Jeremia 14 - JAM DE NHIALIC 2011

Cɔŋ Dïït Rac

¹ Go ë Bɛ̈nydït lɛ̈k ɛn në biäk de cɔk,

² an, “Juda adhiau, pɛ̈ɛ̈nydïtke arilkï wei. Kɔcke atɔ̈ukï piny ë jiɛthëpiɔ̈u, ku Jeruthalem adhiëëu kuɔɔny.

³ Kɔc kueth ayek kɔc ee keek luööi tuöc pïïu, ayek lɔ në awuuliic ku cïn pïïu yökkï ke, ayek bɛ̈n ciëën në aguut cïn yiic pïïu. Ayek kenyïïn thiaan në ayäär ku ciën aŋäth.

⁴ Në biäk cïn en deŋ, ku piny acï ril wei, kɔc ee pur atök ke piɔ̈ɔ̈th, ayek kenyïïn thiaan.

⁵ Ku kɛɛu ee abeteudɛn ë piɛcë dhiëëth nyääŋ piny në biäk de ciën wal.

⁶ Ku mul roor ayek kɔ̈ɔ̈c ë kur kor nïïm, ku jɔkï aa wëi nhial cï kɔ̈ɔ̈rgɔl, acïkï ee bɛ daai në biäk de ciën këcam.

⁷ Kɔckï ayek Yɛn lɔ̈ŋ an, ‘Cakaa nɔn cï karɛckuɔ wo gaany, Bɛ̈nydït kony wook, cït man cïn gutguut lueel. Wok cï röt wɛl wei ë Yïlɔ̈ɔ̈m raan juëc, wok cï kërac wäc yïn.

⁸ Yïn aye aŋäth töŋ de Yithriɛl, Ee Yïn ee raan ee wo kony ë riääkic. Eeŋö jɔ Yïn ciët alei pinyda, eeŋö ee Yïn ciët raan keny ee nïn tök thöl?

⁹ Eeŋö ee Yïn ciët raan cï nɔm mum, eeŋö ee Yïn ciët raan de tɔŋ cïn kony? Ee yic, Bɛ̈nydït Yïn tɔ̈u we wook! Wok ee kɔcku, du wook pɛ̈lwei.’ ”

¹⁰ Aye Bɛ̈nydït lueel në biäk ee kɔckë an, “Ayek nhiaar bïk kat ë Yɛn, ku acïkï röt bï tiit. Ka Yɛn cïï piɔ̈u mit wo keek. Yɛn bï ka cïk wööc tak, ku luöi keek këtuc ë biäk de karɛcken.”

¹¹ Go ë Bɛ̈nydït lɛ̈k ɛn an, “Du Yɛn ee luɔp bä ee kɔckë kony.

¹² Cakaa kek ë reec këcam, Yɛn cïï lɔ̈ŋden bï kɔɔr kek kuɔɔny bï piŋ, na cakaa kek ë gëm Yɛn miɔ̈c ye nyop ëbɛ̈n, ku nɔn ee miɔ̈c ë rap, Yɛn cïï piɔ̈u bï miɛt wo keek. Abä keek nɔ̈k ë abätäu, ku näk keek ë cɔk ku jɔɔk.”

¹³ Aguɔ jɔ lueel an, “Bɛ̈nydït Awärjäŋ, aŋic nɔn ye tït e lɛ̈k keek an, acïn tɔŋ bï nu, ku acïn cɔŋ bï nu, në biäk cï Yïn gutguut lueel, aye lueel an, ee mät yen bï nu ë piny yic.”

¹⁴ Go ë Bɛ̈nydï bɛ̈ɛ̈r an, “Tït aluelkï lueth në rinkï, akɛ̈n keek tooc, ku akɛ̈n keek yɔ̈ɔ̈k, ku acïn jam töŋ cä lɛ̈k keek. Yen nyuuth jiɛɛm kek ee këden, aacïï bɔ̈ tëde Yɛn, ka caarkï ayek lueth, kakɛn ë thööŋkï keek ë kenïïm.

¹⁵ Yɛn Bɛ̈nydït, yïn bä lɛ̈k kë bä luöi ee tïtkë, tït kɛ̈n ke tooc, ku yek lɔ jam ë rinkï ku yek lueel an, tɔŋ ku cɔk acïï piny bï yök. Abä keek nɔ̈k në abätäu ku në cɔk.

¹⁶ Ku kɔc cïk keek lɛ̈k ee jamë abïï keek nɔ̈k në ee kueerë aya. Gupken abïï keek cuat wei ë kuɛɛr ke Jeruthalem yiic, ku abï ciɛ̈n raan bï keek tɔ̈ɔ̈u. Kënë abï rɔt luöi keek kedhie. Diäärken ku wɛ̈ɛ̈tken, ku duetken, abä keek tɔ col karɛcken.”

¹⁷ Bɛ̈nydït acï yɛn yɔ̈ɔ̈k bä kɔc lɛ̈k jiɛthëpiɔ̈ndï, ku guɛɛr an: “Në ya wat nyin në pïïu aköl ku wakɔ̈u, në ya cïï kääc ë dhiëëu, në biäk cïï kɔckï yiëk gup bɔ̈ɔ̈tdït, ku acï ke gäm gup tëtöök.

¹⁸ Të wën lan roor, guɔ gup ke kɔc cï nɔ̈k tɔŋ tïŋ, wën bä yɛn wutic, guɔ kɔc nɛ̈k cɔk tïŋ. Tït ku bäny ke kake Nhialic aloikï luɔiden, ku akuckï kë loikï.”

Kɔc Alɛ̈ŋkï Bɛ̈nydït

¹⁹ Bɛ̈nydït cï Juda rɛɛc taitai? Man kɔc ke Dhiɔn? Eeŋö gëm Yïn wo bɔ̈ɔ̈tdïït cït ee kënë? Tëtök cïï wok duëër waar? Wok kɔɔr mät, ku acïn këpiɛth cï tuöl, wok ŋäth dem, ku ee riɔ̈ɔ̈cdït yen ee guɔ bɛ̈n.

²⁰ Bɛ̈nydït, Yïn cuk luöi awäc, wok cï karɛckuɔ gam, ku gɛmku karɛc ke kuarkuɔ.

²¹ Tak gutguutdu ku du wook biɔn gup, du ayäär bïï Jeruthalem, të de thöönyduön ë dhuëëŋ. Du löŋduön cï mac we wook dhoŋ kɔ̈u.

²² Acïn yanh de juöör kɔ̈k duëër deŋ bɛ̈ɛ̈i, ayï tënhial yetök acïï duëër nyieer. Wok cï aŋäth tääu ë Yïguöp, Yïn Bɛ̈nydït Nhialicda, në biäk yen Yïn ë loi ee kakë.