Jeremia 12 - JAM DE NHIALIC 2011

Jeremia Alop Bɛ̈nydït

¹ Go Jeremia lueel an, “Bɛ̈nydït na luɛɛl göönydï wo Yïn, Yïn bïï yök ke yï de nɔm yic. Ku Yïn bä dhil luɔp në biäk de kake guiɛɛr de löŋ yic. Eeŋö ye kɔc ee karɛc looi kuɛth? Eeŋö ye kɔc ee ruëëny looi tiam?

² Aye keek com, ku ayek ɣet piny, ayek luɔk, ku dhiëthkï mïth. Ayek jam apiɛth ë biäkdu, ku acïkï Yïn ee riëëu guöp ëyic.

³ Ku Bɛ̈nydït, Yïn ŋic yɛn, Yïn ee kë luɔi woi, ku Yïn nhiaar aläl. Thɛlë kɔc ee karɛc looi wei, cï thök le nɔ̈k, tit keek aɣet të bïï ë kaam nɛ̈kë keek bɛ̈n.

⁴ Pinyda bïï jɔ riɛl aɣet cï nɛn, ku jɔ wal biɔɔr ëduum yiic ëbɛ̈n? Läi ku diɛt athoukï në biäk de karɛc ke kɔckuɔ, kɔc ee yen lueel an, ‘Nhialic acïï kë yokku looi ee woi.’”

⁵ Go Bɛ̈nydït lueel an, “Jeremia, na cï bäb ë riŋdu we kɔc, ku bä jɔ riŋ adï we jöŋgöör? Na cï jɔ kɔ̈ɔ̈c ë riaaŋ ë baai thok, ke bä jɔ lëu adï yen riŋ ë roor dïït ë Jordan yɔu?

⁶ Ayï kɔckuön raan ë yïn, kɔc ke dhiëndun, acïk yïn nyiɛɛn, acïk mat ë kɔc ee yïn mak. Du keek ŋäth, cakaa kek ë jam në thoŋ piɛth.”

Jiɛthëpiɔ̈u ë Bɛ̈nydït ë Biäk ë Kɔcke

⁷ Aye Bɛ̈nydït lueel an, “Yɛn cï Yithriɛl nyääŋ piny, Yɛn cï jurdiën cä lɔc rɛɛc. Yɛn cï kɔckiën nhiaar gam bï kɔc ke aterden ke tiam.

⁸ Kɔckiën cä lɔc acïk röt pɔ̈k Yɛn, cï köör tɔ̈u rooric, acïk ŋäär ke ke bëk Yɛn, ka Acä ke maan.

⁹ Kɔckiën cä lɔc acïk ciët dit, din cï ë lith gɔ̈p në aguuk kedhie. Calkï läi roor bïk bɛ̈n cam ë këcamdït!

¹⁰ Bäny juëc ke juöör kɔ̈k acïk domdï riɔ̈ɔ̈k, acïk duumkï duöm piny, acïk pinydiën piɛth tɔ ee jɔ̈ɔ̈r.

¹¹ Acïk looi ke ee jɔ̈ɔ̈r, atɔ̈u ke cï riääk ë yanɔm. Piny ëbɛ̈n acï aa jɔ̈ɔ̈r, ku acïn raan ee ye tak.

¹² Ë wuöt ke kur ë jɔ̈ɔ̈ric ëbɛ̈n, kɔc acïk bɛ̈n bïk bɛ̈n rum. Yɛn cï tɔŋ tuɔɔc bïï piny lɔ riɔ̈ɔ̈k ëbɛ̈n, acïn raan bï rëër ë mätic.

¹³ Kɔckï ayek agamɔ com, ku temkï wal, acïk lui aläl, ku acïn kë yek yök ë luɔi yic. Në biäk de agönhdiën tuc, rɛɛpken akënkï luɔk.”

Gutguut cï ë Bɛ̈nydït Lɛ̈k Wuöt Thiääk ë Yithriɛl

¹⁴ Aye Bɛ̈nydït lueel an, “Ade kë bä lueel në biäk ë kɔc thiääk ë Yithriɛl, kɔc cï piny wään bä gäm kɔckiën ë Yithriɛl riɔ̈ɔ̈k. Yɛn bï ee karɛckë jɔt ë piinyken yiic, cït man ye wal piith, ku Yɛn bï Juda luök ë kecin.

¹⁵ Ku të cän keek jat wei, Yɛn bï piɔ̈u kok wo keek, Yɛn bï jur bɛ aa bɛ̈ɛ̈i ciëën pinyde, ku paande.

¹⁶ Na lek Nhialic de kɔckï gam ë kepiɔ̈ɔ̈th ëbɛ̈n, ku lek kuëëŋ luelkï an, ‘Cït man pïïr ë Bɛ̈nydït’, cït man cïï kek kɔckï kɔn wɛ̈ɛ̈t bïk aa kuëëŋ ë Baal, ka keek aya abïk aa kɔckiën kɔ̈k ku abïk kuɛth.

¹⁷ Ku jur ëbɛ̈n jur cïï ya bï riëëu, abä cuän thar bei, ku abä riɔ̈ɔ̈k. Acä lueel, Yɛn Bɛ̈nydït.”