Jeremia 10 - JAM DE NHIALIC 2011

Läm de Yiëth ku Läm Yic

¹ Baai de Yithriɛl, piɛŋkï jam lëkë Bɛ̈nydït week.

² Acï lueel an, “Duökï kuɛɛr ke juöör kɔ̈k ee kuany cök, ku duökï nïïm ee mum në ka göök ya keek tïŋ nhial, cakaa nɔn ye juöör kɔ̈k riɔ̈ɔ̈c.

³ Yanh de ee kɔckë acïn kony. Tim aye yep rooric, aye guaŋ në ka ye atët ke tiim guaŋ,

⁴ ku jɔ ke jäm në ateek ku adhääp. Ku jɔ rek në joth, në biäk cïï yen bï pɔ̈k.

⁵ Kek ee yiëthkë acïtkï gɛk kɔt ë dom de abuth yic, acïkï ee jam, aye keek ɣääc, në biäk cïï kek ee cath. Duökï riɔ̈c ë keek, acïn kërɛɛc duëërkï luöi week, ku cïn këpiɛth luikï week.”

⁶ Bɛ̈nydït, acïn raan cït Yïn, Yïn Dït, ku rinku adïtkï ku arilkï.

⁷ Eeŋa cïï yïn duëër riëëu, yïn ee melik de juöör ëbɛ̈n? Yïn rɔ̈ŋ we riëëu. Acïn raan cït Yïn, në kɔc pelnïïm ke juöör ëbɛ̈n, ku nɔn ee meliikken yiic ëbɛ̈n.

⁸ Keek kedhie ayek dhän ku piɔlkï piɔ̈ɔ̈th. Eeŋö duëërkï ŋic tëde yiëth cï looi ë tim? Kë ye yiëthken wɛ̈ɛ̈t acïn kony.

⁹ Yiëthken acï keek rɔɔth kɔ̈ɔ̈th në ateŋ ë Tarcic, ku adhäm ë Yupadh, ee luɔi de atëët ëbɛ̈n, aceŋkï lupɔ kääcduet ku lupɔ amujuŋ aake looi ë atën ee lupɔɔ kɔɔc.

¹⁰ Ku Yïn Bɛ̈nydït, Yïn aye Nhialic yic, Yïn ee Nhialic pïïr, ku ye Melik athɛɛr. Të cï Yïn gɔ̈th, piny nɔm aye lath, juöör acïkï agönhdu duëër guum.

¹¹ (Wek kɔc, abäk dhil lɛ̈k keek, an, yiëth ë cïï tënhial kekë piny loi, abïï ke riɔ̈ɔ̈k. Acïn tëdäŋ bïï kek lɔ thïn ë piny nɔm.)

Din Piɔɔnyë Nhialic

¹² Bɛ̈nydït aa loi piny ë riɛlde, ku ciɛk piny nɔm ë pɛlënɔmde, ku thieth tënhial.

¹³ Ku në jamde pïïu tɔ̈u nhial ayek wuur, ee luäät bɛ̈ɛ̈i ë piny thar. Ku ee deŋ tɔ wil të tueny en, ku tɔ yom put ë ɣöötke yiic.

¹⁴ Ku të cï ee kakë tïŋ, kɔc ayek aa dhän ku cïnkï nïïm, kɔc ee yiëth looi ayek gup yäär, në biäk ye yiëth yek looi lueth ku cïnkï yiic wëi.

¹⁵ Acïnkï naamden ku aduëërë keek biɔɔn, abïï keek riɔ̈ɔ̈k të le Bɛ̈nydït bɛ̈n yök ke keek.

¹⁶ Nhialic de Jakop acïï cït keek, ee Yen ee Raan ë loi këriëëc ëbɛ̈n, ku lɔc Yithriɛl bïï aa kɔcke. Bɛ̈nydït de rɛm Yen aye rinke.

Kɔc Bɔ̈ ë Pɛ̈cic

¹⁷ Kɔc ke Jeruthalem, we cï tuɔɔk! Määtkï kakun yiic.

¹⁸ Bɛ̈nydït alɔ week cuɔp wei ee pinyë, alɔ week dum yiic abïï ciën raan töŋ dɔ̈ŋ. Acïï Bɛ̈nydït lueel.

¹⁹ Kɔc ke Jeruthalem ayek dhiau an, “Amawoou, wok cï yiëk gup bɔ̈ɔ̈t arëët! Bɔ̈ɔ̈tkuɔ acïkï bï dem. Aa yok tak an ee kë buk guum!

²⁰ Pɛɛnykuɔ acïk riääk, wïïn ee keek muk acïk tuɛny. Mïthkuɔ acïk lɔ roor kedhie, acïn raan cï döŋ raan bï pɛɛnykuɔ bɛ piäät, acïn raan nök lupɔɔken.”

²¹ Aguɔ bɛ̈ɛ̈r an, “Bänykuɔ ayek dhän, acïkï Bɛ̈nydït ee luɔp bïï ke wat. Yen kën ë tɔ keek löny ka, ku kɔckuɔ acï keek thiɔ̈i.

²² Piëŋkï! Thok acï bɛ̈n! Ade awuɔɔu looi ë jur nu të lɔ rut, rem de tɔŋde abï pɛ̈ɛ̈nydït ke Juda tɔ ye jɔ̈ɔ̈r, të bï kɔ̈ɔ̈rgɔl aa ceŋ thïn.”

²³ Bɛ̈nydït, aŋiɛc acïn raan ŋic të duëër ë nïnke lɔ thök thïn, acïn raan muk wëike.

²⁴ Bɛ̈nydït, kiɛmë kɔcku piny, ku du wo lui këtuc arëët, du lui këtuc të cï Yïn gɔ̈th, kënë aduëër aa thökda.

²⁵ Pɔ̈kë agönhdu juöör cïï Yïn ee lam, ku kɔc ee yïn rɛɛc. Acïk kɔcku nɔ̈k, acïk wook riɔ̈ɔ̈k taitai, ku nyiëëŋkï pinyda piny ke cï riääk.