Jakop 3 - JAM DE NHIALIC 2011

Liep

¹ Duökï röt tɔ ye bäny juëc bäny ee kɔc wɛ̈ɛ̈t, wek mïthëkɔckuɔ, aŋiɛckï nɔn bï löŋda tuöc ë guiëër, wok kɔc ee kɔc wɛ̈ɛ̈t.

² Wok ee cool ë wäc käŋ wodhie. Na de raan cïï käŋ ee wööc ë jam, ke yen aye raan cï dikëdik, ka duëër yeguöp muk apiɛth ëbɛ̈n.

³ Tiëŋkï, wo ye joth tuɛɛl ë jöŋgöör thook, luɔi bï kek këda piŋ, agoku ke puk gup ëbɛ̈n.

⁴ Woikï abëël wïïr ayadäŋ, na cakaa kek ë dït, ku yeke kuaath ë yom dït aläl, ku aye ke puk tei në këthïïn ë abël puk, biäkë ku biäkë, në këde raan piɔ̈u raan ee keek puk.

⁵ Yen acït nɔn ee liep këthiinakäŋ, ku ye rɔt leec ë kajuëc. Wɔikï juëc de tiim bï ɣɔ̈k mac në many thiinakäŋ!

⁶ Ku liep ee mac, ee piny cï nɔm thiäŋ ke kërac, täu ee liep tɔ̈u ë ka ke wogup yiic kï, ee kënë guöp tɔ col ëbɛ̈n, ku ye kueer ë kë cï cak cuöny thok ë mac, ku yenguöp aye cuöny thok ë many ë giɛna.

⁷ Këriëëc ëbɛ̈n, läi ayï diɛt, ayï ka ye mol piny, ayï ka nu wïïr, aduëërë ke tɔ piŋ jam, ku aye ke tɔ piŋ jam në lɛ̈n cɔl raan.

⁸ Ee liep ëtök, en acïn raan duëër e tɔ piŋ jam, ee kërɛɛc ee kɔc dhal ë muk piny, ku athiäŋ ke wurïï wën ee kɔc nɔ̈k.

⁹ Ee liep en a ye wok Nhialic Wääda yɔ̈ɔ̈k an, Thieithieei, ku ee liep ayadäŋ en aye wok kɔc läm kërac, kɔc cï cak abï täuden ciët täu de Nhialic!

¹⁰ Ee thoŋ töŋë en aye athiɛɛi bɛ̈n bei ku yen bïï läm rac bei aya. Acïï piɛth, wek mïthëkɔckuɔ, täu tɔ̈uwë kakë aya.

¹¹ Na nyin ë pïïu, bï pïïu mit bɛ̈ɛ̈i bei ayï pïïu kec në thoŋdɛn töŋë?

¹² Ayï ŋaap, wek mïthëkɔckuɔ, duëër luɔk ë mïth ke olip? Ayï tim cɔl enap, duëër luɔk ë mïth ke ŋaap? Acïn yinh nu ayadäŋ, yinh duëër tuöl ë pïïu ë këthëkëth ayï pïïu mit.

Pɛlënɔm bɔ̈ Nhial

¹³ Eeŋa ë weyiic raan pelnɔm ku ye raan ŋic käŋ? Ee ye luɔide nyuɔɔth në rëër ŋic en rëër ke ye rɔt kuɔɔr piny ë kuur ee raan pelnɔm rɔt kuɔɔr piny.

¹⁴ Ku na yak yiic dɛ tiɛɛl kec ku dɛkï piɔ̈ɔ̈th ater, ke we duökï röt ee leec, ku duökï yic ee cäk thok.

¹⁵ Kënë acie pɛlënɔm bɔ̈ nhial, ee këde piny tei, ee këde raan piɔ̈u, ku ye këde jɔŋ rac.

¹⁶ Të nu tiɛɛl ayï ater, en aye tëde awënwën ayï luɔi rac ëbɛ̈n.

¹⁷ Ku pɛlënɔm bɔ̈ nhial ee yic kɔn ɣɛɛr ëtop, ku ee mät kɔɔr ayadäŋ, ku ye jam ë määth, ku ye këde dap pɔ̈l, ee piɔ̈u dap kok, ku ye dap luɔk ë mïthkɛn piɛth, acïï kɔc ee kuany yiic, ku cïn yäc aguk.

¹⁸ Ku kɔ̈th ke piathëpiɔ̈u aye ke com në mät në këde kɔc ee kɔc määt.