Jeremia 37 - JAM DE NHIALIC 2011

Kë Kɔɔr ë Dhedekia Tëde Jeremia

¹ Go Nebukadnedhar melik de Babilonia Dhedekia wën de Jothia tɔ ee melik de Juda, në nyin de Jekonia wën de Jeɣoyakim yic.

² Ku Dhedekia kekë bänyke ku kɔc, akënkï jam de Bɛ̈nydït bɛ̈n riëëu, jamdɛn cï gäm tiët Jeremia.

³ Na wën ke melik Dhedekia, ë toc Jeɣukal wën de Celemia, ku Dhepania wën de Maathia, bɛ̈ny de kake Nhialic, bïk tiët Jeremia luɔp në luöi bï yen Bɛ̈nydït Nhialicda lɔ̈ŋ, në biäk ë jurda.

⁴ Ku Jeremia aa ŋoot ke kënë tääu në aloocic, aaye cath ë nɔm lääu ë kɔc yiic.

⁵ Ku rem de tɔŋ ë Babilonia aake took Jeruthalem, ku wën cï kek ye piŋ nɔn cïï rem de tɔŋ de Rip aken de Rip teem kɔ̈u, gokï lɔ ciëën.

⁶ Go Bɛ̈nydït, Nhialic de Yithriɛl tiët Jeremia yɔ̈ɔ̈k an,

⁷ bï lɔ lɛ̈k Dhedekia an, “Rem de tɔŋ de Rip anu kueer ke bï yïn bɛ̈n kony, ku abï rɔt pɔ̈k wunden.

⁸ Ku Babilonia abï bɛ̈n ciëën, ku mɛk pänydït, ku peec, ku nyop piny.

⁹ Ku Yɛn Bɛ̈nydït, wek jääny, duökï röt mɛth, në täŋdunic an cïï kɔc ke Babilonia bï bɛ bɛ̈n ciëën, abïk bɛ̈n.

¹⁰ Cakaa wek ë tiam rem de tɔŋ ë Babilonia ëbɛ̈n, abï kɔc de gup tëtöök döŋ, ke ke nin ë pɛɛnyken yiic, kek ee röörkë abïk ŋoot ke ke jɔt röt ku nyopkï pänydït piny.”

Jeremia acï Dɔm ku Mac

¹¹ Go rem de tɔŋ de Babilonia lɔ ciëën në biäk le ë rem de tɔŋ ë Rip ke bɔ̈.

¹² Aguɔ Jeruthalem nyääŋ piny ku laar piny de Benjamin bä biäkdï lɔ nööm në kake baai yiic.

¹³ Ku të wën cuööp en Kal Thoŋ ë Benjamin, go bɛ̈ny ë rem de tɔŋ nu ë luɔi nɔm ëtɛ̈ɛ̈n, mony cɔl rin Yirija wën de Celemia, ku ye wën de wën de Ɣanania, go tiët Jeremia dɔm lueel an, “Yïn lɔ rɔt gäm kɔc ke Babilonia!”

¹⁴ Guɔ bɛ̈ɛ̈r an, “Acie yen! Yɛn cïï rɔt lɔ gam.” Ku Yirija akën jamdï piŋ. Go yɛn dɔm ku yïn yɛn bäny.

¹⁵ Gokï göth ë yɛn arëët, agokï yɛn tɔ dui, ku tɔkï yɛn mac ɣön de Jɔnathan, raan ee göny gɔ̈ɔ̈r, raan cïï ë ɣönde tɔ ye alooc ye kɔc mac.

¹⁶ Go yɛn tääu ɣön ye ë kac mac piny, ku ja tɔ̈u ëtɛ̈ɛ̈n ë kaam dït.

¹⁷ Na wën ke melik Dhedekia tuc ya raan, ku jɔ yɛn luɔp yatök ɣön ë bääny an, “De jam cï bɛ̈n tëde Bɛ̈nydït?” Aguɔ bɛ̈ɛ̈r ku luɛɛl an, “Ade jam, ku yïn bïï gäm melik de Babilonia.”

¹⁸ Na wën ke luɔp an, “Eeŋö cä wäc yïn, ku nɔn ee bänyku, ku nɔn ee kɔckë, kë tɔ yïn yɛn tɔ tɛ̈ɛ̈uwë në aloocic?

¹⁹ Eeŋö cï tuöl tëde tïtku, tït wään ee yïn yɔ̈ɔ̈k nɔn cïï melik de Babilonia yïn bï mak wekë wut?

²⁰ Ku ënɔɔnë yïn meliŋdït, yïn läŋ bä këdï piŋ, ku loi kë bä thiëëc. Du yɛn be tuɔɔc në alooc nu baai de Jɔnathan yic. Na lɔ lɔ looi yɛn bï thou ëtɛ̈ɛ̈n.”

²¹ Go melik Dhedekia ya yɔ̈ɔ̈k bï ya guöör në kal de ɣön ë bääny yic. Guɔ rëër ëtɛ̈ɛ̈n, ku yɛn aaye gäm kuïn cï pam aköölnyïïn ëbɛ̈n, të ye ë ke thaal thïn, agut cï të wään cïï kuïïn cï pam jɔ thök ëbɛ̈n ë pänydït yic.