Jeremia 21 - JAM DE NHIALIC 2011

Tiëm bïï Jeruthalem Tiaam acï Caar

¹ Kënë ee jam ëbɔ̈ tëde Jeremia, wään cïï melik Dhedekia ye tuöc Pacur wën de Malekia ku Dhepania bɛ̈ny de kake ë Nhialic, wën de Maathia, lueel an,

² “Luɔpë Bɛ̈nydït në biäkda, në biäk luiyë wo tɔŋ ë Nebukadnedhar melik de Babilon kekë remdɛn ë tɔŋ, tɛkdäŋ bï Bɛ̈nydït këdïït de gäi looi ë biäkda ku tɔ Nebukadnedhar tɔ puk rɔt.”

³ Go Jeremia lɛ̈k keek:

⁴ Kë bä lɛ̈k Dhedekia kï, an Acïï Bɛ̈nydït Nhialic de Yithriɛl lueel an, “Yɛn bï remduön ë tɔŋ bï thɔ̈ɔ̈r kekë melik de Babilonia tiaam. Yɛn bï tɔɔŋ ke remduön ë tɔŋ kut nïïm ë pänydïtic cil.

⁵ Yɛn bï thɔ̈ɔ̈r wo yïn ë riɛldï ëbɛ̈n, në agöth, ku në tuöc ë piɔ̈u ku në agönhdït.

⁶ Ku Yɛn bï ka pïïr ceŋ ee pänydïïtë nɔ̈k kedhie, kɔc ku läi, abïk thou kedhie ë jɔɔk tuc thook.

⁷ Ku në ee kakë cök Yɛn bï Dhedekia melik de Juda gam, kekë kɔc ee ye luööi, ku kɔc nu ee pänydïïtë yic, kɔc bï poth në jɔɔkiic, ku tɔŋic, ku cɔkic, abä ke gäm Nebukadnedhar melik de Babilon, ku gäm ke remdɛn ë tɔŋ, ku gäm ke kɔc kɔɔr bïk keek nɔ̈k. Abïï keek nɔ̈k në abätäu, acïï ke bï nyuöth kokëpiɔ̈u, ku cïï kie päl, ku cïï ke tɔ pïïr. Acä lueel, Yɛn Bɛ̈nydït.”

⁸ Go Bɛ̈nydït lɛ̈k yɛn bä lɛ̈kë kɔckë an, “Acïï Bɛ̈nydït lueel an, Wek cä gäm kueer de pïïr ku kueer de thuɔɔu.

⁹ Raan bï rëër në ee pinydïïtë yic abï thou në abätäu, ku cɔk ku në jɔk, ku raan bï lɔ biic ku lee rɔt gäm kɔc ke Babilonia, kɔc cï pänydït tuɔɔk ënɔɔnë, acïï bï nɔ̈k, abïk ban në wëiken.

¹⁰ Acä dhel nɔn cän ee pänydïïtë bï pɔ̈l, abä riɔ̈ɔ̈k. Abïï gäm melik de Babilonia, ku abïï nyuɔp piny. Acä lueel, Yɛn Bɛ̈nydït.”

Dhiën ë Bääny de Juda Aluiyë Këtuc

^11-12 Go ë Bɛ̈nydït lɛ̈k yɛn bä ë jamë gäm ɣön mac bääny ë Juda, käu de Debid an, “Piɛŋkï kë luɛɛl, Yɛn Bɛ̈nydït. Yak ŋiëc guiɛɛr looi aköölnyïïn. Gëlkï raan ye cam në raan cam yen. Na cäkkï lɔ looi, ke kërɛɛc luɔikï abï agönhdït tɔ dɛ̈p cï maany cie liɛɛu nyin.

¹³ Yïn Jeruthalem, yïn kääc tëthöny ë wɛ̈k nïïm, yïn cït kuur nu ë riaaŋ nɔm. Ku Yɛn bï thɔ̈ɔ̈r we yïn. Aye lueel an acïn raan bï yïn mak, ku acïn raan duëër rem de tɔŋdu reetic.

¹⁴ Ku wek bä luöi këtuc në biäk de kë cäk looi. Yɛn bï ɣönduön ë bääny nyop ë mac, ku mac abï këriëëc ëbɛ̈n nu ë yelɔ̈ɔ̈m nyuɔp piny. Acä lueel, Yɛn Bɛ̈nydït.”