Jeremia 22 - JAM DE NHIALIC 2011

Jam cï Jeremia Lɛ̈k Bäny ke Juda

¹ Go ë Bɛ̈nydït lɛ̈k yɛn bä lɔ ɣön de bääny de melik de Juda, kuat de Debid, ku lɔ lɛ̈kë melik ëtɛ̈ɛ̈n,

² ku bänyke, ku kɔc ke Jeruthalem, bïk kë lueel ë Bɛ̈nydït piŋ:

³ “Acä lueel Yɛn Bɛ̈nydït, luöi bä wek piathëpiɔ̈u ku yic aa looi. Yak raan mɛthë gël në raan cam en. Duökï raan lei, ku mɛnh abaar, ku tiiŋ abaar, ee kuöc luööi ku duökï yɔŋ, ku duökï kɔc cïn kë cïk wööc ee nɔ̈k ee të ɣericë.

⁴ Na lak lɔ looi cït man cän we yɔ̈ɔ̈k, ka mïth ke mïth ke Debid abïk ŋoot ke ke ee meliik. Ku keek në bänyken ëtök, abïk ŋoot ke ke ye tɛ̈ɛ̈k në ee kal ë bäänyë thok, në abëël ku jöŋgöörken.

⁵ Ku na kënkï kë luɛɛl riëëu, ke Yɛn bï kuëëŋ ë we nïïm an ɣön ë bäänyë abï lööny ë riääkic. Acä lueel, Yɛn Bɛ̈nydït.

⁶ “Ɣön ë bääny ë Juda aläk cï piny de Giliyad, ku lɛ̈k cï kur ke Lebanɔn të de Yɛn, ku abä tɔ ee jɔ̈ɔ̈r, të cïn raan bï ceŋ thïn.

⁷ Yɛn tooc kɔc bï ye lɔ riɔ̈ɔ̈k. Abïk yëëpken bɛ̈ɛ̈i kedhie, ku yepkï waikɛn bɛ̈ɛ̈r ke tiim ke thidar piny, ku cuɛtkï keek ë macic.

⁸ “Ku juöör ee tëëk ëtɛ̈ɛ̈n abïk röt aa luɔp kapäc an eeŋö looi ë Bɛ̈nydït kë cï ee kënë pänydïïtë.

⁹ Ku abïk aa bɛ̈ɛ̈r an ee luɔi kën wek löŋ cäk mac në Yɛn rɛɛc, Yɛn Nhialicdun, ku lamkï yiëth kɔ̈k ku luööikï keek.”

Jam de Jeremia në Biäk de Jowaɣadh

¹⁰ Kɔc ke Juda duökï melik Jothia dhiëëu, ku duökï dhiau në thonde yic. Dhiaukï aläl në biäk ë wënde Jowaɣadh, acï keek jat wei, ku acïkï röt bï bɛ puk, acïkï piny ë dhiëëthë ke bï bɛ tïŋ.

¹¹ Aye Bɛ̈nydït lueel në biäk de Jowaɣadh wën ë Jothia, raan ë dɔm bääny ë wun cök ke ee melik de Juda lueel an, “Acï jäl ee në ku acïï yenɔm bï bɛ puk.

¹² Abï thou wun cï ë ke lɛɛr thïn, ku acïï ee pinyë bï bɛ tïŋ.”

Jam de Jeremia në biäk de Jeɣoyakim

¹³ Amawoou në raan ee ɣönde yïk në yaaŋ, ku ye ŋuak nyin në ruëëny, raan ee kɔcken tɔ lui baaŋ, ku cïï wëu ke ariöpden ee gäm keek.

¹⁴ Amawoou në raan ee ye lueel an, “Yɛn bï rɔt yiɛ̈k ɣöndït, ɣön de yic ɣööt läk nhial.” Ku jɔ awëër tääu ɣönde, ku jɔ piäät në tim de thidar, ku yup ë kïn thith.

¹⁵ Ee yen bïï yïn tɔ ee melik ŋuän, na lɔ ɣööt ke tim de thidar yïk, ɣön läk wär ɣööt ke kɔc kɔ̈k? Wuur acï pïïr ë run juëc. Aa ye raan ee piathëpiɔ̈u ku yic looi, ku acï bɛ̈n kuɛth në kë ye looi yic ëbɛ̈n.

¹⁶ Ee kɔc kuanynyïïn luök kaken, go käŋ piath ë yen kedhie. Yen kën ee ye nyuɔɔth ka nɔn ŋic ë raan Bɛ̈nydït.

¹⁷ Ku yïn ee këde piɔ̈ndu yen ye kɔɔr, yïn ee kɔc cïn gup awɛ̈ɛ̈c nɔ̈k, ku ye kɔcku kuur ë yaaŋ. Acïï Bɛ̈nydït lueel.

¹⁸ Ago Bɛ̈nydït lueel në biäk de Jeɣoyakim wën de Jothia, melik de Juda an, “Acïn raan bï dhiau ë thonde yic, ku cïn raan bï ye lueel an, ‘Mɛ̈thädï! Eeŋö rɛɛc yen aya!’ Acïn raan bï ye dhiëëu ku cïn raan dhiau an, ‘Bɛ̈nydï! Melikdï!’

¹⁹ Täuden piɛth, abï thɛl wei cï mul cï thou, ku cuɛtë wei ë kal ë Jeruthalem thok.”

Jam de Jeremia në Biäk de Riääk de Jeruthalem

²⁰ Kɔc ke Jeruthalem lakkï Lebanɔn ku cötkï, lakï piny de Bacan ku dhiaukï, yak cööt në kur ke Mowap nïïm, në biäk cïï kɔc ee mat në week kedhie tiaam.

²¹ Bɛ̈nydït acï jam ke week wään kuɛth wek, ku wek cï jaai bäk jamde piŋ. Yen kë cäk looi ka në pïïrdunic ëbɛ̈n, wek cïï Bɛ̈nydït duëër kɔn riëëu.

²² Bänykun abï ë yom ke kuɔɔth wei, kɔc ee mat ë week abïï ke dɔm tɔŋ ku peec keek ke ke mac, pänydïïtdun abïï yɔ̈ɔ̈r, ku riɔ̈ɔ̈c guöp, në biäk de karɛc cäk looi ëbɛ̈n.

²³ Yïn ee lɔ̈ŋ në tiim ke thidar ë Lebanɔn yiic, ku ee jiɛthëpiɔ̈u bï ciët ŋö bä yök të le arɛɛm yï yup, arɛɛm, cït arɛɛm de tiiŋ rɔ̈p.

Nhialic Alui Jekonia Këtuc

²⁴ Go Bɛ̈nydït lɛ̈k melik Jekonia, wën de Jeɣoyakim melik de Juda an, “Yɛn cï kuëëŋ Yɛn Nhialic Pïïr, cakaa Yïn ë ye jonh ë Yɛn ciin, yïn duëër bɛ̈ɛ̈i bei,

²⁵ ku gäm yïn kɔc e yïn riɔ̈ɔ̈c në keek, kɔc kɔɔr bïk yïn nɔ̈k. Yïn bä gäm Nebukadnedhar melik de Babilonia kekë remdɛn ë tɔŋ.

²⁶ Yïn bä dhil tɔ pec wekë moor. Yïn bï dhil lɔ wun cïn raan töŋ cï dhiëëth thïn ë weyiic, ku bäk thou ëtök ëtɛ̈ɛ̈n wedhie.

²⁷ Abäk aa nhiaar adï jak ee wunë bɛ tïŋ, ku wek cïï röt bï bɛ puk.”

²⁸ Acä lueel an, “Cï melik Jekonia ciët gul cï dhuööŋ, gul cï cuat wei cïn raan kɔɔr en? Ee yen kën jɔtë yen kekë mïthke ka, peec keek ku leerë keek piny cïn kë ŋickï thïn?”

²⁹ Piny oou! Piny oou! Piŋ kë cïï Bɛ̈nydït lueel:

³⁰ “Monyë acï mäc luɔi bï yen nɔm ciën mïth, ke bï aa mony cïn kë bï kɔn tiaam. Abï nɔm ciën kuatdɛn bï lɔ̈ɔ̈k aa bɛ̈ny ë Juda, ke cït kɔc bï lɔ̈ɔ̈k tɔ̈u ë nyin de Debid yic. Acä lueel, Yɛn Bɛ̈nydït.”