Jeremia 2 - JAM DE NHIALIC 2011

Nhialic Amuk Yithriɛl

¹ Go ë Bɛ̈nydït lɛ̈k yɛn

² bä ee jamë lɔ lɛ̈k raan ëbɛ̈n raan tɔ̈u në Jeruthalem. An, “Yɛn ee täuduön adöt wään ee yïn meth tak, nhiëër dïït ë nhiɛɛr yïn Ɛn ɣɔn tueŋ thiɛɛk wok röt, yïn aaye Ya kuany cök në jɔ̈ɔ̈ric, piny kënë com.”

³ Yïn Yithriɛl yïn ee këdï Yatök, yïn ee kë cï kɔn luɔk ɣeric. Yɛn cï nuan, ku riääk tuöc kɔc ee yïn luöi kërac. Acä lueel, Yɛn Bɛ̈nydït.”

Awɛ̈ɛ̈c ke Kuarken ke Yithriɛl

⁴ Piɛŋkï jam de Bɛ̈nydït, wek kuat de Jakop, wek bɛ̈i ke baai de Yithriɛl.

⁵ Aye Bɛ̈nydït lueel an, “Ee gɔny ŋö cïï kuarkun yiɛ̈n Ɛn? Eeŋö tɔ ke yiɛl röt wei tëde Yɛn? Ayek yiëth cïn naamden lam, ku jɔkï ciën naamden gupken.

⁶ Akënkï diɛɛr në Yɛn, cakaa nɔn cän ke luäk bei në Rip, ku caath keek në jɔ̈ɔ̈ric, piny ril cïnic pïïu, të cïn raan rɛ̈ɛ̈r thïn, ku cïn raan ee cath thïn.

⁷ Acä keek bɛ̈ɛ̈i piny ee ŋiëc luɔk, bïk kak ee luɔk cam ku kapiɛth kɔ̈k. Ku acïk pinydï riɔ̈ɔ̈k, acïk pinydiën cä gäm keek jɔ dhiöök.

⁸ Bäny de kake Nhialic akënkï thiëëc an, tɔ̈u Bɛ̈nydït ënou? Bäny ke kake Nhialic de nɔmdï akuckï Yɛn. Bäny ke baai acïk A rɛɛc, ku jam tït në rin ke Baal, ku lɛmkï yiëth cïn naamden.

Gööny de Bɛ̈nydït ke Kɔcke

⁹ “Ku Yɛn Bɛ̈nydït, Yɛn bï göönydï bɛ lɛ̈k kɔckï. Yɛn bï gööny wo kuatden.

¹⁰ Lakkï të lɔ aköl athɛ̈i në tuur de Thaiperuth, ku tuɔɔckï raan të lɔ aköl amiäk piny de Kedar. Abäk tïŋ, acïn kë cït ee kënë cï rɔt kɔn looi.

¹¹ Acïn jur däŋ cï yanhdɛn yek lam kɔn waar, na cakaa nɔn cïï kek ee yic. Ku kɔckï acïk A waar, Yɛn Nhialic ɣɔn ë gëm keek dhuëëŋ, waarkï Yɛn në yiëth cïn kë duëërkï luöi keek.

¹² Ku Yɛn ë tënhial yɔ̈ɔ̈k bïï rɔt nieeŋ në riɔ̈ɔ̈cdït, ago kɔc tɔ gäi ku pɛ̈ukï,

¹³ në biäk cïï kɔckï awɛ̈ɛ̈c kaarou looi: acïk röt yal wei tëde Yɛn, Yɛn awaŋ de pïïu piɛth, acïk awuul wec, awuul cï ɣaar cïï pïïu lëu në muk, abïk ciën pïïu ananden.

Ariöp de Ciën Adöt de Kɔc ke Yithriɛl

¹⁴ “Yithriɛl acie lïm, aa cïï dhiëth në lïïmic. Eeŋö ye kɔc ke aterde ye yɔ̈ɔ̈p?

¹⁵ Ayek yiic ŋun në biäkde cït kɔ̈ɔ̈r, acïk pinyde tɔ ye jɔ̈ɔ̈r, ku cï pɛ̈ɛ̈nydïtke nyääŋ piny në riääkic ëbɛ̈n.

¹⁶ Ɣɛɛ, kɔc ke Mempeth ku Tapaneth acïk nɔmde ɣaar yic.

¹⁷ Yithriɛl, yïn cï ee kënë yiɛ̈në rɔt! Yïn cï ya nyääŋ piny, Yɛn Bɛ̈nydït Nhialicdu, ku ee Yɛn ë ciɛɛth yïn në pïïrdu yic ëbɛ̈n.

¹⁸ Eeŋö ye tak bä lɔ yök në lɔdu Rip ee luɔi bï yïn lɔ dek ë pïïu ke Kiir? Eeŋö ye tak bä lɔ yök në lɔdu Athiriya ee luɔi bï yïn lɔ dek në pïïu ke Yuparat?

¹⁹ Awänyduön cäk loi yen abï we luöi këtuc, ku jäldun tëde Yɛn abï we luöi këtuc. Abäk ŋic nɔn tuc en thok ku rɛɛc, yen kë cä wek Ɛn nyääŋ piny, Yɛn Bɛ̈nydït Nhialicdun, ku bɛkï piɔ̈ɔ̈th ciɛ̈n adöt në Yɛn. Acä lueel, Yɛn Bɛ̈nydït Awärjäŋ.”

Yithriɛl acï Läm de Bɛ̈nydït Rɛɛc

²⁰ Aye Bɛ̈nydït lueel an, “Yithriɛl ɣɔn thɛɛr yïn aacï bäänydï rɛɛc, yïn cï jaai bä ya riëëu ku lam Ɛn. Në kur bär nïïm ëbɛ̈n, ku në tiim tɔ̈c thäär ëbɛ̈n, yïn aaye yiëth ee käŋ tɔ lok lam.

²¹ Yïn aa cä com ke yï ye enap cä lɔc, në kɔ̈th piɛth yiic. Ku tïŋ luɔi cï yïn tɔ̈u! Yïn cï ciët kë cï dhiäth, enap cïn naamde.

²² Na yï cak bɛ waak në athabun ril cït ŋö, ke Yɛn bï ŋoot ke Ya tïŋ kïït ke kë cï wööc.

²³ Eeŋö duɛ̈ɛ̈r yïn e lueel nɔn kën yïn rɔt dhiöök, an kënë Baal kɔn lam? Tïŋ awäny cï looi në wakic, tïŋ ka cï looi. Yïn cï cït thɔ̈rɔ̈l roor cï guöp tuöc, thɔ̈rɔ̈l ee cökke nyɔ̈ɔ̈kiic,

²⁴ ee kat ke lɔ tɛ̈n ku tɛ̈n në jɔ̈ɔ̈ric. Të cï yen guöp tuöc eeŋa duëër e gël? Acïn thɔn kɔɔr en bï rɔt nuaan, yen ee tɔ̈u anande të cïï aköölkɛn ke yök ë thɔn bɛ̈n.

²⁵ Yïn Yithriɛl du yïcök tɔ baat, ku nɔn bïï yïn röl ril wei ke yï cop yiëth kɔ̈k cök. Ku acï lueel an, ‘Ei! Yɛn cïï rɔt bï pɔ̈k ciëën. Yɛn nhiaar yiëth ke juöör kɔ̈k, ku yɛn bï lɔ në kecök.”’

Yithriɛl Arɔ̈ŋ ke Kuöm

²⁶ Aye Bɛ̈nydït lueel an, “Cït nɔn ee cuɛ̈ɛ̈r guöp yäär të cïï ë yen dɔm, yen abä wek gup yäär wedhie baai de Yithriɛl, week në meliikkun ku bänykun, ku bänykuön ke ka ke Nhialic ku tït.

²⁷ Wek bï yɔ̈ɔ̈r gup, wek kɔc ee ye lueel nɔn ye tim wuur ku ye kuur moor. Kënë abï rɔt looi në biäk cïï wek röt yal wei tëde Yɛn në nyin duëër wek röt dɔ̈k Ɛn, ku na tɔ̈ukï në riääkic, wek ee Ya bɛ̈n kɔɔr bä we kony.

²⁸ “Tɔ̈u yiëth wään cäk ke luöi röt ënou? Wään täu wek në riääkic, takï ke kony week të duëër kek e lëu! Juda yïn de nɔm yiëth juëc cït juëc de pɛ̈ɛ̈nydïtku.

²⁹ Eeŋö ee göönydu? Eeŋö yïn A rɛɛc abä yïnɔm pɔ̈k Ɛn?

³⁰ Yïn cä luöi këtuc, ku acïn këpiɛɛth cï looi, yïn kën Yɛn pɔ̈l bä yï jɔ̈ɔ̈ny. Yïn cï tïtku nɔ̈k në abätäu, cï köör cï wäth.

³¹ Kɔc ke Yithriɛl piɛŋkï kë lɛ̈k week. Cä ciët jɔ̈ɔ̈r tëde week, cä ciët mɔ̈ɔ̈th ku piny rac? Eeŋö ya wek en lueel an bäk lui cï kë nhiaarkï ë wepiɔ̈ɔ̈th, ku nɔn cäkkï bï kɔn bɛ̈n ciëën tëde Yɛn?

³² Duëër tiiŋ koor nɔm määr në kuatdɛn adhääp, ku nɔn ee yen nyan thiak duëër nɔm määr në lupɔɔkɛn ke thiëëk? Ku kɔckï acïk nïïm määr në Yɛn në nïn juëc cïï ke duëërë kueen.

³³ Week aŋiɛckï apiɛth luɔi ye kɔc kɔc nhiaarke kuany cök. Na cakaa tiiŋ rac aduëër wëët në wecök.

³⁴ Lupɔɔkun acïk gup riɔk në rim ke kɔc kuanynyïïn ku kɔc cïn gup awɛ̈ɛ̈c, acie riɛm de kɔc ee ɣööt dhoŋ. “Ku në biäk de ë kake kedhie.

³⁵ Ayak lueel an, ‘Wok cïn gup awɛ̈ɛ̈c, ee yic Bɛ̈nydït acïï be ŋoot ke göth ke wook.’ Ku yɛn Bɛ̈nydït wok bä luöi këtuc në biäk cä wek jai nɔn cïn en awäny cäk looi.

³⁶ Wek cï weyiic tɔ piɔl në kë cä wek röt yal tëde yiëth ke juöör kɔ̈k. Wek bïï kɔc ke Rip riɔ̈ɔ̈k piɔ̈ɔ̈th, cït wään cïï kɔc ke Athiriya ye kɔn luöi week.

³⁷ Wek bï röt yal wei tëde kɔc ke Rip, ke we cï gup yäär. Yɛn Bɛ̈nydït, Yɛn cï kɔckuön yak keek ŋɔ̈ɔ̈th rɛɛc, acïn kë bäk yök tëde keek.”