Jakop 1 - JAM DE NHIALIC 2011

¹ Jakop, lïm ë Nhialic kekë Bɛ̈nydït Yecu Kërtho: Athiëc dhiëën kathiëër ku rou, juöör cï thiëi roor.

Gäm ke Pɛlënɔm

² Yak tɔ ye kë bä wek piɔ̈ɔ̈th miɛt aläl, wek mïthëkɔckuɔ, të ya wek lööny ë thëmic, thëm kith yiic,

³ në ŋïny ŋiɛc wek thëm ee gämdun them, nɔn ee yen guömdekäŋ.

⁴ Ku takï guömdekäŋ thöl luɔide abï dikëdik, ke we bï dikëdik ku cathkï në këriëëc, ke cïn kë dak week.

⁵ Ku na de raan në weyiic raan dɛk ë pɛlënɔm, ke lim tëde Nhialic, Raan ee kɔc miɔɔc kedhie ë dhuëëŋ, ku cïï kɔc ee gɔ̈k, ku abï gäm en.

⁶ Ku tɔ lip në gäm cï en gam, ku cïï piɔ̈u wiël ë kaamic. Raan wiël piɔ̈u ë kaamic acït apiöŋ de wɛ̈ɛ̈rdït, apiöŋ cïï yom kuaath ku thec nhial.

⁷ Ë cïï raanë luel ë yepiɔ̈u nɔn bï en këdäŋ yök tëde Bɛ̈nydït,

⁸ ee raan ee piɔ̈u rou, ku cie cath ë kimpiny ë kuɛɛrke kedhie.

Kuanyënyin ku Juëcëkäŋ

⁹ Ë mɛnhkënëdan nu ciëën ë mit piɔ̈u nɔn cï e tääu tueŋ:

¹⁰ ku raan juëc ë kake ë mit piɔ̈u, të cï e tääu ciëën, në kuël bï en rɔt dap kual cït man ë gaak de wal.

¹¹ Të cï akɔ̈l ruɛl ago tuöc cït man ë mac, ee wal tɔ biɔɔr, ku jɔ gaakde tɛŋ wei, ago läk de yenguöp liu, yen acït yom bï raan juëc ë kake yom ë kuɛɛrke yiic.

Thëm ku Thɛɛm

¹² Thieithieei raan ee thëm guum, të cï en thök ë thëm, ka bï göl ë pïïr yök, göl cïï Bɛ̈nydït kɔn lueel, an, bï gäm kɔc nhiaar en.

¹³ Ë cïn raan ë ye lueel, të themë ye an, “Yɛn them Nhialic.” Nhialic acïï duëërë them ë kërac, ku Yenguöp acïn raan ee them ayadäŋ.

¹⁴ Raan ëbɛ̈n aye them, të cï e thɛl wei në ŋɔ̈ɔ̈ŋ de yenpiɔ̈u, ŋɔ̈ɔ̈ŋ de kërac, ago math.

¹⁵ Ku ŋɔ̈ɔ̈ŋ de kërac, të cï en liac, ke dhiëth kërac, ku kërac, të cï en thök ë luɔi, ke bïï thuɔɔu.

¹⁶ Duökï röt ee tɔ mɛthë, wek mïthëkɔckuɔn nhiaar.

¹⁷ Miɔ̈c piɛth ëbɛ̈n, ku miɔ̈c cï dikëdik ëbɛ̈n, abɔ̈ tënhial tëde Nhialic, ke lööny piny tëde Aciëŋ de ɣɛɛrëpiny, Raan cïï yepiɔ̈u ee pɔ̈ɔ̈k, ku cïn atïptïïp de yäl de rɔt.

¹⁸ Në löŋ cï lueel ë yepiɔ̈u en aa dhiëëth en wook në jam de yic, luɔi bï wok ciët ka cï kɔn luɔk, në ka cï cak kedhie.

Pïŋ ku Luɔi

¹⁹ Yen ka, wek mïthëkɔckuɔn nhiaar, raan ëbɛ̈n ë yeyïc mɔth ë pïŋ, ku ye rɔt gɔ̈ɔ̈u në jam, ku ye rɔt gɔ̈ɔ̈u ë agɔ̈th:

²⁰ agönh ë raan acïï piathëpiɔ̈u ë Nhialic ee looi.

²¹ Yen päl wek cuɔlëpiɔ̈u ëbɛ̈n, ku luɔi rɛɛc gäk, ku jakï jam cï piith ë weyiic dɔm në kuur aa wek röt tɔ kor, yen aye jam duëër we kony wëi.

²² Ku yak kɔc ee jam looi, ku cäkï ee kɔc ee piŋ tei, kɔc mɛth röt.

²³ Na de raan ee jam piŋ tei, ku cie raan ee jam looi, ka cït raan woi enyin ë mɛnhdheric, nyindɛn ë dhiëth ke ye.

²⁴ Ee yeguöp woi, ku jiël, go nɔm dap määr ë täu tɔ̈u en, nɔn ee yen raan yïndï.

²⁵ Ku raan ee löŋ cï dikëdik woiyic, löŋ de luny ee kɔc lony, ku jɔ aa cool thïn ku acie raan ee piŋ ku jɔ nɔm määr, ee raan ee luɔi looi, raanë abïï thieei në luɔidɛn ee yen e looi.

²⁶ Na de raan ë weyiic raan cït kë riëëu Nhialic, ku cïï yeliep ee dɔm, ku ee yepiɔ̈u math tei, ke riëëu riëëuwë raanë Nhialic ee këɣɔ̈ric.

²⁷ Riëëu de Nhialic kï, riëëu lɔ yic wai, ku cïnic tënhiany ë Nhialic Wääda nɔm an: Nɛ̈m ee raan abɛɛr ku diëër cïn nïïm röör neem në këdɛn tuc dhal keek, ku luɔi ee raan rɔt ŋiëc muk ke cïn piɔ̈u tëcol ë bïïyë ka ke piny nɔm.