Jeremia 17 - JAM DE NHIALIC 2011

Kërac ku Luɔi bï Juda Luöi Këtuc

¹ Aye Bɛ̈nydït lueel an, “Kɔc ke Juda, karɛckun acï ke gɔ̈ɔ̈r në agalam de wëëth, acï ke guaŋ ë wepiɔ̈ɔ̈th në thoŋ de kuur ë daimon, ku ɣöötë keek në aguuk ke yïkkun kɔ̈ɔ̈th.

² Kɔckun ayek lam në yïk kɔ̈ɔ̈th, ku në kït cï luöi yanh tiiŋ cɔl Acera, ku në tiim tɔ̈c thäär ëbɛ̈n, ku kur nïïm,

³ ku lɔ kur nu ë riaaŋ nɔm. Yɛn bï kɔc ke aterdun tɔ jɔt kuɛthdun, ku kakun në biäk de karɛc cäk looi pinydun ëbɛ̈n.

⁴ Wek bï piny cä gäm week gam, ku wek bä tɔ luui kɔc ke aterdun piny cïn kë ŋiɛckï thïn, në biäk cït agönhdï mac, ku abï dɛ̈p aɣet athɛɛr.”

Ka Kɔ̈k cï Lueel

⁵ Aye Bɛ̈nydït lueel an, “Yɛn bï kɔc ee röt yal wei ë yalɔ̈ɔ̈m luöi këtuc, kɔc ee kɔc ŋɔ̈ɔ̈th, ku kɔc ŋäthkï mïth ke kɔc.

⁶ Acïtkï bun nu ë jɔ̈ɔ̈ric, ee cil ë jɔ̈ɔ̈ric tëril, ee cil piny de awai cïn kën ee cil thïn. Acïn këpiɛth duëër kɔn tuöl tëde keek.

⁷ “Ku Yɛn bï kɔc ee Yɛn ŋɔ̈ɔ̈th thieei.

⁸ Keek acïtkï tiim ee cil ë wɛ̈ɛ̈r yɔu, ku ye meiken ɣet ë pïïuwiic. Acïkï ee riɔ̈ɔ̈c të cï piny tuöc, në biäk ye yïthken tɔ̈u ke ke tɔ̈c, acïkï ee diɛɛr të cïn en deŋ, ayek ŋoot ke ke lok në mïth.

⁹ “Eeŋa duëër piɔ̈n ë mɛnh ë raan ŋic? Acïn këdäŋ rac aläl, ade juän dïït cïï bï dem.

¹⁰ Yɛn Bɛ̈nydït, Yɛn ee täŋ de kɔc kɔɔriic, ku thɛm kɔc piɔ̈ɔ̈th. Yɛn ee ŋɛk looi, cït man ë kueerdɛn ee yen ceŋ, ku cït man ë këdɛn ee looi.”

¹¹ Raan ee wëu yök në ruëëny acït din ee toŋ kën ke dhiëëth kuem. Në pïïrde yic cil, kuɛthde abï määr ëbɛ̈n, ku në kecök ciëën abï ciën naamde, abï aa dhɔ̈n tei.

¹² Tëɣeric de Bɛ̈nydïïtda acït thöny ë dhuëëŋ, ɣɔn gɔlë käŋ aa kääc në kuur thöny nɔm.

¹³ Bɛ̈nydït yïn aye aŋäth de Yithriɛl, kɔc cï yïn rɛɛc kedhie abïï keek tɔ yäär. Abïk määr cï rin cï gɔ̈ɔ̈r ë abuui yic, kɔc cï lɔ paan ë thuɔɔu, në biäk cï kek Yïn pɔ̈l, Yïn Bɛ̈nydït, Yïn awaŋ de pïïu piɛth.

Jeremia Akɔɔr Kuɔɔny Tëde Bɛ̈nydït

¹⁴ Bɛ̈nydït tɔ ya dem ku yɛn bï waar taitai, luäk yɛn ku acïn kë bän riɔ̈ɔ̈c. Ee Yïn ee raan ya leec!

¹⁵ Aye kɔc lɛ̈k yɛn an, “Täu karɛc wään cï Bɛ̈nydït lueel an bïï ke bɛ̈ɛ̈i ë wogup ënou? Tɔ ke looi keek ënɔɔnë!”

¹⁶ Ku Bɛ̈nydït, yïn kɛ̈n lɔ̈ŋ bä keek yiɛ̈n riääk, yɛn kën akööl ke rac kɔ̈ɔ̈r keek. Bɛ̈nydït, yïn ŋic ee kënë. Yïn ŋic kë cä lueel.

¹⁷ Du rɔt tɔ ee riɔ̈ɔ̈cdït tëde yɛn, Yïn ee tëdiën de thiaan të cï nuan bɛ̈n.

¹⁸ Bɛ̈ɛ̈iyë ayäär në kɔc ee ya yɔŋ gup, ku luäk yɛn Bɛ̈nydït. Thiɔ̈ŋ keek në riɔ̈ɔ̈c, ku du yɛn tɔ riɔ̈c. Bɛ̈ɛ̈iyë riääk në kegup, ku dhoŋ keek abïk lɔ thorthor.

Në Riëëu de Thabath

¹⁹ Go ë Bɛ̈nydït lɛ̈k ɛn an, “Lɔɔr Jeremia, ku luɛɛlë jamdï në kal Thoŋ de Kɔc, të wën ye meliik ke Juda lɔ ë pänydïtic, ku yen ye kek jäl, ku ëtɛ̈ɛ̈n jɔ lɔ në thook kɔ̈k ke Jeruthalem kedhie.

²⁰ lɛ̈kë meliik ku kɔc ke Juda kedhie, ku raan ëbɛ̈n raan rëër ë Jeruthalem ku yek tëëk ee kɛ̈lkë thook, bïk kë luɛɛl piŋ.

²¹ lɛ̈kë keek na nhiaarkï wëiken, në ke cïï kathiek ee ɣääc ë Thabath yic, ku në cïn kë bïk aa tëëk ë kɛ̈l ke Jeruthalem thook,

²² ku në cïn kë bïk aa bɛ̈ɛ̈i bei ë ɣöötken yiic në Thabath yic. Acïkï bï dhil aa lui në Thabath yic, abïk dhil aa döt ke ee kööl ɣeric, cït man cän kuarken yɔ̈ɔ̈k.

²³ Kuarken akënkï jamdï piŋ, ku cïn këden yic thïn ë yen. Acïk nïïm bɛ̈n riɛl, akënkï ya riëëu ku cïkkï wɛ̈ɛ̈t tëde Yɛn.

²⁴ “Lɛ̈kë kɔckï bïk lööŋkï dhil riëëu kedhie. Acïkï këriëëc thiek ëbɛ̈n bï dhil aa tëëk në kɛ̈l ke pänydït thook kedhie në Thabath yic. Abïk Thabath dhil döt ke ee kööl ɣeric, ku acïn luɔi bïk dhil aa looi thïn liŋliŋ.

²⁵ Ku ëtɛ̈ɛ̈n meliiken ku wɛ̈ɛ̈t meliiken abïk aa tɛ̈ɛ̈k ë kɛ̈l ke Jeruthalem thook, ku dekkï nïïm riɛl de bääny wään tɔ̈u ke Debid. Abïk kɛɛc në abëëliic ku jöŋgöör kɔ̈ɔ̈th, ëtök në kɔc ke Juda, ku kɔc ke Jeruthalem, ku pänydïït de Jeruthalem abï yic thiäŋ ke kɔc aköölnyïïn ëbɛ̈n.

²⁶ Kɔc abïk aa bɛ̈n në wuöt ke Juda yiic, ku në wuöt thiääk ë Jeruthalem, abïk aa bɛ̈n piny de Benjamin, ku në kur thäär, ku piny ë kuur, ku në Juda të lɔ wöuwic. Abïk ɣöndiën ë Bɛ̈nydït yiɛ̈n yic miɔ̈c ye nyop ëbɛ̈n, ku miɔ̈c näk, ku miɔ̈c ë rap ku wal ŋïr, ku miɔ̈c de thieithieei.

²⁷ Ku abïk ya dhil riëëu, ku dötkï Thabath ke ee kööldiën ɣeric. Acïkï kathiek bï dhil aa tɛ̈ɛ̈k ë kal thok ë Jeruthalem ee köölë, na lek lɔ looi, yɛn bï thoŋ ë kal de Jeruthalem nyop ë mac. Mac abï ɣööt ke bääny nyuɔp piny ë Jeruthalem, ku acïn raan bï ye liɛɛu.”