Jakop 2 - JAM DE NHIALIC 2011

Yöök në biäk cïï Kɔc bï Kuany Yiic

¹ Wek mïthëkɔckuɔ, duökï gäm de Bɛ̈nydan Yecu Kërtho, Bɛ̈nydïït de dhuëëŋ ee muk në kuëny aa wek kɔc kuany yiic.

² Ku na bɔ̈ raan në amatnɔmduön aa wek guëër thïn, ke ceŋ jonh adhääp, ku ceŋ lupɔɔ cï läkëläk, ku bɔ̈ raan kuany nyin ayadäŋ raan ceŋ lupɔɔ nhiany.

³ Aguɔkï raan ceŋ lupɔ cï läkëläk riëëu, ku yɔ̈ɔ̈kkï, an, “Nyuc ee tënë, tëpiɛthë,” ku yɔ̈ɔ̈kkï raan kuany nyin an, “Kääcë tɛ̈ɛ̈n, ku nɔn nyuuc yïn piny ë yacök eenë,”

⁴ ke we kën kɔc jɔ guɔ pɔc wei ë weyiic, ku takï röt ee bäny ee lööŋ rac bɛ̈ɛ̈i?

⁵ Piɛŋkï wek mïthëkɔckuɔn nhiaar! Kën Nhialic kɔc kuanynyïïn lɔc, kɔc kuanynyïïn në kakë piny nɔm, bïk aa kɔc dïït ë gäm, ku yek kɔc bï ciɛɛŋ lɔ̈ɔ̈k lak, ciɛɛŋ cïï Nhialic kɔn lueel an, bï gäm kɔc nhiaar en?

⁶ Ku week, we ye raan kuany nyin tɔ cïn naamde. Ku na kɔc cuai, cïkï week ee cieŋ ë ciɛɛŋ rac, ku cïkï week ee thɛl ë bäny ke gööny nïïm?

⁷ Cïkï rin ke dhuëëŋ ë läät ë län rac, rin ee we cɔɔl ë keek?

⁸ Ku të cä wek löŋ tiiŋic, löŋ de naamde ku cïn kë wär en, cït man ë këcïgɔ̈ɔ̈r an, “Nhiaar raan rɛ̈ɛ̈r kekë yïn cït man nhiɛɛr yïn rɔt, ke we ye këpiɛth looi.”

⁹ Ku na yak kɔc kuany yiic, ke we ye kërac looi, ago we jɔ̈ɔ̈ny ë löŋ an, cäk löŋ wööcic.

¹⁰ Raan ee löŋ tiiŋic ëbɛ̈n, ku wäc cöök tök tei, ke dhäŋ de löŋic ëbɛ̈n anu ë yeyeth.

¹¹ Raan ë luel en an, “Du lɔ we tiiŋ de raan däŋ,” acï lueel ayadäŋ an, “Du raan däŋ näk abï thou.” Ku ënɔɔnë, të kën yïn cak lɔ we tiiŋ de raan däŋ, ku cï raan nɔ̈k acï thou, ke yïn cï aa raan cï löŋ wööcic.

¹² Yak jam alë, ku yak luui alë, cït man ë kɔc bï löŋden guiir në këde löŋ de luny ee kɔc lony.

¹³ Raan ee käŋ looi ë giɛɛŋ, ke löŋde abï guiir ë giɛɛŋ, ku acïn kokdepiɔ̈u bï yök, ku kokdepiɔ̈u ee rɔt leec ë kööl ë guiëërëlöŋ.

Gäm ku Luɔi

¹⁴ Naamde akou, wek mïthëkɔckuɔ, të lueelë raan en an, Yɛn cath wo gäm, ku liu luɔi tëde yen? Duëërë gäm kony?

¹⁵ Ku na de mɛnhkënëdun cïn kɔ̈u lupɔ, ku nɔn ee yen nyankënëdun, ku cïn kë bï ya cam ë aköölnyïïn kedhie.

¹⁶ Ku të cï raan tök ë weyiic ke yɔ̈ɔ̈k an, “Jälkï tei, we bï niin apiɛth, we bï gup tuöc tei, ku we bï kuɛth.” Ku kɛ̈nkï keek miɔɔc në ka ke guöp ka bï keek muk, naamde akou?

¹⁷ Yen acït gäm aya, të cïn en luɔi cath kekë yen, ka cï thou, në rëër rëër en etök.

¹⁸ Yeka, duëërë raan lueel an, “Yïn cath we gäm, ku yɛn cath wo luɔi, nyuöthë yɛn gämdu gäm cïn luɔi cath kekë yen, ku yïn bä nyuöth gämdï në luɔidï.”

¹⁹ Acï gam nɔn ee Nhialic tök tei, acï tiiŋ nɔm! Acï jɔɔk rac gam ayadäŋ, ku lɛthëke.

²⁰ Ku yïn, yïn raan ɣɔ̈ric, de yïpiɔ̈u luɔi bï yïn cöökë ŋic an, Gäm cïn luɔi cath kekë yen ë thou?

²¹ Na kuɛɛrëda Abraɣam, kënë tɔ ye raan piɛthpiɔ̈u në luɔi, ɣɔn lɛm en Yithaak wënde ë yïïŋ de läm nɔm?

²² Kɛ̈në gäm tïŋ luɔi cï en luui ëtök kekë luɔide, ago gäm aa dikëdik në luɔi.

²³ Ago këcïgɔ̈ɔ̈r aa yic kë luel en an, “Abraɣam ë Nhialic gam, ago gämde tɔ ye piath ë yenpiɔ̈u, ago cɔl mɛ̈thë ë Nhialic.”

²⁴ Acäk jɔ tïŋ ënɔɔnë, nɔn ee raan tɔ piɛthpiɔ̈u në luɔi, ku acie në gäm etök.

²⁵ Ku yen acït Raɣap akɔɔrröör aya. Kënë tɔ piɛthpiɔ̈u në luɔi aya, ɣɔn cï en kɔc cï tooc nyuööc, ago ke tɔ jël tëkkï ë kueer däŋ?

²⁶ Yen ka, acït thon cï guöp thou, guöp cïnic wëi, yen acït thon cï gäm thou, gäm cïn luɔi cath kekë yen.