Jeremia 16 - JAM DE NHIALIC 2011

Këde Bɛ̈nydït piɔ̈u në biäk ë Pïïr de Jeremia

¹ Go jam de Bɛ̈nydït bɛ̈n tëde yɛn an,

² “Du thiëk ku du nɔm bï dɛ mïth të cït ee tënë.

³ Yïn bä lëk kë bï rɔt luöi mïth bïï dhiëëth ee tënë ayï kë bï rɔt luöi wärken ku märken.

⁴ Abïk thou në jɔɔk tuc thook, ku acïn raan bï keek dhiëëu ku cïn raan tɔ̈ɔ̈u keek. Gupken abïk dhɔt piny cï tiɔɔm awäi cï kut nɔm piny. Abïï keek nɔ̈k ë abätäu ku thoukï në cɔk, ku gupken abïk aa këcam de diɛt ku läi roor.

⁵ “Du lɔ ɣön de yic dhiëëu. Ku du de raan bä dhiëëu. Yɛn cïï kɔckï bï bɛ thieei në mät ku acä keek bï nyuöth nhiëër agɔk kekë kokdepiɔ̈u.

⁶ Kɔc kueth ku kɔc kuanynyïïn abïk thou ee pinyë, ku acïn raan bï ke tɔ̈ɔ̈u ku cïn raan bï ke dhiëëu. Acïn raan bï rɔt ŋuɛ̈ɛ̈t ku cïn raan mut yenɔm bïï yen ke dhiëndepiɔ̈u nyuɔɔth.

⁷ Acïn raan bï cam ku dëk kekë raandäŋ ke bïï muk piɔ̈u në biäk cïï raan nhiɛɛr thou. Acïn raan bï dhiënëpiɔ̈u nyuɔɔth, acakaa raan cïï wun thou ku nɔn ee man.

⁸ “Du lɔ ɣön looi ë kɔc dhuëëŋ thïn. Du nyuc piny we keek, du cam ku du dëk we keek.

⁹ Piŋ kë lueel ë Bɛ̈nydït de rɛm, Nhialic de Yithriɛl. Yɛn bï röl de dhuëëŋ ku miɛtëpiɔ̈u de monythiëk ku nyan thiak miɛɛm. Kɔc abïk pïïr ee tënë në biäk bïï kek ee kakë tïŋ.

¹⁰ “Të lee yïn keek lɔ lëk ee kakë kedhie, abïk yïn luɔp an eeŋö duöi Ɛn keek atuc aya. Abïk aa lop an ee kërɛɛc ŋö cuk looi, aa awäny ŋö cuk luöi Bɛ̈nydït Nhialicden.

¹¹ Ëtɛ̈ɛ̈n jɔ lëk keek an acïï Bɛ̈nydït lueel an, ‘Kuarkun acïk röt wɛl wei në Yɛn, ku lamkï yiëth kɔ̈k ku luuikï keek. Acïk Yɛn nyääŋ piny ku cïkï wëëtdï riëëu.

¹² Ku wek cï kërɛɛc wär kërɛɛc de kuarkun looi, Week wedhie wek rilnïïm ku rackï, ku wek cïï Yɛn ee riëëu.

¹³ Ku ëtɛ̈ɛ̈n, wek bä cuɔp wei ee pinyë lɛɛr week piny kënkï kɔn tïŋ ku kën ë kuarkun kɔn tïŋ. Ku wek bï yiëth kɔ̈k jɔ aa luööi ëtɛ̈ɛ̈n aköl ku wakɔ̈u, ku acïn kokëpiɔ̈u bä nyuöth week.’”

Bɛ̈n Ciëën ë Pɛ̈cic

¹⁴ Aye Bɛ̈nydït lueel an, “Akööl abïkï, akööl cïï kɔc bï bɛ aa kuëëŋ në Yɛn, ke ya ye Nhialic pïïr, Raan ë bïï kɔc ke Yithriɛl bei piny de Rip.

¹⁵ Abïk aa kuëëŋ në Yɛn, ke ya ye Nhialic pïïr, Raan ë bïï kɔc ke Yithriɛl bei piny de rut, ku në wuöt kɔ̈k yiic, wuöt cän keek thiäi piny. Abä keek bɛ̈ɛ̈i ciëën pinyden, piny cä gäm kuarken. Acä lueel, Yɛn Bɛ̈nydït.”

Bɛ̈n de Këtuc

¹⁶ Aye Bɛ̈nydït lueel an, “Yɛn cï kɔc juëc ee dep ë rec cɔɔl, bïk ee kɔckë bɛ̈n dɔm. Ëtɛ̈ɛ̈n Yɛn cï kɔc juëc ee yäp cɔɔl, bïk ee kɔckë bɛ̈n yɔ̈ɔ̈p, ë kuriic ëbɛ̈n, ku kurthii nïïm ëbɛ̈n ku kɔ̈kkiic ku ë kur dït nïïm.

¹⁷ Yɛn ee këriëëc loikï ëbɛ̈n woi. Acïn kë cï thiaan tëde Yɛn, karɛcken acïkï ee ban ë Yanyin.

¹⁸ Abä keek tɔ cut raan rou ë biäk de kërɛɛcden ku awɛ̈ɛ̈cken, ë biäk cï kek pinydï dhiöök në yiëthkɛn cïn yiic wëi cï gup cï thou, ku thiäŋkï ë yiëthkɛn Alueth.”

Jeremia Aläŋ Aŋäth ë Bɛ̈nydït Yic

¹⁹ Bɛ̈nydït ee Yïn ee Raan ee ya gël ku gämë yɛn riɛl, Yïn cï kuɔny në akööl ke nuan, juöör abïk aa bɛ̈n tëde de Yïn ë piny thar ku luelkï an, “Kuarkuɔ aake de nïïm yiëth alueth, ayek yiëth cïn naamden.

²⁰ Duëër kɔc röt luöi yanhden? Ei, na lek lɔ looi, kënë acïï duëër aa yiëth ë yic.”

²¹ Go Bɛ̈nydït lueel an, “Ka ënɔɔnë Yɛn bï riɛldï tɔ ŋic ë juöör ëbɛ̈n, ku riɛldiëndït, abïk ŋic nɔn Yan Bɛ̈nydït.”