Ɣodh 8 - JAM DE NHIALIC 2011

Bɛ̈nydït Ajäny Yithriɛl në Läm de Yiëth

¹ Aye Bɛ̈nydït lueel an, “Kuɔthkï kɛŋ, cuɔɔr agör Yithriɛl, në baŋ cïï kɔckï löŋdï dhoŋ kɔ̈u, ku dhäŋkï wëëtdï yic.

² Yithriɛl ee Ya cɔɔl ku lueel an, Nhialicda Yïn ŋicku.

³ Acïk këpiɛth rɛɛc, ka abï kɔc ke ater keek tiaam ku copkï keek.

⁴ Ayek meliikken kuany ke cïkï lëk Ɛn, ku lɔckï bänyken kapäc, ke ke cïï Ya lop. Ayek röt cuɛ̈c yiëth ke ateek, ku adhääp, riëëk kek röt.

⁵ Cuatkï yiëthkuön ke daau wei wek kɔc ke Thamaria, Yɛn diu piɔ̈u wo keek arëët. Bäk ee pïïr rɛɛcë jɔ puɔ̈l nɛn, abïk jɔ lɔ wai?

⁶ Acie Nhialic Yen ë cuëc ee yanhë, ee kɔc kek ë loi yen kapäc. Dan ë Thamaria, abï dhuööŋ abï lɔ thorthor.

⁷ Ayek ɣääriic com, ku ee kek temkï. Belken acïnkï nïïm rap, ka acïnkï këcam. Na cakkï luɔk, abï kɔc lei ke cam.

⁸ Yithriɛl acï nyiɛɛc në juöör, ka cï ya kë cïn naamde.

⁹ Acïk yiëëm cït mul cï mɛ̈ɛ̈r roor, ku lekkï tëde Athiriya. Eparaim ë rɔt ɣaac cït tiiŋ ee röör kɔɔr.

¹⁰ Na cakaa nɔn cï kek röt ɣɔ̈c juöör, abä keek bɛ mat yiic tëtök, ku luöi keek këtuc. Ka abïk thök në meliik cin, meliik yɔŋ keek.

¹¹ “Eparaim ayïk yïïk bï yen Ɛn aa gäm miɔ̈c de awɛ̈ɛ̈c, ku acïk keek puk tɔkï keek ee yïïk ke awɛ̈ɛ̈c.

¹² Acä keek gäär këriëëc kith ëbɛ̈n në këde lööŋkï, gokï ke rɛɛc abïk ciët kak ë gɛ̈ɛ̈rë kɔc kɔ̈k pei.

¹³ Ayek Ɛn gäm miɔ̈c, ku pukkï röt cuetkï rïŋ. Bɛ̈nydït acïï piɔ̈u mit ke keek. Bɛ̈nydït acïï awɛ̈ɛ̈cken bï puɔ̈l, abï keek luöi këtuc në baŋ de karɛcken. Ka abä keek be tɔ ye lïïm, cït man ɣɔn kɔnë keek lïïm paan ë Rip.

¹⁴ “Yithriɛl ë nɔm määr në Aciëŋ ë cak keek, ku acïk röt yiëk ɣööt dït läk. Ku kɔc ke Juda acïk pɛ̈ɛ̈nydït juëc cï gël yïk. Ku Yɛn bï pɛ̈ɛ̈nydïtken ɣɔ̈k mac, ku nyuɔp ɣöötken piny.