Ɣodh 4 - JAM DE NHIALIC 2011

Gääk Gɛ̈kë Yithriɛl

¹ Piɛŋkï jam ë Bɛ̈nydït wek kɔc ke Yithriɛl, Bɛ̈nydït ade gääk wël nɔm week, wek kɔc cieŋ ee pinyë. “Wek cïn piɔ̈n adöt, ku ciënkï nhiëër, ku wek cïï Nhialic ŋic.

² Aciɛɛn yen aya wek röt cieen, ku tɔ̈ɔ̈rkï röt lueth, ku näkkï röt, ku cuɛ̈ɛ̈rkï röt, ku nɔ̈mkï diäär ë röt. Wek ee lööŋ mäc röt, ku gɔ̈thkï ku dhuööŋkï kekɔ̈ɔ̈th. Ku wek ee riɛm lëu ë cieŋ.

³ Ku në biäk de ye kakë, këriëëc de pinyden abï yom, ku këriëëcdun pïïr ëbɛ̈n abï nuan ku thou: Läi, ku diɛt, agut cï rec abïk thou wïïr.

Bɛ̈nydït Agäk Bäny ke kake Nhialic

⁴ Aye Bɛ̈nydït lueel an, “Ë cïn raan gäk ŋɛk, ku cïn raan dhöl raan, ee bäny ke kake Nhialic kek agäk keek.

⁵ Ayek kɔ̈th aköl ku wakɔ̈u. Ku tït ke Nhialic akɔ̈thkï në keek ëtök. Ku mɔɔrdun Yithriɛl abä riɔ̈ɔ̈k.

⁶ Kɔckï abä keek riɔ̈ɔ̈k në biäk kuc kek Ɛn. Në baŋ cä wek ŋïnydï rɛɛc wek bäny ke kake Nhialic, wek cä keek jäi, ka wek cïï bï bɛ ya bänykiën ke kake Nhialic. Në luɔi cä wek nïïm määr në löŋ de Nhialicdun, Yɛn bï nɔm määr ayadäŋ në mïthkun.

⁷ Të cïï bäny ke kake Nhialic juëc, awäc ee yenyin ŋuak ayadäŋ. Ka dhuëëŋden abä puk aye ayäär.

⁸ Acamkï awäny de kɔckï kɔ̈u, ka ayek piɔ̈ɔ̈th miɛt të cïï kɔckï wäc.

⁹ Wek bä luöi këtuc ëtök në kɔc, në biäk de karɛc cäk looi.

¹⁰ Wek bï aa cam, ku cäkï kueth. Wek bï diäär aa kɔɔr arëët, ku cäkï kɛɛr. Në baŋ cä wek Bɛ̈nydït pɔ̈l, ku kuanykï yiëth cök ka acïk ciët tiiŋ cï köör.

Bɛ̈nydït Ajäny Läm de Yiëth

¹¹ Aye Bɛ̈nydït lueel an, “Mɔ̈u ë kɔckï riɔ̈ɔ̈k nïïm, nɔn yen mɔ̈n cï cieŋ, ku nɔn ee yen mɔ̈n ë piac ë dhiim!

¹² Ka ayek luny de tim ril yɔ̈ɔ̈k an nyuth keek nyuuth! Ku lëkkï thieec an guïïr keek kë kɔɔrkï bïk ŋic! Acïk Ɛn nyääŋ piny Yɛn Nhialicden. Acïï dhööm ë kepiɔ̈ɔ̈th keek thɛl wei, ka acïkï be diɛɛr në Nhialic.

¹³ Ayek yiëth miɔɔc në kur nïïm nhial ya, ku nyopkï miɔ̈c ye nyop ëbɛ̈n në kur kor nïïm, ku në tim de ɣok thar. Ku në atïïp ke tiim cï lɔ niëpniëp, në luɔi liir atïïpken. “Yen kë ye duetkun tɔ ya akɔɔrröör ka. Ku yen aye diäär ke wɛ̈ɛ̈tkun röt tɔ nöm.

¹⁴ Duetkun acä keek bï luöi këtuc të le kek köör, kedhie ayï diëër ke wɛ̈ɛ̈tkun të le kek nööm. Në biäk ya wek diäär luui yiëth nööm ayadäŋ, week ë yiëthkun. Ku miackï yiëth në keek ëtök. Ka wek kɔc cï nïïm riääk wek bïï riɔ̈ɔ̈k!

¹⁵ “Na cakaa nɔn cä wek wäc, wek kɔc ke Yithriɛl, duökï kɔc ke Juda bï tɔ mɛt röt në awänydun yic. Duökï ee lɔ Gilgal, ku duökï lɔ Bethaben, ku duökï ee kuëëŋ në rin ke Bɛ̈nydït pïïr.

¹⁶ Kɔc ke Yithriɛl arilkï nïïm cït weŋ amiɔ̈l: ka acïï Bɛ̈nydït keek duëër nyuääth ëläŋ të lääu de nyuäth cït nyɔɔŋ amääl.

¹⁷ Paan de Eparaim ë mɛt në yiëthiic, päl keek alɔ.

¹⁸ Amatnɔm de dëëk ke mɔ̈u, të cï kek dek, ke ke lɔ diäär kɔɔr. Ayek piɔ̈ɔ̈th miɛt në ayäär, awär dhuëëŋden.

¹⁹ Acïk röt tɔ gɔp ë yom de kɔɔr, ku abïk gup yäär wadäŋ në luɔi ye kek yiëth miɔɔc.