Jeremia 1 - JAM DE NHIALIC 2011

¹ Awerekë anyooth ka cïï Jeremia wën de Ɣilikia ke lueel, bɛ̈ny töŋ de ke kake Nhialic, ee raan wun de Anathoth, piny de Benjamin.

² Bɛ̈nydït aacï jam kekë Jeremia wään ye Jothia wën de Amon melik de Juda run thiëër ku diäk në bääny yic.

³ Ku be jam ke yen, wään ye Jothia wën de Jeɣoyakim melik. Na ɣɔn ee kake cök, go Bɛ̈nydït jɔ aa jam kekë yen raan juëc, agut cï ruöön de thiëër ku tök, në bääny de Dhedekia yic wën de Jothia. Ku në pɛɛi de dhïc në ye ruöönë yic, kɔc ke Jeruthalem acï ke bɛ̈n peec.

Cɔ̈t de Jeremia

⁴ Go ë Bɛ̈nydït lɛ̈k ɛn an,

⁵ “Yïn aa lac ke yï kɛ̈n kɔn gäm wëi, yïn aa thiɛɛi, ke yï kënë kɔn dhiëëth, yïn aa mɛɛk ke yï bï ya tiët de juöör ëbɛ̈n.”

⁶ Guɔ pɔ̈k nɔm Yen an, “Bɛ̈nydït yɛn ee raan kuc jam ku yɛn koor.”

⁷ Go ë Bɛ̈nydït lɛ̈k ɛn an, “Du luel an, ‘yɛn koor arëët,’ lɔ tëde kɔc cä tuöc yïn ëbɛ̈n, ku lɛ̈k ë keek këriëëc cä lɛ̈k yïn bä lɔ lueel.

⁸ Du riɔ̈c në keek, Yɛn bï tɔ̈u wo yïn ke yï gɛ̈l. Acä lueel Yɛn Bɛ̈nydït!”

⁹ Go Bɛ̈nydït Yeciin ɣɔ̈ɔ̈k, ku jiɛk a thok ku lɛ̈k yɛn an, “Piŋ, yïn gäm jam bä dhil lɔ lueel.

¹⁰ Në ye köölë yïn cä gäm riɛl në juöör nïïm ku në ciɛɛŋ nïïm, bä ke nyuän bei ku thuöörë ke piny, ku riäk keek ku wit keek, ku yïk keek ku com keek.”

Nyuuth Kaarou

¹¹ Go Bɛ̈nydït yɛn luɔp an, “Jeremia eeŋö ye tïŋ?” Guɔ pɔ̈k nɔm Yen an, “Ee këër de tim de almon.”

¹² Go ë Bɛ̈nydït lɛ̈k yɛn an, “Acï tïŋ apiɛth, ku Yɛn daai, bä tïŋ nɔn bïï wëlkï aa yith.”

¹³ Go jam de Bɛ̈nydït bɛ bɛ̈n tëde yɛn an, “Eeŋö däŋ cï bɛ tïŋ?” Guɔ bɛ̈ɛ̈r an, “Yɛn cï töny tïŋ ke piäär të lɔ rut, ku akɔɔr bïï nɔm lɔ wei në biäkkë.”

¹⁴ Go lɛ̈k yɛn an, “Riääk abï bɛ̈n ë biäk të lɔ rut, ku abï bɛ̈n ë kɔc ceŋ ee pinyë gup ëbɛ̈n,

¹⁵ në biäk caal Ɛn dhiëën ke ciɛɛŋ tɔ̈u ë biäk të lɔ rut ëbɛ̈n, bïk bɛ̈n ku meliikken abïk thöcken tääu piny në kɛ̈l ke Jeruthalem thok, ku në pɛ̈ɛ̈nyke kɔ̈ɔ̈th, ayï pɛ̈ɛ̈nydït kɔ̈k ke Juda kɔ̈ɔ̈th.

¹⁶ Yɛn bï kɔckï luöi këtuc në biäk cï kek awäc looi, acïk A nyääŋ piny, ku lek yiëth kɔ̈k gäm miɔ̈c de wal ŋïr, ku loikï yiëth ku lamkï keek.

¹⁷ Guiir rɔt, Jeremia, lɔ lɛ̈k ë keek këriëëc cä lɛ̈k yïn ëbɛ̈n an, bä lɔ lɛ̈k keek. Du riɔ̈c në keek ënɔɔnë, ku nɔn bä yïn tɔ riɔ̈c ë keek arëët, të le yïn lɔ tɔ̈u në keyiic.

¹⁸ Piŋ Jeremia, yïn cä tɔ ye pänydït cï gël ee köölë, ku ta yïn ee mën de wëëth ku kal de maläŋ! Raan ëbɛ̈n raan tɔ̈u ee pinyë nɔm, meliik ke Juda, ku bäny ke luɔi, ku bäny ke kake Nhialic, ku jɔ ya kɔc, abïk yï maan.

¹⁹ Ku ee köölë yïn bä gäm riɛl bï yïn ke lëu, yïn bï ciët pänydïït cï gël ë mën ë wëëth, ku ciëtë päny de maläŋ. Acïkï yïn bï tiaam, në biäk bä Yɛn tɔ̈u wo yïn ke yï gɛ̈l. Acä lueel, Yɛn Bɛ̈nydït.”