Jakop 4 - JAM DE NHIALIC 2011

Määth ë Pinynɔm

¹ Ye tɔɔŋ bɛ̈n tënou ku ye piɔ̈t ee kɔc piɔ̈t bɛ̈n tënou bïk ë weyiic? Cïkï ee bɛ̈n ë ŋɔ̈ɔ̈ŋ ee we dɔm, ŋɔ̈ɔ̈ŋ ë tɔŋ biök ë ka ke wegup yiic?

² Wek ee ŋɔ̈ɔ̈ŋ de käŋ dɔm, ku cäkï keek ee yök, we ye kɔc nɔ̈k abïk thou, ku ye tiɛɛl we dɔm, ku we cïï käŋ duëër aa yök: wek ee piɔ̈t ku yak tɔŋ lɛɛr, ku ŋuɔɔtkï ke we cïn nïïm käŋ, luɔi cä wek ee lip.

³ We ye lip, ku cäkï käŋ ee yök, në lip aa wek kuöc lip, ee kë bä wek käŋ aa thiäi wei ë kamit kaarkï, en aa yak lip.

⁴ Wek röör akɔɔrdiäär ku diëër akɔɔrröör, kuöckï määth ë ka ke pinynɔm nɔn ee yen ater lueel kekë Nhialic? Yen na de raan kɔɔr nɔn bï en määth kekë ka ke piny nɔm, ka ye rɔt tɔ ye raan de ater kekë Nhialic.

⁵ Ku yak lueel ë wepiɔ̈ɔ̈th an, “Këcïgɔ̈ɔ̈r ee ɣɔ̈ric lueel? Wëi cï tɔ rɛ̈ɛ̈r ë woyiic ye ŋɔ̈ɔ̈ŋ ke dɔm ayï tiɛɛl?”

⁶ Acie yen, ee dhuëëŋdepiɔ̈u ŋuak nyin. En a lueel en en an, “Nhialic ee kɔc ee röt tɔ dït ŋɛ̈ny, ku ye kɔc ee röt tɔ kor miɔɔc ë dhuëëŋdepiɔ̈u.”

⁷ Yen tääu wek röt ë Nhialic cök, ku yak jɔŋdït rac ŋɛ̈ny, ke bï aa kat ë week.

⁸ Yak röt cuöt Nhialic, ke bï rɔt aa cuöt week. Wakkï wecin abïk piath, we kɔc ee kërac looi, ku takï wepiɔ̈ɔ̈th agɔk, wek kɔc ee piɔ̈ɔ̈th rou.

⁹ Jiɛthkï piɔ̈ɔ̈th, ku yak thuc, ku dhiaukï, takï dɔldun puk rɔt aye dhiëëu, ku takï miɛt ë wepiɔ̈ɔ̈th puk rɔt aye jiɛthëpiɔ̈u!

¹⁰ Kuɔɔrkï röt piny ë Nhialic nɔm, ke bï we jat nhial.

Jäny në Kë cï Kɔc Röt bï Aa Gɔ̈k

¹¹ Duökï röt ee lɛ̈k kërac, wek mïthëkɔckuɔ. Raan ee mɛnhkënë lɛ̈k kërac, ku ye mɛnhkënë gɔ̈k, ee löŋ en lëk kërac, ku ee löŋ en gɛ̈k. Ku të gɛ̈k yïn löŋ, ke yïn cie raan ee löŋ looi, yïn ee bɛ̈ny ee löŋ guiir.

¹² Raan tök yen aye raan ee kɔc yiɛ̈n löŋ ku ye bɛ̈ny ee löŋ guiir, ku yen aye Raan cath ke riɛl kuny en ku nɛ̈k en. Ku yïn ye ŋa, yïn raan ee raan rɛ̈ɛ̈r ke yïn gɔ̈k?

Jäny në biäk de Lɛc

¹³ Cai week, wek kɔc ee ye lueel an, “Ë köölë ayï miäk wo bï dhil lɔ paanë lok ruöön tök thöl ëtɛ̈ɛ̈n, agoku käŋ aa ɣɔɔc ku ɣɛɛcku käŋ, ago wëukuɔ kenyïïn ŋuak.”

¹⁴ Ku wek kuc kë bï tïc miäk. Wëikun yek käŋö? Ayek ruu tei, ruu ee tïc tëthiinakäŋ, na ëlë, ke jɔ guɔ riäär.

¹⁵ Aŋuän luɔi bä wek e lueel an, “Të nu pïïr bï wok pïïr ë Bɛ̈nydït piɔ̈u, ke wo bï pïïr, agoku kënë looi, ku nɔn ee yen kënë.”

¹⁶ Ku ënɔɔnë, wek ee röt tɔ ye adhuëŋ në lɛc aa wek röt leec, lɛc cït ee kënë ëbɛ̈n ee kërac.

¹⁷ Yen ka, raan ŋic këpiɛth bï looi, ku cïï loi, ke yen aye kërɛɛc nu ë yeyeth.