Jakop 5 - JAM DE NHIALIC 2011

Jäny Jɔ̈ɔ̈nyë Kɔc Kueth

¹ Cai week, wek kɔc kueth, dhiaukï abäk kiɛɛu moc, në katuc bɔ̈ ka bï we dhal!

² Kakun juëc acïk rop, ku lupɔɔkun acï parpar ke cam.

³ Adhɛ̈pkun ku ateŋdun acïk keth, ku kethden abï aa cäätɔ de ater ke week, ku bï riiŋdun cam cït man ë mac. Wek ee wëukun kut në këde kööl rial.

⁴ Wɔikï, ariöp de kɔc ee luui kɔc ee duumkun tem, ariöp cäk pɛ̈n keek ë cuëër, amoc kiɛɛu, ago kiɛɛu de kɔc tëm jɔ ɣet ë Bɛ̈nydït yïc, Bɛ̈nydït Awärjäŋ.

⁵ We ye röt ŋiëc kapiɛth ë piny nɔm, ku yak kuɛth ë yänydun kɔɔr, we ye röt tɔ kueth ë kuɛth ee kɔc kuɛth ëkööl ee käŋ nɔ̈k.

⁶ Wek ee raan piɛthpiɔ̈u gɔ̈k, ku näkkï, ku acïn ŋëny ee yen week ŋɛ̈ny. Cïï Nhialic we bï ŋɛ̈ny.

Liɛɛrëpiɔ̈u ku Lɔ̈ŋ

⁷ Yak piɔ̈ɔ̈th liɛɛr, wek mïthëkɔckuɔ, aɣet bɛ̈n bï Bɛ̈nydït bɛ̈n. Wɔikï, raan de dom ee kapiɛth ee piny ke luɔk tiit, ke lir piɔ̈u në ye, aɣët të bï en deŋ yök, deŋ yaak ayï deŋ anyɔ̈ɔ̈c.

⁸ Ku week, yak piɔ̈ɔ̈th liɛɛr ayadäŋ, cök ë ruɔm wek wepiɔ̈ɔ̈th, bɛ̈n ë Bɛ̈nydït ë guɔ thiɔ̈k.

⁹ Duökï ee dok ë röt wapäc, wek mïthëkɔckuɔ, ke we cïï bï yiëk yiëth gääk. Bɛ̈ny ee löŋ guiir ka, kääc ɣöt thokë.

¹⁰ Na tït ɣɔn ee jam në rin ke Bɛ̈nydït, wek mïthëkɔckuɔ, yak ke tɔ ye kɔc bä wek täuden aa dɔmic në guöm de kërac ku në liɛɛrëpiɔ̈u.

¹¹ Tiëŋkï, wo ye kɔc ee käŋ guum tɔ ye kɔc cï thieei. We ye guöm cï Jop käŋ guum piŋ, ku we cï thök de luɔi de Bɛ̈nydït tïŋ, ŋïny ŋicë Bɛ̈nydït kɔc kuanynyïïn, ku luɔi ee yen piɔ̈u dap kok.

¹² Ku cöök nu ë cök nïïm kedhie, wek mïthëkɔckuɔ, duökï ee kuëëŋ në paannhial, ayï piny nɔm, ayï të de en däŋ ë ye gutguut lueel. Të gäm wek, ke yak lueel an, “Ɣɛɛ”, ku të jai wek, ke yak lueel an, “Ei”, ke we cïï bï yiëk yiëth gääk.

¹³ De raan ë weyiic raan gum këtuc? Ë läŋ. De raan mit piɔ̈u? Ë leec Nhialic ë dit.

¹⁴ De raan tök ë weyiic? Ë cɔl röördït ke ɣön ë Nhialic, ku ë ke läŋ në biäkde, ku tɔckï guöp ë miök në rin ke Bɛ̈nydït.

¹⁵ Ku lɔ̈ŋ nu gäm thïn yen abï raan tök kony, go Bɛ̈nydït jat nhial, ku na de karɛc cï looi, ka bï kë päl en.

¹⁶ Yen aa wek awɛ̈ɛ̈c gam ë röt wapäc, ku yak lɔ̈ŋ në röt wapäc, ke we bï dem. Pal ë raan piɛthpiɔ̈u, pal cath ke riɛl, en aye kajuëc tiaam.

¹⁷ Elija aaye raan cït piɔ̈u wook. Na wën, ke läŋ arëët ke deŋ cïï bï tuɛny, ago kën tuɛny ë piny nɔm ë run kadiäk ku pɛ̈i kadhetem.

¹⁸ Na wën, ke be lɔ̈ŋ, ago tënhial piny miɔɔc në deŋ, go piny luɔk ë mïthke.

¹⁹ Wek mïthëkɔckuɔ, na de raan ë weyiic raan cï rɔt yal ë yicic, ku jɔ puk piɔ̈u ë raan däŋ,

²⁰ tɔ ŋic ë cöökë an: Raan ee raan ë kërac looi puk piɔ̈u në wäc cï en kueer wööc, ka bï raan kony wëi në thuɔɔu, ku jɔ kut dïït ë karɛc kum.