Ɣodh 7 - JAM DE NHIALIC 2011

¹ Go Bɛ̈nydït lueel an, “Të kaar Ɛn nɔn puɔ̈k Ɛn kɔckï nïïm athiɛɛi, ku kaar luɔi ta Yɛn Yithriɛl ŋuɛ̈ɛ̈n, ke awɛ̈ɛ̈c ke Eparaim ë ke jɔ tïc ëgɔk, ku tiëc karɛc ye Thamaria ke looi. Ayek röt math, ku cuëërkï röt, ku rumkï kɔc në kuɛɛriic.

² Akuckï luɔi ŋiɛc Ɛn karɛckɛn loikï kedhie. Acïkï ŋic nɔn ŋiɛc Ɛn këriëëc rɛɛcdɛn loikï ëbɛ̈n. Acïï awɛ̈ɛ̈cken ke gɛɛu cil, awɛ̈ɛ̈cken awɔi keek kedhie në cieŋ.

Kɛ̈ɛ̈k nu Paan de Melikic

³ Aye Bɛ̈nydït lueel an, “Ayek melik miët piɔ̈u në karɛc yek looi, ku tɔkï bäny mitpiɔ̈ɔ̈th në tör ë lueth.

⁴ Ku keek kedhie, ayek dhööm cï tuöc cït man ë many de purun dɛ̈p cïï köör në raan thööc en të ŋoot awac ke nuai, agut të bï yen kɔn piɔ̈ɔ̈r.

⁵ Në aköölkɛn dhuëëŋ kek melik guöp, bäny mɛ̈tkï në melik ëtök, ayek wiɛɛt në mɔ̈u, ku pukkï röt lɛ̈ɛ̈tkï Nhialic.

⁶ Ayek röt kual në melik lɔ̈ɔ̈m në cuëër. Ku ŋɔ̈ɔ̈ŋ de kërɛɛc nu në kepiɔ̈ɔ̈th, ee ruu ke ɣeer në wɛ̈ɛ̈ric ëbɛ̈n cït many ë dhiën. Atuckï piɔ̈ɔ̈th cït many ye lɔ̈kde kɔc biöör adurduur.

⁷ “Ayek bänyken nɔ̈k, ku meliikken ayek wïïk kedhie ë cieŋ, ku acïn raan töŋ cï Ya cɔɔl në keyiic.

Yithriɛl kekë Juöör Kɔ̈k

⁸ Aye Bɛ̈nydït lueel an, “Eparaim acïk liääp në juöör kɔ̈k, ka acïk ciët kuïn cï nyin daak.

⁹ Juöör athölkï riɛl de Yithriɛl wei, ku akuc ë Yithriɛl. Ku Yithriɛl ë nɔm lou ke kuc në yepiɔ̈u.

¹⁰ Lɛc ye Yithriɛl rɔ leec, ee ye nyuɔɔth ë gɔk. Ku në ee kakë yiic kedhie, akënkï kenïïm puɔ̈k Bɛ̈nydït Nhialicden, ku kënkï kɔɔr.

¹¹ Eparaim acïn piɔ̈u cït ajïth, aye dap math ëthiäu. Ee Rip guɔ cɔɔl ee tëthiinë, na ëlë ke be rɔt guɔ puɔ̈k Athiriya.

¹² Abä keek aa deep në bɔi alɔ të le kek thïn, ku bɛ̈ɛ̈i keek piny cït man ë diɛt. Të le kek mat ëtök, abä keek dɔm.

¹³ “Amawoou në week! Në biäk de kɔc cï Ya nyääŋ piny. Acïk riääk yök në baŋ cï kek wöc në Yɛn! Akaar an luäk keek, ku ayek lɔ ë ke jiëëm Ɛn guöp arac në lueth.

¹⁴ Acïkï Yɛn ee lɔ̈ŋ ëgɔk në kepiɔ̈ɔ̈th, ku ee dhiëëu yen ye kek dhiau ke ke lam yiëth. Ayek kenïïm mat në këde rap, ku mɔ̈u, ku acïk Ɛn nyääŋ piny.

¹⁵ Acä keek wɛ̈ɛ̈t, ku ta keek ril, ku ayek röt bɛ puk, wëlkï Yanɔm ater.

¹⁶ Acïkï röt ee be puɔ̈k Nhialic Awärjäŋ. Acïkï Yɛn ee bɛ cɔɔl në kepiɔ̈ɔ̈th ëbɛ̈n. Acïk röt goŋ cït dhaŋ ŋɔl kɔ̈u, bänyken abïk thou tɔɔŋ, në luɔi ye bänyken A läät. Abïk thou në akuöörkuöör, ku lee ke leeŋ piɔ̈ɔ̈th paan de Rip.