Jeremia 34 - JAM DE NHIALIC 2011

Jam Yïnë Dhedekia

¹ Go jam de Bɛ̈nydït bɛ̈n tëde yɛn, wään bï Nebukadnedhar melik de Babilonia kekë remdɛn de tɔŋ, ku akony ë rɛm ke juöör ku thook ëbɛ̈n, juöör wään cï ke peec, aake mɛk Jeruthalem ku lɔ wuöt thiääk në yen.

² Go Bɛ̈nydït Nhialic de Yithriɛl ya yɔ̈ɔ̈k bä lɔ lɛ̈k Dhedekia melik de Juda an, “Yɛn Bɛ̈nydït, Yɛn bï ee pänydïïtë gäm melik de Babilonia, ku abïï nyuɔp piny.

³ Yïn cïï bï ban, yïn bï peec ku gëmë yïn en. Yen abä tïŋ guöp në yïnyin ku jamë wekë yen, ku ëtɛ̈ɛ̈n yïn bïï lɛɛr Babilonia.

⁴ Dhedekia piŋ kë lɛ̈k yïn. Yïn cïï bïï nɔ̈k tɔŋ.

⁵ Yïn bï thou ë biöökic, cït man ye kɔc wal ŋïr nyop të ye kek kuarkun tɔ̈ɔ̈u, kɔc wään ye meliik ë yïnɔm tueŋ. Abïk yïn dhiëëu ku luelkï an, ‘Melikda acï thou!’ Acä lueel Yɛn Bɛ̈nydït.”

⁶ Ago tiët Jeremia ee jamë jɔ lɛ̈k melik Dhedekia në Jeruthalem,

⁷ të wään mɛkë rem de tɔŋ de Babilonia pänydït. Ku rem de tɔŋ aa mɛk Lacic ku Adheka ayadäŋ, kek wuöt ke Juda cï gël ë cï döŋ ka kapäc.

Kuöc Luɔi ye Lïïm Luööi

⁸ Go Jam de Bɛ̈nydït bɛ̈n tëde yɛn, wään cï melik Dhedekia kekë kɔc löŋ mac nɔn bïï lïïm gäm nɔm lääu ëbɛ̈n,

⁹ lïïmkɛn ke Ɣeberuu röör ku diäär, ago ciën raan bï nɔm dɛ raandɛn ë Judai ke ee lïm.

¹⁰ Go kɔc kedhie ayï bänyken gam nɔn bï kek lïïmken gäm nɔm lääu, ku cïkï keek bï bɛ tɔ ee lïïm. Gokï keek gäm nɔm lääu,

¹¹ ku acïk kenïïm bɛ̈n bɛ waar, ku pukkï lïïm nïïm ciëën, ku bekï keek bɛ tɔ ee lïïm.

¹² Go ë Bɛ̈nydït

¹³ Nhialic de Yithriɛl, ya yɔ̈ɔ̈k bä lɔ lɛ̈k kɔc an: “Yɛn cï löŋ mac wo kuarkun wään bän ke luäk bei ë Rip, ku ta ke lääu nïïm ë lïïmic. Acä lɛ̈k keek an,

¹⁴ në run kadhorou cök abïk lïïm ke Ɣeberuu ëbɛ̈n aa gäm nɔm lääu, lïïm cï lui ë run kadhetem. Ku kuarkun akënkï këdiën cä lueel gam ku cïkï jamdï piŋ.

¹⁵ Tïŋ nïn lik wään cï tɛ̈ɛ̈kë wek cï wenïïm waar ku luɔikï kë mit ë Yapiɔ̈u. Acäk gam wedhie nɔn bä wek lïïm mïthëkɔckuön ke Yithriɛl gäm nɔm lääu, ku wek cï löŋ mac në yanɔm, Luaŋdït të ye ë ya lam thïn.

¹⁶ Ku ëtɛ̈ɛ̈n we cï wenïïm bɛ waar, ku cäkkï ya be riëëu. Week wedhie, wek cï lïïm bɛ pɔ̈k nïïm ciëën, lïïm cäk keek kɔn gäm nɔm lääu, këdɛn ë kɔɔrkï, ku acäk keek bɛ tɔ ee lïïm ë riɛl.

¹⁷ Ka ënɔɔnë Aya lueel Yɛn Bɛ̈nydït wek kën ya riëëu: Wek kën mïthëkɔckuön ke Yithriɛl gäm nɔm lääuden. Apiɛth aläl, wek bä gäm nɔm lääu: nɔm lääu bä wek thou ë tɔŋic, ku jɔk, ku cɔk. Yɛn bï juöör ke pinynɔm ëbɛ̈n tɔ päu në kë bä luöi week.

¹⁸ Ku kɔc cï löŋ cä mac dhoŋ kɔ̈u, ku cïkkï cök ke lööŋ cïk mac ë yanɔm muk, abä keek tɔ cït dan cïk tekkic ë rou, ku tëkkï në kaamden.

¹⁹ Wɛ̈ɛ̈t meliik ke Juda, ku wɛ̈ɛ̈t meliik ke Jeruthalem, ku rooc, ku bäny ke kakë Nhialic, ku kɔc ke piny kedhie, kɔc cï tɛ̈ɛ̈k në kɛm ke biäk ke dau,

²⁰ abä ke tääu në kɔc ke aterden cin, ku gäm keek kɔc kɔɔr bïk keek nɔ̈k. Ku gupkɛn cï thou abïk aa këcam de diɛt nhial ku läi roor.

²¹ Ku Yɛn bï Dhedekia melik de Juda kekë bänyke gäm kɔc kɔɔr bïk keek nɔ̈k. Abä keek gäm rem de tɔŋ de Babilonia, wään cï tɔŋden tɔ kääc ke week.

²² Abä ke yɔ̈ɔ̈k ka abïk kenïïm pɔ̈k ee pänydïïtë. Abïk mak ku abïk peec, ku nyopkï piny. Yɛn bï wuöt ke Juda tɔ cït jɔ̈ɔ̈ric të cïn raan ee ceŋ thïn. Acä lueel, Yɛn Bɛ̈nydït.”