Ɣodh 6 - JAM DE NHIALIC 2011

Yithriɛl Areec Gäm

¹ Aye kɔc ke Yithriɛl lueel an, “Bä wëlku wopiɔ̈ɔ̈th Bɛ̈nydït. Acï wook yiëk gup tëtöök, ku ee Yen abï wook tɔ waar. Acï wook gäm gup bɔ̈ɔ̈t, ku ee Yen abï ŋoot ke tɔ bɔ̈ɔ̈tkuɔ dem.

² Abï wook tɔ pïïr ee nïnkë yiic kaarou, ku në nïnkë yiic kadiäk abï wook jat nhial, ka wok bï bɛ rëër në Yen.

³ Gamku Bɛ̈nydït, themku buk dhil ŋic ëgɔk. Ku aŋicku ëgɔk nɔn bï Yen dhil tïc cït man cïï akɔ̈l duëër rëër ke cïï thok bɔ̈. Abï bɛ̈n tëde wook cït nyieer ke deŋ, ku cït deŋ yaak ee piny liëër.

⁴ Ku aye Bɛ̈nydït lueel an, “Bä week jɔ looi adï Eparaim? Ku eeŋö bä luöi week, wek kɔc ke Juda? Nhiëërdun acït ruu amiäk, ku cït thäc, ee guɔ riäär ëthiäu.

⁵ Yen acän week tuöc tïtkiën ke Nhialic në jam de luɔi de këtuc kekë riääk. Kë kaar tëde week ee kë tiëc yic ku le gɔk.

⁶ Ee nhiëër agɔk yen akaar acie miɔ̈c. Ee luɔi bïï kɔckï Ya ŋic nɔn yan Nhialicden Yen akaar, acie miɔ̈c ye nyop ëbɛ̈n yen ee këdït.

⁷ “Acïk löŋ de mät dhoŋ kɔ̈u, cït man ɣɔn kɔn Adam en dhoŋ kɔ̈u. Akënkï löŋdï bɛ̈n döt ëtɛ̈ɛ̈n.

⁸ Giliyad ee pänydït de kɔc ee karɛc looi ëbɛ̈n, kɔc cï cin thiäŋ në rim.

⁹ Bäny ke kake Nhialic acïk röt tɔ cït amatnɔm de nɛ̈ɛ̈k, ee kɔc buuth në kuɛɛriic. Ku näkkï kɔc në kueer ë Cekem në nääk ayäär.

¹⁰ Yɛn cï kë nhiany tïŋ baai de Yithriɛl: kɔckï acïk röt dhiöök në lam de yiëth.

¹¹ Ayï week ayadäŋ, wek kɔc ke Juda, akööl acä ke mac, akööl bän week luöi këtuc.