Jeremia 28 - JAM DE NHIALIC 2011

Jeremia ku Tiët Ɣanania

¹ Në ee ruöön ë yic, në pɛɛi de dhïc ë ruöön ë ŋuan wään ye Dhedekia melik, go Ɣanania wën de Adhur, tiët wun ë Gibiɔn, go jam ke yɛn ë Luaŋdïtic. Go ya yɔ̈ɔ̈k ë kɔc nïïm kedhie ku bäny ke kake Nhialic nïïm.

² An acïï Bɛ̈nydït de rɛm, Nhialic de Yithriɛl lueel an, “Yɛn cï riɛl de melik de Babilonia dhoŋ kɔ̈u.

³ Në run kaarou yiic, yɛn bï wëu wään cïï ë melik Nebukadnedhar keek lɛɛr Babilonia ëbɛ̈n, abäk keek pɔ̈k nïïm ciëën ë Luaŋdïtic ee tënë.

⁴ Ku Yɛn bï Jekonia wën de Jeɣoyakim melik de Juda pɔ̈k nɔm ciëën ayadäŋ kekë kɔc ke Juda kedhie, kɔc wään cï peec ë kac ke Babilonia. Ee yic, Yɛn bï riɛl de Babilonia dhoŋ kɔ̈u. Acä lueel, Yɛn Bɛ̈nydït.”

⁵ Na wën ke lë tiët Jeremia tiët Ɣanania ë kɔc nïïm kedhie, kɔc ë kääc ë Luaŋdïtic ku bäny ke kake Nhialic nïïm.

⁶ Ago ë tiët Jeremia lɛ̈k en an, “Ee këdïït ë gäi! Amiin! Anhiaar duëër Bɛ̈nydït ee kënë looi! Anhiaar nɔn duëër en cäärdu tɔ ee yic, ku tɔ wëu bïïyë ciëën, wëu wään ke Luaŋdït cï lɛɛr Babilonia ku tɔ kɔc wään cï jɔt ke ke mac bɔ̈ ciëën.

⁷ Ku piŋ kë lɛ̈k yïn wekë kɔc.

⁸ Tït ɣɔn cï jam ɣɔn thɛɛr, ke ya ŋoot wei ku ŋuɔɔtë wei, acïk caar nɔn bïï tɔŋ, ku cɔk, ku jɔɔk bɛ̈n, abïk bɛ̈n ë juöör juëc gup ku ciɛɛŋ ril gup.

⁹ Ku tiët ee mät caar, abïï gam nɔn ee yen tiët ë tooc Nhialicë yic, të cïï ë kën ë cɛɛr ee tiëtë aa yic.”

¹⁰ Ago tiët Ɣanania wai bɛ̈ɛ̈i bei ë tiët Jeremia yeth ku dhoŋ ke kɔ̈ɔ̈th.

¹¹ Ku lueel Ɣanania ë kɔc nïïm kedhie an, “Acïï Bɛ̈nydït lueel an yen kueer bï yen wai cïï melik Nebukadnedhar tääu ë juöör yiëth kedhie ka, ku abï ee kënë looi ë run yiic kaarou.” Ago tiët Jeremia jäl.

¹² Ku në kaamic ëtɛ̈ɛ̈n të wään cï tiët Ɣanania wai dhoŋ kɔ̈ɔ̈th ë tiët Jeremia yeth cök go ë Bɛ̈nydït lɛ̈k yɛn,

¹³ Lɔ lɛ̈kë Ɣanania an, “Acïï Bɛ̈nydït lueel an, Yïn cï wai ke tiim dhoŋ kɔ̈ɔ̈th, ku Yɛn bï nyinden luöi yic wai ke wëëth.

¹⁴ Acïï Bɛ̈nydït de rɛm, Nhialic de Yithriɛl lueel, abï wai de wëëth tääu në ee juöörkë yiëth kedhie, ku abïk melik Nebukadnedhar de Babilonia aa luööi. Acïï Bɛ̈nydït lueel nɔn bï yen läi roor tɔ luui Nebukadnedhar.”

¹⁵ Go tiët Jeremia lɛ̈k Ɣanania an, “Piëŋë Ɣanania! Bɛ̈nydït akën yïn tooc, ku yïn tɔ kɔckë gam lueth.

¹⁶ Ku acïï Bɛ̈nydït lueel guöpde bï yen yïn nyaai nyin. Yïn bï thou ke ruöönë ë kën kɔn thök, në biäk cï yïn kɔc yɔ̈ɔ̈k bïk Bɛ̈nydït rɛɛc.”

¹⁷ Go tiët Ɣanania thou, në ee ruöönë yic, ë pɛɛi de dhorou yic.