Jeremia 3 - JAM DE NHIALIC 2011

Yithriɛl Acïn Adöt

¹ Aye Bɛ̈nydït lueel an, “Na cï moc tiiŋde pɔ̈l, ku cï ye nyääŋ piny, ku cï lɔ ya tiiŋ de mony däŋ, acïï moc bï bɛ dök nɔm ciëën. Kënë aduëër piny tɔ rac taitai. Ku yïn Yithriɛl, yïn cï aa akɔɔrröör de röör juëc, ku akɔɔr ënɔɔnë bä rɔt dɔ̈k Ɛn!

² Tïŋ kur nïïm nhial. De të kën yïn tɔ̈c thïn we röör cï tiiŋ akɔɔrröör? Yïn ee röörkuön nhiaar tiit në kuɛɛr këc. Cït man ye cuɛ̈ɛ̈r kɔc bïï rum tiit në jɔ̈ɔ̈ric. Yïn cï piny dhiöök në kɔ̈ɔ̈rduön ë röör.

³ Yen acï deŋ tɔ yaak ke cïï tueny, ku yen akën ë nyïïn bɛ thiɔɔr ke ke bɔ̈ biic. Ku yïn ee tïc cït tiiŋ akɔɔrröör, yïn cïn guöp ayäär.

⁴ “Ku ënɔɔnë acï lɛ̈k ɛn an, ‘Ya wuur, ku yïn nhiaar ɛn ë caŋɣɔn aa yɛn meth.

⁵ Yïn cie dap gɔ̈th, ku yïn cï nɔm duëër kɔn riääk në këdï aɣet athɛɛr.’ Yithriɛl yen kë ye lueel ka, ku yïn cï këriëëc rac ëbɛ̈n looi.”

Yithriɛl kekë Juda Abïk Kepiɔ̈ɔ̈th Dhil Puk

⁶ Ɣɔn ye Jothia melik, go ë Bɛ̈nydït lɛ̈k ɛn an, “Cï kë cïï Yithriɛl looi tïŋ, kë cïï tiiŋ cïn piɔ̈u adöt looi? Acï rɔt yal wei tëde Yɛn, acïn të kën en tɔ̈c ke röör thïn, në ee kurkë nïïm nhial, ayï tiim tɔ̈c thäär acï yen tɔ̈c ke röör.

⁷ Aa ya tak wään cïï yen ë kakë looi kedhie, nɔn bïï yen rɔt dɔ̈k Ɛn, ku yen akën rɔt dɔ̈k Ɛn, ku acïï nyankënë Juda cïn piɔ̈u adöt ke tïŋ kedhie.

⁸ Acïï Juda tïŋ aya nɔn cïï Yɛn nyankënë Yithriɛl pɔ̈l, ku cuɔp baai, në kë cïï yen rɔt yal wei tëde Yɛn ku looi rɔt ke ye akɔɔrröör. Ku Juda nyankënë Yithriɛl cïn piɔ̈u adöt, aa kën riɔ̈ɔ̈c. Yen aya acï rɔt bɛ̈n looi ke ye akɔɔrröör

⁹ ku yen aa cïn guöp ayäär. Acï piny dhiöök, në kë yen kur ku tiim lam.

¹⁰ Ku na ɣɔn në ee kake cök ke Juda nyankënë Yithriɛl cïn piɔ̈u adöt, aacï them bï rɔt looi ke cït kë puk rɔt Ɛn, ku aacïï tɔ̈u në yepiɔ̈u. Acä lueel, Yɛn Bɛ̈nydït.”

¹¹ Na wën go ë Bɛ̈nydït lɛ̈k yɛn, na cakaa nɔn cï Yithriɛl rɔt yal wei tëde yɛn, acï rɔt nyuɔɔth nɔn piɛth en awär nyankënë Juda cïn piɔ̈u adöt.

¹² Acï lɛ̈k ɛn bä lɔ lɛ̈k kɔc nu të lɔ rut an, “Yithriɛl cïn piɔ̈u adöt, bïï rɔt dɔ̈k ɛn. Yɛn ee piɔ̈u kok ku yɛn cïï bï gɔ̈th, yɛn cïï bï gɔ̈th wo yïn aɣet athɛɛr.

¹³ Gam tei nɔn cï yïn awäc looi, ku nɔn cï yïn Bɛ̈nydït Nhialicdu rɛɛc. Gam nɔn cïï yïn yiëth lei näk miɔ̈c në ee tiimkë thäär, ku yïn kën kë cä lɛ̈k yïn riëëu. Acä lueel, Yɛn Bɛ̈nydït.”

¹⁴ “Wek kɔc cïn piɔ̈ɔ̈th adöt, bäkï ciëën, wek ee kɔckï. Yɛn bï raan tök aa nööm wun tök, ku nääm kɔc kaarou dhiën tök, ku wek bä bɛ̈ɛ̈i ciëën në kuur de Dhiɔn nɔm.

¹⁵ Wek bä gäm bäny bï ya riëëu, ku abïk we mac në pɛlënɔm ku yöŋ de käŋiic.

¹⁶ Ëtɛ̈ɛ̈n na cäk jɔ juëc ee pinyë, kɔc acïkï bï bɛ jam në biäk de athänduŋ de män ë Bɛ̈nydït. Acïkï bï bɛ tak, abïk nïïm määr ë yen, acïkï bï bɛ kɔɔr, ku acïkï däŋ bï bɛ looi.

¹⁷ Na lɔ ee köölë bɛ̈n Jeruthalem abï ya cɔɔl an, “Thöny de Bɛ̈nydït ku juöör kedhie abïk kenïïm mat ëtɛ̈ɛ̈n ku lamkï Yɛn. Acïkï kakɛn ke riɛl ë nɔm ku ka cïï piɔ̈ɔ̈th racken lɛ̈k keek bï bɛ aa looi.

¹⁸ Baai de Yithriɛl abï mat ke baai de Juda, ku keek kedhie abïk lɔ bɛ̈n ciëën piny lei, piny nu të lɔ rut, ku abïk röt pɔ̈k piny cä gäm kuarkun, ke ye piny de nɔmden.”

Läm de Yiëth de Kɔc ke Nhialic

¹⁹ Aye Bɛ̈nydït lueel an, “Yithriɛl yïn kaar bä yï gam ke yï wëndï ku gäm yïn piny bï yïn piɔ̈u miɛt, piny wär piiny ke juöör në piath. Akaar bä Yɛn aa cɔɔl an Wäär, ku du rɔt bï bɛ yal wei tëde Yɛn.

²⁰ Ku cït mat ye tiiŋ cie adöt monyde pɔ̈l, yïn kën rɔt tɔ adöt tëde Yɛn, yïn baai de Yithriɛl. Acä lueel, Yɛn Bɛ̈nydït.”

²¹ Awuɔɔu aye piŋ në kur nïïm, ee kɔc ke Yithriɛl kek adhiau ke ke gööny, në biäk cï kek rëër në luɔi de karɛciic, ku cïk nïïm määr në Bɛ̈nydït Nhialicden.

²² Pɔ̈kkï röt ee në wedhie, wek kɔc wään cï röt yal wei tëde Bɛ̈nydït, abï we tɔ piɔl gup ku tɔ we ye adööt. Ayak lueel an, “Ɣɛɛ, wok bɔ̈ tëde Bɛ̈nydït, në biäk ee Yen Nhialicda.

²³ Wok cie kony taitai në lämdan ë yiëth ë kur nïïm. Kuɔɔny de Yithriɛl ee bɛ̈n tëde Bɛ̈nydït Yetök Nhialicda.

²⁴ Ku läm de Baal yanh de guöp ayäär, acï thökkuɔ ku ɣɔ̈kkuɔ, ku wɛ̈ɛ̈tku ku duetkuɔ, ku këriëëcda ëbɛ̈n ka cïï kuarkuɔ looi thɛɛr tɔ mär.

²⁵ Wok duëër tɔ̈c piny në ayäär, ku jɔ ayärda wo kuöm piny. Wook në kuarkuɔ wok cï awɛ̈ɛ̈c looi në ciɛɛŋ, luiku ke Bɛ̈nydït Nhialicda, wok kën kë ye lɛ̈k wook kɔn riëëu.”