Jeremia 26 - JAM DE NHIALIC 2011

Jeremia Acï Bɛ̈ɛ̈i ë Luk Nɔm

¹ Wään cï Jeɣoyakim wën de Jothia aa melik ë Juda,

² Go ë Bɛ̈nydït lɛ̈k ɛn an, “Lɔ kääcë ë Luaŋdïtic cil ku luel ka cä lɛ̈k yïn ëbɛ̈n, ka bä lɛ̈k kɔc ke Juda cï bɛ̈n ë wuötiic bïk bɛ̈n lam ëtɛ̈ɛ̈n. Cïn kë nyääŋë piny.

³ Tɛkdäŋ bï kɔc piŋ ku pɛ̈lkï kuɛɛrkɛn rac. Na lek ke pɔ̈l, ke Yɛn bï Yanɔm waar në riääk cä kiëët kaar bä yiɛ̈n keek, në biäk ë luɔi rɛɛcden ëbɛ̈n.”

⁴ Go ë Bɛ̈nydït lɛ̈k yɛn bä lɔ lɛ̈k kɔc an, “Acä lueel Yɛn Bɛ̈nydït ë biäk bä wek Yɛn riëëu, në luɔi bä wek wɛ̈ɛ̈t cä gäm week kuany yic,

⁵ ku luɔi bä wek jam tït kɔc ee Yɛn luööi piŋ, kɔc Ya ke cool ë tuöc ke week. Wek kën këdɛn yek lueel kɔn riëëu.

⁶ Na lak ŋoot ke we cïn riëëu, ke Yɛn bï ee Luaŋdïïtë luöi kë cä luöi Cilo, ku juöör ke piny nɔm ëbɛ̈n abï rin ke ee pänydïïtë tɔ ee ye aciɛɛn looi.”

⁷ Bäny ke kake Nhialic, ku tït, kɔckë kedhie acïk ya piŋ ka ya luel ee kakë ë Luaŋdïtic,

⁸ ku të thiin wën cän käŋ thöl kedhie, ka cï Bɛ̈nydït lɛ̈k yɛn bä ke lueel, gokï ya dɔm ku cötkï an, “Yïn bïï dhil nɔ̈k në biäk ee kënë!

⁹ Eeŋö lueel yïn en, në rin ke Bɛ̈nydït nɔn bï ee Luaŋdïïtë ciët Cilo, ku nɔn bïï ë pänydïïtë riɔ̈ɔ̈k, ku cïn raan bï rëër thïn?” Go kɔc kenïïm kut ë yalɔ̈ɔ̈m.

¹⁰ Wën cïï bäny ke Juda kë cï rɔt looi piŋ, gokï röt dap jɔt ɣön ë bääny ku lekkï ë Luaŋdïtic, ku nyuckï të ye kek nyuc thïn, në Kal thoŋ ë Piacë looi.

¹¹ Go bäny ke kake Nhialic ku tït jɔ lɛ̈k bäny ku kɔc an, “Raanë arɔ̈ŋ bïï kuöm thuɔɔu, ë biäk cï yen kërac luɛɛl ë päänydïïtda guöp. Acäk piŋ në weyïth.”

¹² Aguɔ lueel an, “Bɛ̈nydït acï ya tooc bä këriëëc ëbɛ̈n lueel, kë ca piŋ ke luɛɛl në biäk ë Luaŋdït ku në biäk ee pänydïïtë.

¹³ Wek bï kueerduön ya wek rëër ku kakuön yak looi dhil waaric, ku we bï Bɛ̈nydït Nhialicdun dhil riëëu, na lak looi, abï yenɔm waar në riääk cï lueel an bïï yiɛ̈n week.

¹⁴ Ku në biäkdï, yɛn nu ë wecin! Luöikï ya kë yak tïŋ ke ee rɔ̈ŋ ku ye yic.

¹⁵ Ku kënë abäk dhil ŋic ë gɔk: Të la wek yɛn nɔ̈k, week në kɔc ke ee pänydïïtë, we bï gup dɛ awäc ë nääk de raan cï kë cï looi, në biäk yen Bɛ̈nydït Yen ë toc yɛn bä week bɛ̈n yɔ̈ɔ̈k.”

¹⁶ Go bäny ku kɔc lɛ̈k bäny ke kake Nhialic ku tït an, “Mony aa jam ke wook në rin ke Bɛ̈nydït Nhialicda, acïï duɛ̈ɛ̈rë nɔ̈k.”

¹⁷ Go röördït kɔ̈k röt jat nhial, ku jɔkï lɛ̈k kɔc cï guëër an,

¹⁸ “Wään ye Ɣedhekia melik de Juda, tiët Maika wun ë Moreceth, acï kɔc ëbɛ̈n bɛ̈n yɔ̈ɔ̈k, an acïï Bɛ̈nydït de rɛm lueel nɔn, ‘Bï ë Dhiɔn puur cï dom, ku Jeruthalem abï aa dhuur nɔm, ku kuur de Luaŋdït abï aa roor.’

¹⁹ Kɔc ke Juda ku melik Ɣedhekia akënkï Maika bɛ̈n tɔ näk. Ɣedhekia acï Nhialic bɛ̈n riëëu, ku ye kɔɔr bïï tɔ mit piɔ̈u. Go Bɛ̈nydït yenɔm waar, në biäk ë riääk cï lueel an bï yiɛ̈n keek. Ënɔɔnë wok kɔɔr buk riääk bɛ̈ɛ̈i ë wogup.”

²⁰ (Aa de monydäŋ, Yuria wën de Cemaya raan wun ë Kiriath Jiriim, raan cï jam në rin ke Bɛ̈nydït, në biäk ee pänydïïtë ku jur cït man cï ë Jeremia ye looi.

²¹ Na wën cï Jeɣoyakim melik kekë ë remdɛn ë tɔŋ ku bänyke ye piŋ yen kë cï Yuria lueel, acï melik them nɔn bï yen en tɔ näk. Go Yuria ye piŋ, go rɔt kual ë riɔ̈ɔ̈cdït ku le Rip.

²² Go melik Jeɣoyakim Elnathan wën de Akbor ku röör kɔ̈k, go ke tuɔɔc Rip bïk Yuria lɔ bɛ̈ɛ̈i.

²³ Gokï bɛ̈ɛ̈i ciëën tënu ë melik Jeɣoyakim, cï yen tɔ näk ku cuɛtë guöpde të ye kɔc tɔ̈ɔ̈u thïn kedhie.)

²⁴ Ku në biäk cï Aɣikam wën de Capan yɛn kony, yɛn kë bɛ̈n gäm kɔc bïk ya nɔ̈k.