Jeremia 19 - JAM DE NHIALIC 2011

Gul cï Dhuɔɔŋ

¹ Go ë Bɛ̈nydït lɛ̈k yɛn bä gul ë tiɔp lɔ ɣɔɔc. Acï ya yɔ̈ɔ̈k ayadäŋ bä röördït kɔ̈k lɛɛr ë yɛn ku bäny de kake Nhialic kɔ̈k dït,

² ku bä lɔ në kueer ë kal Thoŋ ë Potoced të lɔ bäny ë Ɣinom. Ku yɛn bï jam bïï gäm yɛn jɔ lueel ëtɛ̈ɛ̈n.

³ Go ë Bɛ̈nydït lɛ̈k yɛn bä lueel an, “Meliik ke Juda, ku kɔc ke Jeruthalem, piɛŋkï kë lueel ë Bɛ̈nydït de rɛm, Nhialic de Yithriɛl. Yɛn bï riääkdït bɛ̈ɛ̈i ee tënë, ku raan ëbɛ̈n raan raan lɔ ee riäŋë piŋ abï nɔm mum.

⁴ Yɛn lɔ ee kënë looi në biäk cï kɔc Yɛn pɔ̈l, ku acïk eetënë dhiöök në luɔi ye kek yiëth kɔ̈k nyuöp wal, yiëth kuckï keek, ku kuc kuarken ayï meliik ke Juda acïn kë ŋickï ë biäkden. Acïk ee tënë riɔ̈ɔ̈k në riɛm de kɔc cïn kë cïk wööc,

⁵ ku acïk yïk yiëk Baal, në biäk bïï kek mïthken gam ke ke ye miɔ̈c ye nyop ëbɛ̈n këde Baal. Akɛ̈n ke kɔn yɔ̈ɔ̈k bïk ee kënë looi, akën kɔn lɔ ë yanɔm aya.

⁶ Ka ënɔɔnë akööl abïk bɛ̈n, akööl cïï ee tënë bï bɛ aa cɔl Topeth ku nɔn ee wak de Ɣinom. Abïï cɔl Wak de Tëm de Röl.

⁷ Yɛn bï kiɛɛr de kɔc ke Juda ku kɔc ke Jeruthalem tɔ cïn naamden eetënë. Yɛn bï kɔc ater tɔ tiam keek ku näk keek ë tɔŋic. Yɛn bï gupken gäm diɛt ku läi roor bïk cam.

⁸ Yɛn bï gökdïït de riääk bɛ̈ɛ̈i ë pänydïtic, ka raan bï aa tɛ̈ɛ̈k ëtɛ̈ɛ̈n abï wɛ̈ɛ̈ŋ ku gɛ̈i arëët.

⁹ Kɔc ke ater abïk pänydït gɔ̈ɔ̈l piny ku themkï bïk kɔcke nɔ̈k. Abïï tuɔɔk cil arac ka kɔc nu ë pänydïtic, abïk röt aa cuet kapäc ku cuetkï mïthken gup.”

¹⁰ Go ë Bɛ̈nydït lɛ̈k yɛn bä gul dhoŋ në kɔc ë cath ë yɛn nïïm,

¹¹ Ku abä lɔ lɛ̈k keek an acïï Bɛ̈nydït de rɛm lueel an, “Yɛn bï ee kɔckë dhoŋ kɔ̈ɔ̈th ku dhuɔŋ ee pänydïïtë piny, ku abï ciët gul de tiɔp cï dhuɔɔŋë, gul cïï duëërë bɛ matic. Kɔc abïk kɔckɛn cï thou aa tɔ̈ɔ̈u ayï Topeth yic, në biäk bïï yen ciën të bï ë keek tɔ̈ɔ̈u thïn.

¹² Yɛn cï gutguut lueel nɔn bän ee pänydïïtë kekë kɔc ceŋe tɔ cït Topeth.

¹³ Ɣööt ke Jeruthalem, ku ɣööt ke meliik ke Juda, ku lɔ ɣööt kedhie, ɣööt ye ke wal ŋïr nyuöp kuɛl ë kenïïm, ku të cï mɔ̈u gam thïn ke ye miɔ̈c gɛ̈më yiëth, abïk yiic cuɔl kedhie cït Topeth.”

¹⁴ Ku ëtɛ̈ɛ̈n yɛn cï Topeth jɔ nyääŋ piny, të wën cï Bɛ̈nydït ya yɔ̈ɔ̈k bä jamde lɔ lueel thïn. Yɛn cï lɔ ku la kɔ̈ɔ̈c tëde gööny ë Luaŋdïtic, ku ja kɔc yɔ̈ɔ̈k kedhie,

¹⁵ an acïï Bɛ̈nydït de rɛm, Nhialic de Yithriɛl lueel an, “Yɛn bï ee pänydïïtë kekë wuöt thiääk ë yen kedhie, luöi këtuc wään cä lueel an bä looi, në biäk riɛl wek nïïm, ku cäkkï kë luɛɛl ee piŋ.”