Jeremia 15 - JAM DE NHIALIC 2011

Këtuc Luiyë Kɔc ke Juda

¹ Na wën, go ë Bɛ̈nydït lɛ̈k ɛn an, “Acakaa Mothe kekë Thamwɛl kek ë läŋ Yɛn eenë, Yɛn cïï ee kɔckë duëër nyuöth kokëpiɔ̈u. Tɔ keek lɔ biic, tɔ keek jël ë Yanyin.

² Të ye kek yïn thiëëc ee tënou duëër kek lɔ thïn, lëkë keek nɔn cän e lueel an: Kɔ̈k acï ke gäm thon de jɔɔk, yen të bï kek lɔ thïn ka! Kɔ̈k acï ke gäm thon de abätäu, yen të bï kek lɔ thïn ka! Kɔ̈k acï ke gäm thon de cɔk, yen të bï kek lɔ thïn ka! Kɔ̈k acï ke gäm pɛ̈c bï ë ke peec, yen të bï kek lɔ thïn ka!

³ Acä guiir Yɛn Bɛ̈nydït nɔn bïï karil yiic kaŋuan rö luöi keek: Abï keek nɔ̈k në abätäu, gupken abïï jɔ̈k keek thɛl wei, abïï diɛt keek ŋueet, ku läi roor abïk ka cï döŋ cuet.

⁴ Yɛn bï kɔc ke piny nɔm ëbɛ̈n aa tɔ riɔ̈c ë keek, në biäk de kë cï Ɣedhekia wën de Manatha looi ë Jeruthalem wään yen melik.”

⁵ Aye Bɛ̈nydït lueel an, “Kɔc ke Jeruthalem eeŋa bï piɔ̈u kok ke week, ku eeŋa bï we dhiëëu? Eeŋa bï kaam dït nööm ke thiëc täu täu wek?

⁶ Wek cï Ya rɛɛc, wek cï wekɔ̈ɔ̈th wɛ̈l Yɛn. Aguɔ a cin riɛny tueŋ ku dhiac we yiic, në biäk cän bäp në guöm de agönhdï.

⁷ We ya wiɛɛu ë yomic cï wal, ë wuöt ke pinydun ëbɛ̈n. Kɔckï wek cä riɔ̈ɔ̈k, ku näk mïthkun, në biäk kën wek kuɛɛrkuön rac pɔ̈l.

⁸ Ade diëër abɛɛr juëc pinydun, diëër wär liɛɛt ë wɛ̈ɛ̈r yɔu. Yɛn ee dhuökkun nɔ̈k ke ke kor, ku ta märken nuan. Aya keek yuöp piny ëthiäu në tɔ̈ɔ̈k ku riɔ̈ɔ̈cdït.

⁹ Tiiŋ cï mïthke kadhorou thou acï thɔ̈ɔ̈k, ke ee wëi dääkiic. Kööldɛn ɣer acï guɔ aa cuɔlëpiny, acï yäär ku tɔ̈k piɔ̈u. Yɛn bï kɔc ke aterdun tɔ näk week, wek kɔc ŋoot ke we pïïr. Acä lueel, Yɛn Bɛ̈nydït.”

Jeremia Agööny tëde Bɛ̈nydït

¹⁰ Amawoou yɛn dhiau piɔ̈u! Eeŋö jɔ amaar yɛn bɛ̈ɛ̈i ë piny nɔm? Yɛn ee göth ku tɛɛr wo kɔc ëbɛ̈n kɔc ke pinyda. Yɛn cïn wënh cä nööm ku cïn wënh cä gam, ku kɔc kedhie ayek ya läm aciɛɛn.

¹¹ Bɛ̈nydït tɔ aciɛɛn ëbɛ̈n tɔ ee yic, na kɛ̈n yïn luöi ë yic, ku na kɛ̈n yïn lɔ̈ŋ në biäk de kɔc ke aterdï, wään cï kek nuan ku cïk nïïm mum.

¹² (Acïn raan duëër wëëth dhoŋ kɔ̈u, të man ee wënh de të lɔ rut cï liääp ke maläŋ.)

¹³ Go ë Bɛ̈nydït lɛ̈k ɛn an, “Yɛn bï kɔc ke ater tuɔɔc bïk wëu ku kajuëc ke kɔckï lɔ jɔt, në baŋ bän ke luöi këtuc në biäk de karɛc cïk looi pinyden ëbɛ̈n.

¹⁴ Abä keek tɔ luui kɔc ke aterden piny cïn kë ŋickï thïn, në biäk cït agönhdï mac, ku abï dɛ̈p aɣet athɛɛr.”

¹⁵ Aguɔ lueel an, “Bɛ̈nydït, Yïn ee käŋ yökiic. Ye ya tak ku kony yɛn. Tɔ ya guur rɔt në kɔc ee yɛn yɔŋ. Du go tïït aläl agokï yɛn cïï bï nɔ̈k. Ye tak apiɛth ee biäkdu yen aye ë yɛn läät.

¹⁶ Yïn cï jam we yɛn guɔ wëlku piŋ kedhie. Yɛn ee këdu Bɛ̈nydït Awärjäŋ, ka wëlku ayek ya thiɔ̈ɔ̈ŋ piɔ̈u në miɛtëpiɔ̈u ku dhuëëŋ.

¹⁷ Yɛn kën lɔ rëër wo kɔc kɔ̈k, ke ya dɔl ku ja kööl piɛth looi. Në riëëu riëëu yɛn Yïn, Yɛn cï rëër yatök, ku ja göth aläl.

¹⁸ Eeŋö jan tɔ̈u ë nuanic? Eeŋö cïï kënë tëtöökkï waar? Eeŋö kën kek dem? Kɔɔr bä ya tɔ jeth piɔ̈u cï nyin ee dëu mɔ̈i?”

¹⁹ Go Bɛ̈nydït ee kënë bɛ̈ɛ̈r lueel an, “Na lɔ rɔt puk, yïn bä dhuöny nɔm ciëën, ku yïn bï bɛ aa raan ee ya luööi. Yïn cï jam yic lueel, yïn bï bɛ aa tiëtdï. Kɔc abïk bɛ̈n ciëën tëde yïn, ku acïn kë bï yïn tɔ lɔ tëde keek.

²⁰ Yïn bä tɔ cït kal de maläŋ ril të de keek. Abïk thɔ̈ɔ̈r ë yïn, ku acïkï yïn bï tiam, Yɛn bï tɔ̈u wo yïn, ku gɛ̈l yïn ku muɔ̈k yïn aril.

²¹ Yïn bä gël aril në riɛl de kɔc rac ku kɔc ke akuöörkuöör. Acä lueel, Yɛn Bɛ̈nydït.”