Jeremia 30 - JAM DE NHIALIC 2011

Gutguut ë lɛ̈k ë Bɛ̈nydït Kɔcke

¹ Go Bɛ̈nydït Nhialic de Yithriɛl,

² lɛ̈k yɛn lueel an, “Gäärë këriëëc cä lɛ̈k yïn ëbɛ̈n ë awerekic,

³ Në biäk cï akööl bɛ̈n akööl bän ke kɔckï luök, kɔc ke Yithriɛl ku Juda. Abä ke bɛ̈ɛ̈i ciëën piny wään cä gäm kuarken, ku abïk bɛ nööm. Acä lueel, Yɛn Bɛ̈nydït.”

⁴ Aye Bɛ̈nydït lɛ̈k kɔc ke Yithriɛl ku Juda an,

⁵ “Yɛn cï dhiën ë riɔ̈ɔ̈cdït piŋ, dhiën de riɔ̈ɔ̈c ke cie dhiën de mät.

⁶ Ënɔɔnë kääckï ku takkï wenïïm! De mony duëër meth dhiëëth? Ka eeŋö yan moc ëbɛ̈n tïŋ ke bom ye yäc në yeciin cï tiiŋ rɔ̈p? Eeŋö ye kɔc kedhie kenyïïn nyuiin?

⁷ Kööl rac abɔ̈, acïn kööldäŋ bïï thɔ̈ŋ en, ee kööl ë jiɛthëpiɔ̈u tëde kɔckï, ku abïk pïïr.”

⁸ Acïï Bɛ̈nydït de rɛm lueel an, “Të le ee köölë bɛ̈n, yɛn bï tïm cï duööt ë keyiëth dhoŋ kɔ̈u, ku bɛ̈ɛ̈i joth rek kek bei, ku acïkï bï bɛ aa lïïm ke alɛi.

⁹ Ku abïk Yɛn aa luööi, Yɛn Bɛ̈nydït Nhialicden, ku luuikï kuat de Debid, raan bä tɔ ee melik.

¹⁰ “Kɔckï duökï riɔ̈c, kɔc ke Yithriɛl duökï piɔ̈ɔ̈th riɔ̈c. Wek bä luök ee piny mecë, piny ya wek kɔc cï peec thïn. Wek bï bɛ̈n ciëën baai ku rëërkï në mät, wek bï luök, ku acïn raan bä wek bɛ riɔ̈ɔ̈c.

¹¹ Yɛn bï bɛ̈n tëde week ku luäk week. Yɛn bï juöör kedhie riɔ̈ɔ̈k, të cän week thiäi thïn, ku wek cä bï riɔ̈ɔ̈k. Ku wek cä bï pɔ̈l ke we kën ë luöi këtuc, ku të lan we luöi këtuc, abä looi arɔ̈ŋ. Acä lueel, Yɛn Bɛ̈nydït.”

¹² Aye Bɛ̈nydït lɛ̈k kɔcke an, “Tëtöökkun acïkï waar, bɔ̈ɔ̈tkun acïkï dem.

¹³ Acïn raan bï we kuɔny, acïn acuut ë biäk ë bɔ̈ɔ̈tkun, acïn aŋäth ë biäk bä wek dem.

¹⁴ Kɔc nhiaarkï acïk nïïm määr ë week, acïkï we be kuɔny. Wek cä mak cï raan de ater, luɔi cän we luöi këtuc atuc arëët, në biäk juëc ë awɛ̈ɛ̈ckun, ku kërɛɛcdun adït.

¹⁵ Du be gööny ë biäk ë tëtöökkun, acïn kë bï yïn tɔ waar. Wek cä luöi këtuc aya, në biäk juëc ë awɛ̈ɛ̈ckun, ku kërɛɛcdun adït.

¹⁶ Ku ë nɔɔnë kɔc ee week rum, abïï keek rum, ku kɔc ke aterdun kedhie abïï keek jɔt ke ke mac. Kɔc ee week yɔŋ kedhie abïï keek yɔŋ, ku ee we peec abïï keek peec.

¹⁷ Wek bä bɛ tɔ piath, ku ta bɔ̈ɔ̈tkun dem, cakaa nɔn ye kɔc ke aterdun ye lueel an, ‘Ye Dhiɔn kë cï cieen, acïn ee ye kuɔny.’ Acä lueel, Yɛn Bɛ̈nydït.”

¹⁸ Aye Bɛ̈nydït lueel an, “Yɛn bï kɔckï pɔ̈k nïïm pinyden, ku ta yepiɔ̈u kok wokë ɣööt kedhie, Jeruthalem abï bɛ yïk, ku ɣön de bääny abï bɛ yïk.

¹⁹ Kɔc rɛ̈ɛ̈r ëtɛ̈ɛ̈n abïk diɛt ke thieithieei kiit, abïk aa kïïu ë miɛtëpiɔ̈u. Ku abïk kenyïïn ŋuak në athiɛɛidï, ku abï athiɛɛidï ke yiɛ̈n riëëu.

²⁰ Yɛn bï riɛl tueŋ de jur pɔ̈k nɔm keek, ku akutnɔmden abä bɛ tɔ ril aläl, Yɛn bï kɔc ee keek yɔŋ ëbɛ̈n luöi këtuc.

²¹ Wën melikden abï aa raan ë jurden guöp, ku bɛ̈nyden abï aa bɛ̈n ë kɔcken yiic. Abï aa bɛ̈n tëde Yɛn të cän ye cɔɔl, ku eeŋa duëër bɛ̈n ë Yalɔ̈ɔ̈m ke kënë cɔɔl?

²² Abïk aa kɔckï, ku Yɛn bï aa Nhialicden. Acä lueel, Yɛn Bɛ̈nydït.”

²³ Agönh de Bɛ̈nydït acï bɛ̈n, acït yom ë kɔɔr, abï lööny ë kɔc ee karɛc looi nïïm.

²⁴ Agönh tuc de Bɛ̈nydït acï rɔt bï puk, ke kën këdɛn kɔɔr bïï looi looi. Ku kënë abäk yökic në akööl ciëën bï bɛ̈n.