Jeremia 25 - JAM DE NHIALIC 2011

Kɔc ke Ater Nu të lɔ Rut

¹ Në ruöön ë ŋuan wään ye Jeɣoyakim wën de Jothia melik de Juda, yɛn cï jam yök tëde Bɛ̈nydït në biäk ë kɔc ke Juda kedhie. (Kënë aaye ruöön tueŋ ye Nebukadnedhar melik de Babilonia.)

² Acï tiët Jeremia lɛ̈k kɔc ke Juda kedhie ku kɔc ke Jeruthalem an,

³ “Në run thiërrou ku diäk, në ruöön thiëër ku diäk wään ye Jothia wën de Amon melik ë Juda agut cï ee köölë, Bɛ̈nydït acï jam ke yɛn, ku yɛn kën kë cï lɛ̈k week kɔn moony. Ku week akënkï piŋ.

⁴ Wek kën këde piŋ, ku cäkkï gɔkic, cakaa nɔn ye Bɛ̈nydït ŋoot ke tuc week tïtke kɔc ee Yen luööi.

⁵ Acïk week yɔ̈ɔ̈k bäk röt puk në kuɛɛrkuön rac yiic, ku në karɛc yak looi yiic, aguɔkï rëër piny cï Bɛ̈nydït gäm week ë kuarkun ke ye këdun aɣet athɛɛr.

⁶ Acïk we yɔ̈ɔ̈k nɔn cä wek yiëth kɔ̈k bï lam ku luööikï keek, ku duökï Bɛ̈nydït bï tɔ göth në läm de yiëth cäk looi. Na ë we cï Bɛ̈nydït riëëu, adï kën we luöi këtuc.

⁷ Ku acï Bɛ̈nydït lueel guöp, nɔn cä wek këde rɛɛc piŋ. Acäk tɔ göth në yiëthkun ku bɛ̈ɛ̈ikï luɔi bïï ë këtucde looi ë wegup.

⁸ “Ku në biäk kën wek këde piŋ, aye Bɛ̈nydït de rɛm lueel an,

⁹ ‘Yɛn bï dhiëën nu të lɔ rut kedhie tuöc, ku tuöc raan ee ya luööi, Nebukadnedhar melik de Babilonia. Abä keek lɔ bɛ̈ɛ̈i bïk tɔŋ yiɛ̈n Juda ku kɔc ceŋ en, ku yïn tɔŋ juöör thiääk ë yen. Yɛn bï ë jurë riääk kekë juöör thiääk ë yen, ku nyääŋ keek ë riääkic aɣet athɛɛr, ee kërɛɛc de gäi në tïŋ. Acä lueel, Yɛn Bɛ̈nydït.

¹⁰ Yɛn bï diɛtkɛn ke miɛtëpiɔ̈u tɔ lɔ lik kekë awuɔɔu ë miɛtëpiɔ̈u ë dhuëëŋ de monythiëk ku nyan thiak. Abïk nïïm ciën miök de mɛ̈ckealath, ku abï ciën rap.

¹¹ Yen ee pinyë ëbɛ̈n abï nyääŋ piny ke cï riääk, ku ye të rac ë tïŋ, ku juöör thiääk ë week abïk melik de Babilonia aa luööi në run kathiërdhetem.

¹² Ku në ee kënë cök Yɛn bï melik de Babilonia kekë jurë luöi këtuc ë biäk de karɛcken. Yɛn bï ee pinyë riɔ̈ɔ̈k ku nyääŋ piny ke cï riääk aɣet athɛɛr.

¹³ Yɛn bï Babilonia luöi këtuc në riääk ëbɛ̈n, riääk cä lueel an bä yiɛ̈n juöör wään bän jam wo Jeremia riääk ëbɛ̈n, riääk cï gɔ̈ɔ̈r në awerekë yic.

¹⁴ Yïn bï kɔc ke Babilonia cuöl kë cïk looi, ku juöör juëc, ku meliik juëc abïk keek tɔ ee lïïm.’ ”

Nhialic Alui Juöör Këtuc

¹⁵ Acï Bɛ̈nydït Nhialic de Yithriɛl Lueel an, “Kënë ee cum de mɔ̈u cä thiɔ̈ɔ̈ŋ në agönhdï. Yiɛ̈në juöör ëbɛ̈n, juöör tuɔɔc Yɛn yïn tënu kek, ku tɔ keek dëk në ye.

¹⁶ Të le kek lɔ dek ë ye, abïk lɔ käŋkäŋ, ku jɔkï nïïm mum, në biäk de tɔŋ yiɛ̈n keek.”

¹⁷ Guɔ cup nööm ë Bɛ̈nydït ciin, ku gäm juöör ëbɛ̈n, juöör cï Nhialic ya tuöc keek, ku ta dëk ë ye yic.

¹⁸ Go Jeruthalem ku pɛ̈ɛ̈nydït ke Juda kedhie, ëtök në meliiken ku bänyken, gokï dek ë yeyic, agokï aa jɔ̈ɔ̈r, të rɛɛc ee kɔc tɔ gäi ë tïŋ, ku bï kɔc rin ke tɔ ee kë de aciɛɛn cït man ye kek ŋoot ke loikï.

^19-26 Kënë ee rin ke kɔc kedhie, kɔc bï dek ë cup: melik de Rip, ku bänyke ku wɛ̈ɛ̈t bänyken ku kɔc kedhie, ku kɔc matiic ee ye kuany cök, meliik ke piny de Udh kedhie, meliik ke Pilithiin kedhie, ke pɛ̈ɛ̈nydït ke Acekelon, ku Gadha, ku Ekeron, ku kɔc ke Acedɔd cï döŋ, kɔc ke Edom kedhie, ku Mowap, ku wɛ̈ɛ̈t ke Ammon, meliik ke Tayer kedhie ku Thidon, ku meliik ke piiny ke Wɛ̈ɛ̈rdïït ɣer lɔŋtui kedhie, pɛ̈ɛ̈nydït ke Didan, ku Tema, ku Budh, kɔc ee nhïmken tɛm acek kedhie, meliik ke Arabia kedhie ku meliik ke dhiëën cï liääp ee rëër ë jɔ̈ɔ̈ric, meliik ke Dhimri kedhie, ku Eelam kedhie, ku Media, meliik nu të lɔ rut kedhie, ka mec ku kathiɔ̈k, ke ke kuany kecök. Ku ciɛɛŋ ke pinynɔm ëbɛ̈n nu ë pinynɔm ëbɛ̈n. Ku raan bï dek në kecök ciëën ee melik de Babilon.

²⁷ Na wën, go ë Bɛ̈nydït lɛ̈k ɛn an, “lɛ̈kë kɔc an, acä lueel Yɛn Bɛ̈nydït de rɛm, Nhialic de Yithriɛl, ayɔ̈ɔ̈k keek bïk dek arëk abïk wiɛɛt ku ŋökkï, agut të bïï kek wïïk ku cïkkï röt be jɔt, në biäk de tɔŋ yiɛ̈n keek.

²⁸ Na lek cup lɔ rɛɛc ë yïciin ku cïkï dëk ë ye yic, ke yɔ̈ɔ̈kë keek an acïï Bɛ̈nydït de rɛm lueel nɔn bï kek ŋoot ke ke dëk ë ye yic.

²⁹ Yɛn bï luɔidiën ë riääk gɔl ë pänydïïtdï. Yek tak bïk jäk ke kën luöi këtuc? Ei, abïï keek luöi këtuc, Yɛn lɔ tɔŋ tuöc kɔc ke piny nɔm kedhie. Acä lueel, Yɛn Bɛ̈nydït de rɛm.

³⁰ “Ku yïn Jeremia, yïn bï këriëëc cä lueel ëbɛ̈n guiir. Yïn bï ee kɔckë dhil yɔ̈ɔ̈k an, ‘Bɛ̈nydï abï wuur tënhial, ku rel tëdɛn ɣeric nhial ya. Abï wuur ë kɔcke gup, abï kïïu cï raan dum enapic. Abï raan ëbɛ̈n piŋ ë piny nɔm,

³¹ ku röl abï rɔt aa gam ë piny thar. Bɛ̈nydït ade ke, lueel ke juöör. Abï kɔc bɛ̈ɛ̈i ë luk nɔm kedhie, ku nɛ̈k kɔc ee karɛc looi. Acïï Bɛ̈nydït lueel,’ ”

³² Aye Bɛ̈nydït de rɛm lueel nɔn bï riääk bɛ̈n ë juöör gup ke ke kuany kecök, ku amaŋdï akut rɔt në aguuk ke piny yic.

³³ Në ee köölë, gup ke kɔc cï Bɛ̈nydït ke nɔ̈k, abïk dhɔt piny ke ke cï wɛɛr gɔl aguk baŋë lee aguk däŋë. Acïn raan bï ke dhiëëu, ku acïï keek bïï jɔt, lek ke tɔ̈ɔ̈u. Abïk dhɔt piny cï tiɔɔm awäi cï kut nɔm.

³⁴ Dhiaukï, wek bäny, wek kɔc ee kɔc tiit, dhiaukï arëët! Dhiaukï ku dalkï ë abuui yic. Akööl bï ë week tɛm röt acïk bɛ̈n, ku wek bïï tɛm röt cï nyök ke amääl.

³⁵ Tïït acïn kueer bä wek röt kual.

³⁶ Piŋ dhiën de kɔc ee tïït, piŋ awuɔɔu de kɔc wat thök, Bɛ̈nydït ariäk tëdɛn ë nyuäth.

³⁷ Të piɛth lɔ läŋ abï riɔ̈ɔ̈k, në biäk de agönh tuc de Bɛ̈nydït.

³⁸ Bɛ̈nydït acï kɔcke nyääŋ piny cït man ë köör cï köŋde nyääŋ piny. Riɔ̈ɔ̈cdïït de tɔŋ ku agönh tuc de Bɛ̈nydït acï wut puk ke ee jɔ̈ɔ̈r.