Jeremia 13 - JAM DE NHIALIC 2011

Lupɔɔ ɣer

¹ Go ë Bɛ̈nydït lɛ̈k yɛn bä lupɔɔ ɣer lɔ ɣɔɔc ku ciɛŋ keek, ku acï a yɔ̈ɔ̈k cä ke bï tääu ë pïïuwiic.

² Aguɔ keek ɣɔɔc ku ciɛŋ keek.

³ Go jam de Bɛ̈nydït bɛ bɛ̈n të de yɛn an,

⁴ “Lɔ ë wɛ̈ɛ̈r ë Yuparat ku thian lupɔɔ ë kökic ë kuriic.”

⁵ Guɔ lɔ ku thiaan ë Yuparat lɔ̈ɔ̈m.

⁶ Na wën go ë Bɛ̈nydït lɛ̈k yɛn bä lɔ ciëën Yuparat bä lupɔɔ lɔ bɛ̈ɛ̈i.

⁷ Aguɔ lɔ ciëën, ku të wën yɔ̈k yɛn të ë thiaan yɛn keek, acä ke yök, ke ke cï riääk ka acïkï be piath.

⁸ Ago jam de Bɛ̈nydït bɛ bɛ̈n tëde yɛn an:

⁹ “Yen kueer bän lɛc de Juda riɔ̈ɔ̈k kï kekë lɛcdïït de Jeruthalem.

¹⁰ Kek ee kɔc rɛckë acïk jaai bïk A riëëu. Acïk nïïm riɛl arëët ku jɔkï rac aläl, ku acïk yiëth kɔ̈k lam ku luuikï keek. Ka keek abïk ciët ee lupɔɔkë, lupɔɔ cïï be piath.

¹¹ Cït man ye lupɔɔ lɔ dekdek ë raan kɔ̈u, yen ayan baai de Yithriɛl kekë baai de Juda kɔɔr bïk röt muɔ̈k ë Yɛn ë dekdek. Yɛn aa loi ee kënë agokï aa kɔckï, ku agokï dhuëëŋ ku riëëu alɛɛc yiɛ̈n rinkï, ku akënkï Ya riëëu.”

Gul ë Mɔ̈u

¹² Go Bɛ̈nydït Nhialic jam ke yɛn lueel an, “Jeremia, lëkkë kɔc ke Yithriɛl bïk gul ke mɔ̈u ëbɛ̈n thiɔ̈ɔ̈ŋ ë mɔ̈u. Abïk bɛ̈ɛ̈r an ŋickï nɔn bïï ë gul ëbɛ̈n thiɔ̈ɔ̈ŋ në mɔ̈u.

¹³ Ku lëkkë keek aya an Yɛn, Yɛn Bɛ̈nydït, Yɛn bï kɔc ke ee pinyë thiɔ̈ɔ̈ŋ ë mɔ̈u abïk wiɛɛt: Meliik, kek mïth ke wɛ̈ɛ̈t ke Debid, ku bäny ke kake Nhialic, ku tït, ku kɔc ke Jeruthalem kedhie.

¹⁴ Ku ëtɛ̈ɛ̈n abä keek jɔ dhuööŋ cï guöl, ŋɛk në ŋɛk kɔ̈u, röördït ku dhuök akït. Acïn kokëpiɔ̈u, ku cïn dhiënëpiɔ̈u, ku cïn pïïu ke nyin bï A tɔ päl luɔi näk Yɛn keek.”

Jeremia Ayöök Kɔc në Biäk de Lɛc

¹⁵ Kɔc ke Yithriɛl! Acïï Bɛ̈nydït lueel. Kuɔɔrkï röt piny ku piɛŋkï kë lueel.

¹⁶ Riëëukï Bɛ̈nydït Nhialicdun, të kën En cuɔlëpiny guɔ bɛ̈ɛ̈i, ku wek ee guɔ kɔ̈th në kur, ke ŋoot ke kën cuɔlëpiny dït bɛ̈ɛ̈i tëde ɣɛɛrduön yak ŋɔ̈ɔ̈th.

¹⁷ Të cä wek bï piŋ, ke yɛn bï dhiau ke ya thiaan në biäk de lɛcdun, yɛn bï dhiau ë jiɛthëpiɔ̈u, ku pïïu ke yɛn nyin abïk riŋ, në biäk cïï kɔc ke Bɛ̈nydït peec.

¹⁸ Go ë Bɛ̈nydït lɛ̈k ɛn an, “Lëkkë melik kekë man bïk bɛ̈n nyuc piny ë thöönyden nɔm, ë biäk cïï göölkɛn läk lööny piny ë kenïïm.

¹⁹ Wuöt tɔ̈u të lɔ wöuwic ë Juda acï keek tuɔɔk, acïn raan duëër lɔ të nu kek. Kɔc ke Juda kedhie acï keek peec.”

²⁰ Daaiyë Jeruthalem! Kɔc ke aterdu abïkï të lɔ rut! Tɔ̈u kɔc ënou kɔc wään muk keek, kɔckuön wään ee yïn rɔt lɛɛc?

²¹ Eeŋö bäk jɔ lueel, të le kɔc yak keek tɔ ee määthkun we peec ku jɔkï week ceŋ? Wek bï tɔ̈u arɛɛmic cï tiiŋ kɔɔr dhiëth.

²² Na lak aa lop an eeŋö tɔ ee kakë lui röt week, eeŋö ye lupɔɔkun rɛtiic ku eeŋö ye ë week wiëët, ee biäk de karɛckun rac aläl.

²³ Duëër raan ë Kuc kïn de yen guöp waar, duëër kuac kïtke nyaai? Na lëukï, ke week wek kɔc ee karɛc looi, wek duëër yith ŋic ë luɔi.

²⁴ Bɛ̈nydït abï we wɛɛr piny cï wal cï yom ë jɔ̈ɔ̈ric ke gap wei.

²⁵ Acï lueel, an kënë abï aa riääk bï we yök. Yen kë cï lueel ka an bï luöi week, në biäk cä wek nïïm määr ë yen ku ŋäthkï yiëth aluɛth.

²⁶ Bɛ̈nydït guöp abï lupɔɔkun yɔ̈ɔ̈t bei ë we kɔ̈ɔ̈th, ku tɔ ayärdun woi.

²⁷ Acï week tïŋ ke we loi ka mɛɛn keek. Acï week tïŋ ke we kuany yiëth kɔ̈k cök ë kur nïïm ku ë duumiic, cït man ë mony cïï tiiŋ ë raan thiëëk kek diir, ku cït thɔn ë kɛɛu cop ŋun ë kɛɛu. Amawoou në week kɔc ke Jeruthalem, wek cï luöi këtuc, ee nɛn yen bä wek dikëdik?