Jeremia 27 - JAM DE NHIALIC 2011

Jeremia Aceŋ Lääk de Miɔɔr

¹ Ɣɔn gɔlë Dhedekia bäänyde thar ke ee melik de Juda, go ë Bɛ̈nydït lɛ̈k yɛn,

² an, Luöi ë rɔt lääk de dël ku tääu wai ku wai ke tiim, ku tääuwë ke ë yïyeth.

³ Na wën go ë Bɛ̈nydït lɛ̈k yɛn bä thok tuöc meliik ke Edom, ku Mowap, ku Ammon, ku Tayer, ku Thidon, bä gäm keek në kueer de bänykɛn cï bɛ̈n Jeruthalem bïk Dhedekia melik de Juda bɛ̈n tïŋ.

⁴ lɛ̈kë keek jamë bïk lɔ lɛ̈k bänyken an, Bɛ̈nydït de rɛm, Nhialic de Yithriɛl, acï yɛn yɔ̈ɔ̈k, bä keek yɔ̈ɔ̈k, bïk meliiken lɔ yɔ̈ɔ̈k nɔn cïï Bɛ̈nydït ye lueel an,

⁵ “Ee Yɛn ë cak pinynɔm në riɛldiëndït, ku cak kɔc ku läi, ku gäm raan cä tïŋ ke piɛth të de Yɛn.

⁶ Ku ënɔɔnë Yɛn cï piinykë gäm Nebukadnedhar, melik de Babilon lïmdï, ku acä gäm läi roor ayadäŋ bïk yen luööi.

⁷ Juöör ëbɛ̈n abïk yen luööi, ku luuikï wɛ̈ɛ̈tke, ku wɛ̈ɛ̈t ke mïthke, agut kööl bïï wïïk bïï jurde wïïk bɛ̈n. Ku ëtɛ̈ɛ̈n jurde abï juöör ril jɔ aa luööi ku abïï meliik dït tɔ ee lïmden.

⁸ “Ku na de jur ku nɔn ee ciɛɛŋ cïï Nebukadnedhar bï aa luööi, Yɛn bï ee jurë kuum në tɔŋ, ku cɔk, ku jɔɔk agut të bän yen tɔ riɔ̈ɔ̈k ë Nebukadnedhar taitai.

⁹ Ka duökï tïtkun piŋ thook, ku duökï kë lueel raan ee jam an duëër kë bï rɔt looi wadäŋ caar ee piŋ, kɔc ee nyuöth, ku kɔc ee kɔc cï cɔ̈ɔ̈l bei, ku kɔc ee cɔ̈ɔ̈r ë yiëth. Ku abïk we yɔ̈ɔ̈k an, duökï melik de Babilon ee luööi.

¹⁰ Ee lueth yen lɛ̈kkï week, ku abïk week tɔ leerë piny mec në pinydun. Ku wek bä cuöp bei, ku wek bïï riɔ̈ɔ̈k.

¹¹ Ku jur ëbɛ̈n jur lɔ ciɛɛŋ de melik de Babilonia lɔ gam ku le luööi, abä tɔ rëër pinyde, ku bïï aa com, ku rëër ëtɛ̈ɛ̈n. Acä lueel, Yɛn Bɛ̈nydït.”

¹² Yɛn cï ee këmanë lɛ̈k Dhedekia melik de Juda an, “Gämë rɔt melik de Babilonia. Luööiyë, ku luööiyë kɔcke, ku yïn bï pïïr.

¹³ Eeŋö duëër yïn rɔt tɔ thou wekë kɔcku në tɔŋ ku cɔk jɔɔk? Cït man ë kë cïï Bɛ̈nydït lueel an bïï tuöl tëde jur ëbɛ̈n jur cïï jaai nɔn cï yen melik de Babilonia bï luööi.

¹⁴ Duökï jam de tït ee we yɔ̈ɔ̈k cäkkï röt bï gäm melik de Babilonia piŋ. Amɛthkï week.

¹⁵ Acïï Bɛ̈nydït lueel nɔn cie yen ë toc keek, ku acaar lueth në rinkï. Ka yen abï we cuɔp wei, ku wek bï nɔ̈k, week në tït ee lueth caar.”

¹⁶ Aguɔ jɔ lɛ̈k bäny ke kake Nhialic ku kɔckë kedhie an acïï Bɛ̈nydït lueel an, “Duökï jam de tït ee piŋ tït ee ye lueel an wëu ke Luaŋdït abïï keek dhuöny nïïm ciëën ee nïnkë yiic ë Babilonia. Atörkï we lueth.

¹⁷ Duökï jamden piŋ! Luööikï melik de Babilonia ku we bï pïïr! Eeŋö duëër ee pänydït tɔ ee dhuur nɔm?

¹⁸ Na yek tït ë yic, ku na cath jam de Nhialic ke keek, ke takkï keek läŋ Bɛ̈nydït de rɛm, ke cïï wëu cï döŋ ë Luaŋdïtic ku ke cï döŋ ë ɣön ë bäänyic, ku ka nu ë Jeruthalem, ke ke cïï bï lɛɛr Babilonia.”

¹⁹ Ku kë cïï Bɛ̈nydït de rɛm lueel kï në biäk de wai, ku löör de maläŋ, ku kuc, ku wëu kɔ̈k ke luaŋdït.

²⁰ Wëu kën ë Nebukadnedhar melik de Babilon ke jɔt, wään bï yen Jekonia wën de Jeɣoyakim, melik de Juda ku adhuëëŋ ke Juda Ku Jeruthalem kedhie, jɔt keek ë Jeruthalem leerë ke Babilon.

²¹ “Piɛŋkï kë ë lueel Bɛ̈nydït de rɛm, Nhialic de Yithriɛl, kë lueel në biäk de wëu cï döŋ ë Luaŋdïtic ku ɣön ë bäänyic ë Jeruthalem:

²² Abïï ke lɛɛr Babilonia ku abïk rëër ëtɛ̈ɛ̈n, agut kööl bän ke lieec. Ku abä keek jɔ bɛ̈ɛ̈i ciëën ku pɔ̈k ke nïïm ee tënë. Acä lueel, Yɛn Bɛ̈nydït.”