɔ̈kic.

⁷ Na wën ke Ebedmelek, raan de Kuc, ee roc lui ɣön ë bääny yic, acï piŋ nɔn cï kek yɛn tääu ë yithic. Ku kaamë, melik aa loi gööny në Kal Thoŋ de Benjamin.

⁸ Go Ebedmelek lɔ ëtɛ̈ɛ̈n ku lëk melik an,

⁹ “Yïn melik, kë cï ee kɔckë looi ee awäc. Acïk tiët Jeremia tääu ë yithic, ku abï thou ëtɛ̈ɛ̈n në cɔk, në biäk cïn en këcam be nu ë pänydïtic.”

¹⁰ Go melik Ebedmelek yɔ̈ɔ̈k raan de Kuc, bï röör kadiäk jɔt ë yen, bïk tiët Jeremia lɔ bɛ̈ɛ̈i bei ë yithic, të kën en guɔ thou.

¹¹ Go Ebedmelek lɔ kekë röör ɣön ye kake bääny tɔ̈ɔ̈u, go lupɔɔ kɔ̈k cï riääk yök, go ke luaai piny të nu Jeremia në wïïn.

¹² Go Ebedmelek raan de Kuc, Jeremia yɔ̈ɔ̈k bä anuɛɛr tääu në yerɔ̈th, ago wïïn ye cï bï gäm buɔ̈t. Ago ee kënë looi,

¹³ agokï Jeremia miëët bei ë yithic. Ku në ee kënë cök Jeremia acï bɛ̈n tɔ̈u ë kal ë bääny yic.

Dhedekia Alop Täk tëde Jeremia

¹⁴ Në kööl däŋ go melik Dhedekia tiët Jeremia tɔ yïn ë yen, në kal de diäk thok në Luaŋdït yic, ago lueel an, “Yïn bä luɔp ë lop tök, ku yïn kaar bä ya lɛ̈k yic.”

¹⁵ Ago Jeremia bɛ̈ɛ̈r an, “Na laar yïn lɔ lɛ̈k yic, yïn bï yɛn nɔ̈k, ku na de kë lɛ̈k yïn acïn kë bä looi.”

¹⁶ Go melik Dhedekia Jeremia lɛ̈k gutguut ë cuëër an, “Yɛn cï kuëëŋ në rin ke Nhialic pïïr, Nhialic ee wook gäm pïïr, nɔn cän yïn bï nɔ̈k, ku yïn cä bï gäm kɔc kɔɔr bïk yïn nɔ̈k.”

¹⁷ Aguɔ lɛ̈k Dhedekia nɔn cïï Bɛ̈nydït Awärjäŋ, Nhialic de Yithriɛl ye lueel an, “Na lɔ rɔt lɔ gäm bäny ke rem de tɔŋ de melik de Babilonia, ke yïn bï pïïr, ku pänydïïtë acïï bï nyuɔp piny. Yïn wekë baaidu wedhie wek bï pïïr.”

¹⁸ Ku na kën ë rɔt gam, ka ee pänydïïtë abïï gäm kɔc ke Babilonia, ku abïk nyuɔp piny, ku yïn cïï bï ban tëde keek.”

¹⁹ Go ë melik bɛ̈ɛ̈r an, “Yɛn riɔ̈c në kɔc ke Judai, kɔc cï röt gäm kɔc ke Babilonia. Yɛn bïï gäm keek ku kurkï yɛn.”

²⁰ Aguɔ lueel an, “Yïn cïï bïï gäm keek. Yïn läŋ bä kë cï Bɛ̈nydït lueel riëëu, ku käŋ kedhie abïk piath tëde yïn, ku wëiku abïï ke kony.

²¹ Ku Bɛ̈nydït acï ya nyuöth kë bï rɔt looi ë nyuuthic të kën yïn rɔt gam.

²² Në nyuuth yic, yɛn cï diäär wään cï döŋ ɣön ë bääny ë Juda yic ëbɛ̈n, tïŋ ke ke yïn ë keek bäny ke rem de tɔŋ ë Babilonia. Piŋ kë luelkï të jɔ kek lɔ ke ke cath an: ‘Melik acïï määthkɛn piath math, acïk melik tɔ piŋ këden. Ku ënɔɔnë cökke acïk nuɛt ë tiɔ̈kic, acïï ë määthke nyääŋ piny.’ ”

²³ Aguɔ jɔ bɛ lueel an, “Diäärkun kedhie ku mïthkun abïï keek lɛɛr biic tëde kɔc ke Babilonia, ku yïn guöpdu yïn cïï bï ban tëde keek. Wek bïï jɔt ke we mac në melik de Babilonia, ku pänydïïtë abïï nyuɔp piny.”

²⁴ Go Dhedekia bɛ̈ɛ̈r an, “Du ee jamë tɔ piŋ ë kɔc kɔ̈k, ke yï cïï bïï nɔ̈k.

²⁵ Ku na le ë bäny piŋ nɔn cän jam wo yïn, abïk bɛ̈n ku lopkï yïn ë kën ë luelku. Abïk yïn lɛ̈k gutguut nɔn cïï kek yïn bï nɔ̈k, na lɔ keek lɔ lɛ̈k këriëëc ëbɛ̈n.

²⁶ lɛ̈kë keek, nɔn ë lim yïn yɛn, ke yï cä bï bɛ pɔ̈k nɔm alooc yic bä lɔ thou ëtɛ̈ɛ̈n.”

²⁷ Ago bäny kedhie bɛ̈n tëde yɛn ku lopkï yɛn, guɔ keek lëk kë cïï melik lɛ̈k yɛn ë dhek. Go ciën kë be kï looi, në biäk cïn yen raan cï jam piŋ.

²⁸ Ago yɛn jɔ muk ɣön ë bääny yic agut cï kööl ɣɔn bï ë Jeruthalem peec.